Pages

مش كفاية


مش كفاية

عنيا بس لوحدها إللي تشوف عنيكي

مش كفاية

إيديا تنبض في الشتا و تحضن إيديكي

مش كفاية ألف كلمة

حب أقولها مش كفاية

مش كفاية لساني يحكي

عننا مليون حكاية

مش كفاية

عيني تسهر و إنتي عينك جنبي نايمة

مش كفاية

روحي فيكي تبقى طايرة ،، تبقى هايمة

مش كفاية نكون حقيقة

واحدة من ضمن الحقايق

مش كفاية عمري كله

مهما كان فيه من دقايق

مش كفاية

ياحبيبتي قلبي يبقى مِلك قلبك

مش كفاية

إني عايش كل لحظة في عمري جنبك

مش كفاية الدنيا مهما

غالية كانت أو بعيدة

يا حبيبتي أهم حاجة

تبقى فرحانة و سعيدة


تاجين في الراس .. توجع


وصلني التاج ده من بسمة ( الروح )

عبارة عن تاجين في بعض

و طبعا لازم أجاوب عليهم

و إليكم المصايب السوده

_______________________________________________________________________

التاج الأول

أعطيتك ثلاث وردات من هم الثلاث أشخاص اللى هتعطيهم الورد اللى معاك ؟

الحقيقة أنا حا أهادي الثلاث وردات لمراتي ، أصلها بتحب الورد جدا

لو أعطيتك ورقة فيها 3 سطور وقلت لك أكتب فيها اللى أنت عاوزة هتكتب أيه ؟

غالبا حاأعمل فيها حسابات شغلي الملغبطة دائما وإللي ماحدش بيفهمها غيري

ما هو هدفك فى الحياه ؟

و الله بأحاول على قدر إستطاعتي أني أعمل لدنياي كأني أعيش أبدا و أعمل لآخرتي كأني أموت غدا زي ما الرسول صلى الله عليه وسلم قال في الحديث الشريف

المقولة ( ان شاء الله بكرة هيكون أحسن من النهاردة ) هل تصدق هذه المقولة ولماذا ؟

الحقيقة مش دايما ، ده بيتوقف على مين قال المقولة ، يعني مثلا لو حققت في شغلي تقدم معين وواحد من زمايلي قال المقولة دي حاأصدقه ، لكن لو الحكومة مثلا عملت لنا إعلان في التليفزيون يقول بكره أحسن من النهاردة ، حاأفطس على روحي من الضحك و مش حاأصدق طبعا ، بالعكس حاأعرف إن الأيام الجاية سوده و مهببه بهباب .

من المغنى اللى بتحبه أوى ؟

هي مغنية ، الست أم كلثوم

وأيه أحلى أغنية بتحبها ؟

رق الحبيب ، الأغنية دي معجزة فنية بجد

غزة تمثل لك أيه فى حياتك ؟

صورة جديدة للواقع العربي المرير

اعطى لأنتمائك لوطنك درجة من المائة ؟

لو الإنتماء مقصود به الحب و التضحية يبقى مية في المية ، لكن لو مقصود بيه الرضا و التغاضي عن أخطائها يبقى صفر في المية

لو تزوجت وأنجبت ولدين وبنتين هتسميهم أيه ؟

أنا متجوز بالفعل و عندي ولد أسمه عمر ، و إن شاء الله لو جبت ولد تاني حاأسميه يوسف

أما البنت فالأولى إن شاء الله تبقى مريم أما الثانية بقى لسه مافكرتش

عمرك غشيت فى أمتحان وأنت صغير ؟

آه ، بس أتقفشت ، لأني ماكنتش بأعرف أوطي صوتي ، و بعد كده بقيت مش بأغش بقيت بأغشش بس

لو أتعرض عليك رشوة وأنت فى زنقة مالية هتعمل أيه ؟

حاأرفضها ، على فص عيييييييييييني ، معلش بقى ، رضاء ربنا أهم

قول 3 صفات ب 3 كلمات توصف بيهم شخصيتك

هادي ، طموح ، كتوم

صفة عاوزها فى شريك حياتك ؟

الحقيقة هي صفة كنت بأتمناها و ربنا كتبهالي و هي العقل ، صحيح هي صفة نادرة شوية في الستات بس الحمد لله لقيتها في شريكة حياتي و الحمد لله .

