زي النهاردة

زي النهاردة ، 18 إبريل ، إتقابلنا في دار الأوبرا المصرية ، في كافيتريا المجلس الأعلى للثقافة ، كانت مجلتنا الصغيرة كبرت ، وأصبحت معروفة على مستوى المهتميين بالمجلات الإلكترونية ، وعملوا معانا لقائات في الإذاعة و قناة النيل الثقافية، ونزل عننا أخبار كتير في الجرايد القومية و الحزبية والمستقلة كمان ، وكان الميعاد في اليوم ده علشان نتصور ، صور حاتنزل في مجلة الشباب عننا ، وعن مشروعنا ، وقتها كل الزملاء كانوا فرحانيين جدا بالمشروع و نجاحه ، لكن أنا و هي ، كانت فرحتنا أكبر بكتير ، لأننا ، وبدون ما حد يعرف ، إتقابلنا قبل الميعاد ده بيوم ، كان يوم 17 إبريل ، لوحدنا ، لأول مرة ، علشان تحكي لي هي عن كل حياتها تقريبا ، ورغم إني كنت محضّر كلام كتير أقوله ، وكنت ناوي أقول لها إني بأحبها ، إلاّ إن الظروف في اليوم ده ماسمحتش بأي حاجة من إللي كنت بأرتب لها ، ومشيت الأمور بشكل أحلى بكتير ، وكانت أول هدية مني ليها ، عروسة ، سمتها هي مريم ، وعلبة طباشير ملون ، وقررت إني أقول لها مشاعري بصراحة في اليوم التالي ، إللي هو زي النهاردة 18 إبريل ، وقتها وبعد ما أتصورنا كلنا ، قلت لها أنا عايزك على إنفراد ، مشيت معايا لغاية مدخل الهناجر و هي خجلانه جدا و وشها كله أحمر ، وكأنها كانت عارفة إللي أنا ناوي أقوله بعد دقايق ، وكعادتي ، وبدون مقدمات ، قلت لها " أنا عايزك تكوني مراتي و أم أولادي " ساعتها ماكنش ليا أي سيطره على لساني ، وساعتها أكتر لحظة كنت خايف فيها في حياتي ، لدرجة أني قبل ما هي ترد وتقول أي كلمة أنا قلت لها " ماترديش دلوقت ، فكري و إبقي ردي عليا " ، من اللحظة دي ، ومن نظرة عنيها و هي بتقول لي أوعدك أني أفكر ، عرفت إنها حاتكون شريكة حياتي ، وقد كان

يا شريكة حياتي و عمري

ويا أغلى زوجة و صديقة في الدنيا

كل سنة و إنتي طيبة

بمناسبة عيد الحب بتاعنا