Pages

فزورة بلدي

بلدي يا ناس حتّة فزورة

صعبة و بنحلها بسهولة

بلدي لا ناشفة ولا مبلولة

ولا مقلوبة ولا معدولة

ولا مع دووله ولا مع دووله

ولا في الآخر ولا هي الأولى

ولا مفتوحة ولا مقفولة

ولا معزوزة ولا مذلولة

بلدي يا ناس حتة فزورة

صعبة و بنحلها بسهولة

بلدي تلاقي فيها سياحة

و أجانب ماشيين في الساحة

و الشعب بياكل عيش منهم

مع إننا شايفنها قباحة

بلدي كمان شهرتها زراعة

عُمر ما مر علينا مجاعة

مع إننا زراعتنا بتحبي

فاس و شادوف و بتاع و بتاعة

بلدي بتهتف للتعليم

علشان يبقى الشعب سليم

فبيتخرج نصه جاهل

أمّا النص الثاني بهيم

بلدي تقول وحدة وطنية

مع إن الأحداث مش هيّه

دوول بيقولوا على دوول كافرين

ودوول بيقولوا على دوول حرامية

بلدي دي فيها وزارة صحة

مليون مستوصف و مصحّة

رغم كده أمراضنا كتيرة

من السرطان ولحد الكحّة

بلدي يا ناس حتّة فزورة

صعبة و بنحلها بسهولة

يمكن قالبه و يمكن شاربة

أو ضاربة باكتّة و مسطولة

7 comments:

Anonymous said...

جامدة جدا بجد
بس اكيد احل هايكون العجل في بطن امه

بثينــــــة said...

اية الرشاقة دي
هايلة الفزورة بس مالهاش حل

Unique said...

هي فعلا فزورة ..
جميلة جدا .. الكلمات طبعا مش بلدنا
رمضان كريم

ShimaaMahdy said...

لا جامده بجد

لكن برضه الفزورة ماتحلتش

):

KING TOOOT said...

Anonymous said...
مش شرط يكون عجل
و مش شرط تكون أمه
تحياتي
_____________________
بثينة
أشكرك جدا على موضوع الرشاقة ده
بس ليه مالهاش حل
ده حلها موجود قدامنا كل لحظة
نورتي مدونتي المتواضعة
______________________
unique
و الله وبلدنا كمان جميلة جدا بس إحنا يمكن إللي مانستاهلهاش
الله أكرم
______________________
shimaamahdy
لا صدقيني محلولة من أول كلمة
تحياتي
______________________
KING TOOOT

bos bos said...

ليك تاج عندى روح استلمه

Anonymous said...

وعليكم السلام

أتمنى التوفيق لهذا الموقع القيم جدا

وفعلا محتوى الموقع مفيد جدا واستفد منه الكثير

www.fr7ty.com/vb

www.fr7ty.com