Pages

بياكل ،، ينام


سياسة بلدنا

بتعدم حياتنا

و تكرب بيوتنا

تمام التمام

بتهدم مصانع

و تخرب مزارع

و تقفل شوارع

عشان السلام

بتاكل في مالنا

و تسرق عيالنا

و تاخد ما جالنا

حلال أو حرام

و تنهب في قوتنا

و لو جوعنا موتنا

فتضمن سكوتنا

و صمت الكلام

بتاخد رشاوي

و تقبل دعاوي

و تعمل بلاوي

في كل الزمام

وساطة و عمولة

و أرقام ماهوله

فلل درجة أولى

و آخر إنسجام

و لو حد فكّر

يقول أو يعبّر

ده يبقى المغبّر

و ناقص علام

حايدخل سجونها

و يعرف جنونها

و يسمع فنونها

شتيمة و ملام

و ياخد طريحة

و يركب صفيحة

و يمكن فضيحة

لأهله الكرام

عشان تاني مرة

مايعملش فِلة

و ينسى إنه قُلة

و ينسى المقام

و يخرج يعاود

مُسالم مهاود

في صف الأجاود

وأكل البرام

يعيش زي غيره

بياكل في ديله

ويركب سريرة

و جنبه المدام

لا يعرف حقوقه

ولا يبص فوقه

و يفضل في طوقه

بياكل ،، ينام


أيوة خـُـنـتـِـك


أيوة خُنتك يا حبيبتي

رغم إن الكون فداكي

لما يوم بكيتي و إنتي

طفلة ، و ماكنتش معاكي

لما نمتي زمان لواحدك

مش في حضني يا ملاكي

أيوة خُنتك يوم ما عشت

أي ثانية قبل منك

أيوة خُنتك يوم ما كنت

في اي حته بعيدة عنك

أيوة خُنتك لما شقشق

فجر من غيري في سماكي

لما كنت في لحظة بأعشق

أي حاجة غير هواكي

أيوة خُنتك لما عيني

قبل ما تقابليني شافت

أيوة خُنتك لما روحي

يوم زمان على حد خافت

ايوة خُنتك قبل ما أعرف

إني ممكن يوم أقابلك

و إن عمري معاكي يمحي

أي عمر عَدّى قبلك

أيوة خُنتك قبل ما أفهم

إن كل حياتي ليكي

و إن أنا و الله أعلم

نبض قلبي بيناديكي

أيوة خُنتك و الخيانة

عمرها ماكانتش بيننا

بس حاأعمل إيه في عُمر

عدّى قبل ما أتقابلنا ؟


لبنان .. بدلة و عمامة


ورجعنا تاني

ندور في نفس العتامة

لون الغيامة

و العتمة في بلادنا ياما

و كأن يومنا

نهار في يوم القيامة

نلقى العلامة

ذل البدن و الكرامة

قشرة جروحنا

تسد باب السلامة

مافيناش زعامة

تقدر على الإستقامة

غصن الزتون

بين منقارين الحمامة

مليان أتامه

و مالينا حسرة و ملامة

لبنان بينزف

و بعد منه الشهامة

نفس الغمامة

و سوادها بدلة و عمامة

تاج .. وعجبي


وصلني تاج من بسمة الروح

و طبعا هي بتحاول تنتقم مني لأني رئيسها في المجلة

و لكن نحن لهااااااااااااااا

التاج بجد هو السهل الممتنع

هو طلب واحد بس

إتكلم عن نفسك في عشر نقاط

حاااااااااضر

و رباعيات كمان

__________

1

إسمي و ليد و إسم الجد كان جودة

ثلاثة و ثلاثين سنة في العمرمفروده

خريج سياحة و كمان دبلومة في الأعلان

الجرافيك شغلتي و تصاميمي موجودة

___________

2

عشقت أجمل بنت و قلبي بقى مشغول

من يومها بأكتب قوافي و فيها شعري بأقول

عنيها من سحرها السحر غار منها

و هي صبحت مراتي و حاتفضل كدا على طول

___________

3

أربع شهور و كمان فوقهم عشر ايام

لا عرفنا يوم نخرج ولا يوم عرفنا ننام

من يوم ماشرف لنا البيه "عمر" و إحنا

لا رحنا يوم سيما و لا شفنا يوم أفلام

___________

4

بأحب آلة الكمانجة و بعرف أعزفها

و أميل مع الألحان و ساعات بألفها

درست في الكونسير على أيد أساتذة كبار

و ست زي العسل ياما كنت بأقرفها

___________

5

مزاجي طول ما الجيب عمران متظبّط

لكن لو يوم حايفضى تلقاني متلغبط

لا نفسي في البيزنس ولا نفسي في الملايين

ولا نفسي إيد الفقر فوق كتفنا تخبّط

___________

6

بحب بلدي بجد و بأخاف عليها كتير

من ناس بتهوى الهد و تقبل التدمير

سافرت بره لقيت ملامحي ممسوحة

رجعت شوفت شفايفي و عنيا و المناخير

___________

7

بشجع الكورة مع أني مش غاوي

تلقاني من منبتي في الأصل أهلاوي

لو يوم في ماتش بأروح على راسي كاب أحمر

لا يغلطوا و يقولوا عني زملكاوي

___________

8

أنا مصري زي الناس كلها في وطني

ساكت لاكن مليان إحساس كبير وطني

بأحب صوت الحق و العدل و الحرية

و أكره أكيد حكومتنا و حزبها الوطني

___________

9

أبويا ليه في حياتي أفضال ماتتعدش

و أمي عمري بحاله لجميلها مايردش

و أخويا هو الذكرى و شقاوة الصبيان

و أختي لو تطلب ، طلبها مايتردش

___________

10

مابأخافش م السلطان ولا اي صاحب جاه

ولا يوم نسيت جرئتي ولا سابني قلبي وتاه

ولا خفت يوم من عسكر أو نسر أو دبابير

لكني طبعا بأخاف م الآخرة و من الله


عمر و أنا .. و أشياء بيننا



لما يكون في أيديك إنسان

لسه مالوش في الدنيا كتاب

لسه مالوش في الأرض مشاكل

لسه لا صادق ولا كذاب

لما تشوف قدّامك روح

تسرق منك كل دقيقة

تنسى المرفوض و المسموح

تلقى إيديك الناشفة رقيقة

فجأة يهب في قلبك حس

فجأة تحس إنك مش نفسك

تبقى كأنك عايش بس

علشان توهب إبنك نفسك

فجأة الطيبة

حاجة رهيبة

تفرض نفسها فوق أفعالك

فجأة تلاقي

كل الباقي

منّك ، صورة بعيد في خيالك

تلقى الدمع في عينك تاني

بعد ماكانت عينك صامت

تلقى لسانك بحر أغاني

بعد ماكان من غلبك صامت

تلقى شفايفك تعرف تفرح

تبقى سعيد .. و تبطّل تسرح

تسمع نبضة قلبه و تضحك

وتشوف ضحكة عينه تطير

يبقى بفرحه بيحضن فرحك

و أنت مابين أحضانه اسير