Pages

سيرك العجايب


قرررررب وشوف

سيرك العجايب

أبو نور و نار

وبلاوي بالليل و النهار

وعيون بتنظر بإنبهار

على أي عايب

قررررب و شوف

سيرك العجايب

شوف عندنا الساحر شفيق

أبو أيد خفيفة و صوت رقيق

ونِمَر قديمة و ثقل دَم

يعمل ما يعمل مش مهم

ماهو أصله يبقى للمدير

أقرب صديق

ومديرنا خدّام للحبايب

قرررررب و شوف

سيرك العجايب

ع الحبل شوف موسى الجبان

الواد مصيبة و أُلعبان

في حكومة يلعب

وفي ثورة يلعب

وعلينا يلعب من زمان

ستّف لنا كل المصايب

قرررررب و شوف

سيرك العجايب

وفي فقرة الترابيز هنا

مرتضى يقدّم لنا

أجمل عروضة المزهلة

في البلطجة و البهدلة

و لأنه ساقط في النوادي

وإبنه ساقط زي دادي

أحلامة يحكم يوم بلادي

مع إنه معروف إنه خايب

قرررررب و شوف

سيرك العجايب

وعندنا المجهول عكاشة

بلياتشو عامل من نفسه باشا

وعلينا يطلع من حضن أهله

ويقول كلامة المليان بجهله

عنده السياسة و الفول قرايب

قرررررب و شوف

سيرك العجايب

في السيرك ده فقرات جديدة

وحاجات فريدة

وسنية و بديعة و تفيده

ورجال سياسة نصّهم

شايب و عايب

قررررب و شوف

عندنا

سيرك العجايب

بأشتكي منّك إليكي


بأشتكي منّك إليكي

يا إللي كان إسمك بلادي

مُوتي أصبح شيء روتيني

بسيط و عادي

وبقينا نسأل بعضنا

كام مننا ماتوا السنة دي

بأشتكي منّك إليكي

وأنا مش راضي لك بهدلة

أو حاجة تحصل لك قصادي

أو حكم زي المهزلة

أو شرطة وقحة و مزبلة

تفتري ع الناس و تقتل

بدم بارد و قلب هادي

بأشتكي منّك إليكي

ياللي بعتي ثورتي

يوم ما فرّقتي إتحادي

بانت ساعتها عَورتي

بس دمي و جتتّي

هُمّا و الأحلام

نجاتي


إستكــــان


إستكان

ولا هَمُّه مين من جنبُه سَبُّه

ولا مين في يوم على خدُّه لَــبّه

ولا مين أهان

ولا مين سمّاه ندل و جبان

ولا مين سقاه ذل و هوان

لمّا إستكان

بقى شيء ضعيف

الصمت أصبح يرعبه

بقى شيء مخيف

لو "فار" في شارع يرهبُّه

ويحبسه فوق الرصيف

مع إنه كان فاكر حايشعر بالأمان

لمّا إستكان

من غير عيون

أحضني قلبي الضعيف

وأفردي علي كتفي شال

خللي إسمي يتحسب ضمن الرجال

بددي صمتي المخيف

غرّقيني بالآمال

شيلي من روحي المجون

والجنون

أو أي زيف

على أي حال

إنتي جوّايا الخيال

إنتي زرع و نور و ريف

إنتي بيت في قصيدة م الغزل العفيف

إنتي جنة من جمال

إنتي نسمة عصر في فصل الخريف

إنتي كل مافيكي شيء غالي و شريف

بس أغلى مافيكي قلب رقيق حَنون

وبريء كما قلب العيال

ومالوش في شغل الكدب و أمور الأحتيال

ماسك إيدين قلبي الكفيف

بيعلّموا إزاي يكون

أقرب ما يمكن م الكمال

من غير مايحتاج العيون