ايه اللى غير دراستك وشايف نفسك فيه قوى

سباق السيارات ، كنت نفسي طول عمري أكون سائق في سباق السيارات السريعة

طب دلوقتى أيه المكان اللى نفسك تكون فيه

نفسي أكون في السويد ، في مدينة أستوكهولم بالذات ، و في منطقة سلوسن بالتحديد ، علشان فيه واحد ناصب عليا في ألفين دولار و نفسي أخدهم منه

_____________________________________________________________________

التاج الثاني

بدأت تدوين من أمتى ودخلت عالم التدوين ده أزاى ؟

بدأت من شهر يونيو 2005

و دخلت التدوين بالصدفة ، لأني كنت بأتجول على النت و إتكعبلت في مدونه و بدأت أقرأها و منها دخلت عدة مدونات و بعدين قلت لنفسي ، طيب ماتعمل أنت كمان مدونة بدل ما أنت بتكتب لنفسك كده ، و عملت مدونتي فعلا و من ساعتها مابطلتش تدوين .

أيه كان أنطباعك فى البداية ؟

كنت مبسوط ، و في نفس الوقت مستغرب إن إللي بأكتبه بيلاقي حد يرد عليه و يهتم إنه يقراه

مين أكتر واحد بتهتم بتعليقه على بوستك الجديد ؟

الحقيقة هي مراتي ، رغم إنها مش دايما بتعلق كتابةً عندي ، بس طبعا بتقرأ كل إللي بأكتبه و تقول رأيها فيه قبل ما ينزل حتى على البلوج

أيه أهم حاجة أتعلمتها من عالم التدوين ؟

إن الإختلاف لا يفسد للود قضية ، بجد مش شعارات ، لأني ليه أصحاب مدونين و مدونات بأختلف معاهم في حاجات كتير لكننا أصحاب و بنتشارك كمان عمل واحد جماعي ناجح و الحمد لله

أيه أكتر حاجة كرهتها ؟

الفزلكة الفاضية و محاولة بعض المدونين أنهم يفهمونا إن الكتابة و الإبداع الأدبي لازم يكونوا منبعجين و مقعرين و غامضين و متنيلين على عينهم ، و إن لو الناس مافهمتش إللي أنا كاتبه يبقى كده أنا نجحت ، و ده دليل إني واد مثقف فذ و ماليش زي ، مع إن الموضوع أبسط من كده بكتير ، و السهولة في تناول أي موضوع في رأي هي سر نجاحه .

حاسس أن التدوين له تأثير ؟

له تأثير عليا أنا شخصيا ، أو على المدونين أنفسهم ، لكن لو تقصد تأثير على البلد أو الأحداث الجارية فهو تأثير طفيف ولا يذكر


