Pages

رُحتي فين ؟


إختفيتي يا مصر فين؟

دُرت طول العمر أدوّر

مش لاقيكي من سنين

رحت شرق ورحت غرب

تهت لجلك في البلاد

وفي كل درب

شوفت سِلم

وشفت حَرب

شفت ظلم كتير و كَرب

كل حلم حلمتهولك

كان حزين

كل لحن يا مصر ليكي

جوه قلبي

عاش سجين

حتى صوتي

حتى صوت أنفاس سكوتي

بين دموعي غرقانين

روحتي فين؟

ميين غواكي ؟

أي كلب ؟

أي عاصي ؟

مين رماكي بأي ذنب ؟

مين سقاكي تراب و طين ؟

مين يا مصر

قولي مين

بس قولي

إختفيتي يا مصر فين

إختفيتي من كسوفك ؟

ولاّ مش عايزاني أشوفك

طاب حاتلقي حد تاني

يبقى إبنك

حد غيري حايبقى دمك

ويشيل في همّك

حد غيري حاييجي يوم

يبقى قلبك

يبقى إسمك

يبقى رسمه في قلب رسمك

حد غيري حايبقى أصلي

حد غيري يامصر ممكن

يبقى مصري؟

هات سكّينة في إيدك .. و إدبح


هات سكينة في إيدك و إدبح

كل عروق الهمّة في جسمي

وإشرب دمي و وزوّد همّي

وإمسح من ع الكوكب إسمي

هدّ بيوتي

وإبني بيوتك

سكّت صوتي

وإرفع صوتك

لغبط كل ملامح رسمي

لمّا الناس من دمّي خانوني

إنت إزاي يعني ماحتخونشي

لمّا ملوكي خلاص سجنوني

إنت إزّاي بقى ماحتسجنشي

لمّا يهودك

موّت خالي

لمّا تابوتك

دق عيالي

نجم داوودك

زقّ هلالي

وصَبَح هو المالك رسمي

فاضل إيه علشان أستسلم

وأرمي كرامتي لمداس خِصمي

أجمل حاجة إن إنت جمال


راجل جيت من ظهر الريس

شكلك طيب و إبن حلال

أجمل حاجة في شخصك إسمك

أجمل حاجة إن إنت جمال

بس إسمح لي شوية أتجرأ

وأسألك المرة دي سؤال

لجل أتطمن لما سيادتك

تبقى الريس ع الأحوال

هل فيه واحد زيك ممكن

يعرف حاجة عن التقسيط

أو يسمع عن وصل أمانة

بيودّي الواحد في حديد

هل ممكن تخدمنا سعادتك

و توفر لولادنا وظايف

لو حاتقول آه .. إبقى الريس

و أنا أوزع شربات و قطايف

قول لي إزاي حاتحل مشاكل

الفلاح أبو قلب نظيف

وإنت في قصرك شارب واكل

وعمر عنيك ماشافتش الريف

قولي إزاي حاتحس بفاطمة

أو بزخاري أو عواضين

وإنت صحابك رامي و هيثم

أو مايكل ونادين و شيرين

قول لي إزاي حاتخللي اللقمة

تنزل تملى عينيّا و بطني

وأنا محروم ماباشوفش اللحمة

إلاّ في عيد الحزب الوطني

لو فيه شاب عايز يتجوز

قول لي منين حايجيب الشقة

عمر في يوم ما الحظ نده له

وهو وأهلة بياكلوا بدُقّة

طيّب قول لي إزاي حاتحارب

لو أولاد صهيون هاجمونا

مع أمريكا في عهد أوباما

ونتنياهو إبن المجنونة

أنا مش عارف جد صراحة

تبقى رئيس ولاّ ماتبقاش

وإزاي تحكم شعب بحاله

لسه حياته ماتعرفهاش

قول و إشرح لي إزاي الراعي

يرعى ف أرض ماشافش نباتها

قول و إشرح لي إزاي الريس

يحكم دولة ماعاشي حياتها

مافيش قلق


تمن ساعات من غير قلق
طول اليوم مافيش قلق
أولويز
إمتصاص أكثر
وفوطة أكبر
تمن ساعات من غير قلق
طول اليوم مافيش قلق
مافيش دم
مافيش حيا

إللي إختشوا مااااااتوا

مع شديد إعتذاري للقارئات من الجنس اللطيف