Pages

رباعيات الممات

قلبي إللي كانت ضحكته بتطير بعيد

وكان سعيد أكتر من أكتر سعيد

ما أعرفش ليه الفرح جوّاه إنكسر

حواليه ملايين البشر لكن وحيد







من قلبي قلت خلاص للدنيا غووري

خدي معاكي المال وحبّة غروري

آخرتها حاأتشال كَفَن جوه التابوت

ما أنا في طابور الموت مستنّي دوري









عالعيشة مرغم والحياة جابراني جبر

والعمر عدّى والمرار شبّعني صبر

من صغري أنا مفتون ،، عايش غريب

مستنّي روحي تغيب بقى وتروح لقبر





أنا قلت مرّة للألم ما كفايه همّ

وتروح تشوف غير جتتي تملاها غمّ

ولا مرّة رد ولا حتى شاور بإديه لحد

طلع الألم من حظّي أنا أعمى و أصمّ










يا حبيبتي ما إنتي من زمان عارفة الحقيقة

لو كان بإيدي ما كنت عمري أبعد دقيقة

و العُمر دوُر ،، لابد يوصل منتهاه

أمّا الحياة موجودة في عنيكي البريئه




بقيت وحدي

وأنا معاكي بقيت وحدي

برغم القـُرب و اللمسه

برغم الضحكة و الهَمسه

برغم النور

وحضن الضي ضل السور

بقيت وحدي

و جوّه عنيكي ليل و بحور

مابيننا عشان كتير مبدور

في نظرتهم معاني إزاز

ومش لاقي إللي كان إحساس

بيغني عن وجود الناس

ويبني من مشاعري قصور

بقيت ساكت

شريد

مكسور

كأني وضيع من الأنجاس

وحضن مشاعرك الالماظ

صبح عاجز

عليل

مشلول

حزين سايب مشاعري تبور

وجسمي بين إيدين عُـكـّاز

وصوتي من صفيح و نحاس

عقيم مبتور

جمال حِسـّي إللي كان مشهور

صبح غايب

و كلّه نشاز

صبح عايب

مع إنه مازال دايب

في عشق ترابك المسحور