فزورة بلدي

بلدي يا ناس حتّة فزورة

صعبة و بنحلها بسهولة

بلدي لا ناشفة ولا مبلولة

ولا مقلوبة ولا معدولة

ولا مع دووله ولا مع دووله

ولا في الآخر ولا هي الأولى

ولا مفتوحة ولا مقفولة

ولا معزوزة ولا مذلولة

بلدي يا ناس حتة فزورة

صعبة و بنحلها بسهولة

بلدي تلاقي فيها سياحة

و أجانب ماشيين في الساحة

و الشعب بياكل عيش منهم

مع إننا شايفنها قباحة

بلدي كمان شهرتها زراعة

عُمر ما مر علينا مجاعة

مع إننا زراعتنا بتحبي

فاس و شادوف و بتاع و بتاعة

بلدي بتهتف للتعليم

علشان يبقى الشعب سليم

فبيتخرج نصه جاهل

أمّا النص الثاني بهيم

بلدي تقول وحدة وطنية

مع إن الأحداث مش هيّه

دوول بيقولوا على دوول كافرين

ودوول بيقولوا على دوول حرامية

بلدي دي فيها وزارة صحة

مليون مستوصف و مصحّة

رغم كده أمراضنا كتيرة

من السرطان ولحد الكحّة

بلدي يا ناس حتّة فزورة

صعبة و بنحلها بسهولة

يمكن قالبه و يمكن شاربة

أو ضاربة باكتّة و مسطولة

تهييس صيام


إذا العدس يوماً أراد الحياة

فلابد أن يستجيب البصل

ولابد للخل أن ينسكب

ولابد للخبز أن ينكسر


رمضان الحزين


فقدناك يا رمضان الحزين

وطردناك من كل السماء

و من عقولنا و القلوب

فبتنا من الأشقياء

قتلناك يا شهر نور

و كأن أيامك كربلاء

أسرناك بالنوم صباحا

و بالرقص و العري في المساء

أصبحت غريبا علينا

فصرنا نحن الغرباء

صُمنا عن مضغ الطعام

لكنا أفطرنا بالرياء

و لأن الثواب عظيم

إستبدلنا الكذب بالماء

و إرتوت عروقنا أنيناً

و كرهاً لهذا الحساء

أنفقنا أموالنا الحرام

في حلالك بسخاء

و نلعن الشح و البخل

و طوال العام بخلاء

إيّاك يا رمضان

أن تصدق أننا كرماء

فقط هي رشوة

نطلبها إلى السماء

أرأيت كم هو أليم

أن تطلع على الجهلاء ؟

ستمر أيامك و ترحل

و نظل نحن أغبياء

مصر المأمنة



ياصاحي همنا

لزيارة أمنا

مصر المأمنة

بأهل الله


لا تجهل امرهم

في مصر مقرهم

هم أهل البيت

الواضح سرهم

زورهم بمحبة

تشرب من درهم

وابذل أموالك

لجناهم برهم


ياصاحي همنا

لزيارة أمنا

مصر المأمنة

بأهل الله


دايما واليهم

لتنال من برهم

سيدي الحسين

الناثر درهم

ابن الحنفية

محمد بدرهم

قل زيد الأبلج

الباقي أغرهم


مع حسن الانور

الفعلو سرهم

اسماعيل ومحمد

الشايع ذكرهم

صالح والحنفي

الفايح عطرهم

لعلي

زين العابدين حبرهم


أستاذنا الباقر

في العلم بحرهم

في البحر وبرهم

لله درهم


مصر المأمنة

بأهل الله


ادعوك بسيدتي

هي زينب عمدتي

وبشمس الحق

السيدة نفيسة

هي بحر العلم

وغفيرة مصرتي

وبعين الحكمة

فاطمة النبوية


ادعوك يا الله

بجميع عباد الله

دنيال ولقمان

النال حكمة الله

وأبي الدر داء

ووكيع ولي الله

وامامنا الشافعي

الاحيا دين الله


ياصاحي همنا

لزيارة أمنا

مصر المأمنة

بأهل الله


والشيخ البدوي

الوارث نبي الله

الرفاعي احمد

بواب رسول الله

ودسوقي الهائم

دوما في حب الله

والشاذلي سيدي

وخليل أمين الله


والعارف ابن أبي

جمرة و عبد الله

جابر وبشرى

المقرب عند الله

وأبي العباس

المرسي ذاكر الله

ثم البوصيري

مادح رسول الله


ياقوت العرش

مع أولياء الله

الاربعطاشر

الخصوا بسر الله

وبصاحب الحكم

هو ابن عطاء الله

قل وفا والقمري

الام رجال الله


لا تنس الصاوي

مفسر كتاب الله

ثم القناوي

والصعيدي كنز الله


بجاهم يا الله

بجاهم يا الله

بجاهم يا الله

زيل عننا العلة


ياصاحي همنا

لزيارة أمنا

مصر المأمنة

بأهل الله

صلوات تسرح

للخير قطب الرحى

توصل ضريحو

عنه لا تبرحا

تذكرنا عندو

واحوالنا تشرحا

بالفوز تاتينا

وصدورنا تشرحا

وتقول يا برعي

لهمومك

اطرحا

أكملت علاجك

غير حقنة ومشرحة

ومواصلاتك

في السكة مسرحة

بالعافية افرحا

ولبلادك امرحا

مصر المأمنة

بأهل الله


ياصاحي همنا

لزيارة أمنا

مصر المأمنة

بأهل الله


كلمات القصيدة :

الشيخ السودانى عبد الرحيم محمد وقيع الله البرعى


وداع درويش



درويش
فارقت خلاص ؟
و ماعدش كلام الشعر حايلمس
طرف قلوبنا بالإحساس
معقول حاأناديك وألاقيك ماتجيش
معقول من غير دواوين حانعيش
من غير كلمات و صور و خيال
معقول من غيرك ممكن ناكل
تين و ياميش
معقول حايكون في الدنيا جمال
أحلام و آمال
من غير درويش ؟
معقول حايكون في الدنيا عيال

عقولها سليمة مابتصديش

من غير درويش ؟

ماباقاش عندنا كلمات تنقال

مربوط على طرف لسانّا حديد

مشدود بحبال

و كتافنا تشيل على طول أحمال

بتهد جبال

تعبنا خلاص و مابنخبيش

وصحينا لقينا عمرك فات

إنما أعمارنا مابتعديش

و دموع في عنينا

بقالها زمان قوي مابتجريش

و بحبر ثقيل قوي م الأوجاع

كتبت على كل قلوبنا وداع

محمود درويش