Pages

زي النهاردة




زي النهاردة ، 18 إبريل ، إتقابلنا في دار الأوبرا المصرية ، في كافيتريا المجلس الأعلى للثقافة ، كانت مجلتنا الصغيرة كبرت ، وأصبحت معروفة على مستوى المهتميين بالمجلات الإلكترونية ، وعملوا معانا لقائات في الإذاعة و قناة النيل الثقافية، ونزل عننا أخبار كتير في الجرايد القومية و الحزبية والمستقلة كمان ، وكان الميعاد في اليوم ده علشان نتصور ، صور حاتنزل في مجلة الشباب عننا ، وعن مشروعنا ، وقتها كل الزملاء كانوا فرحانيين جدا بالمشروع و نجاحه ، لكن أنا و هي ، كانت فرحتنا أكبر بكتير ، لأننا ، وبدون ما حد يعرف ، إتقابلنا قبل الميعاد ده بيوم ، كان يوم 17 إبريل ، لوحدنا ، لأول مرة ، علشان تحكي لي هي عن كل حياتها تقريبا ، ورغم إني كنت محضّر كلام كتير أقوله ، وكنت ناوي أقول لها إني بأحبها ، إلاّ إن الظروف في اليوم ده ماسمحتش بأي حاجة من إللي كنت بأرتب لها ، ومشيت الأمور بشكل أحلى بكتير ، وكانت أول هدية مني ليها ، عروسة ، سمتها هي مريم ، وعلبة طباشير ملون ، وقررت إني أقول لها مشاعري بصراحة في اليوم التالي ، إللي هو زي النهاردة 18 إبريل ، وقتها وبعد ما أتصورنا كلنا ، قلت لها أنا عايزك على إنفراد ، مشيت معايا لغاية مدخل الهناجر و هي خجلانه جدا و وشها كله أحمر ، وكأنها كانت عارفة إللي أنا ناوي أقوله بعد دقايق ، وكعادتي ، وبدون مقدمات ، قلت لها " أنا عايزك تكوني مراتي و أم أولادي " ساعتها ماكنش ليا أي سيطره على لساني ، وساعتها أكتر لحظة كنت خايف فيها في حياتي ، لدرجة أني قبل ما هي ترد وتقول أي كلمة أنا قلت لها " ماترديش دلوقت ، فكري و إبقي ردي عليا " ، من اللحظة دي ، ومن نظرة عنيها و هي بتقول لي أوعدك أني أفكر ، عرفت إنها حاتكون شريكة حياتي ، وقد كان

يا شريكة حياتي و عمري

ويا أغلى زوجة و صديقة في الدنيا

كل سنة و إنتي طيبة

بمناسبة عيد الحب بتاعنا

19 comments:

sony2000 said...

وانا اول المباركين وبقول مبرووووووووووووك
ويارب ايامكو كولها تبقي فلانتين للابد
اللهم امين:)

shimaa elkholy said...

كل سنه وانتم طيبين
دايما فى خير وهنا ان شاء الله

Ms Venus said...

كل سنة وانتوا بخير وسعادة


ربنا يوفقكم دايما ويسعدكم

حفيدة عرابى said...

ماشاء الله لاقوة الا بالله
ربنا يسعدكم ويخليكم لبعض دايما

لــــ زهــــــراء ــــولا said...

وليد
-*-*

ربنا يديم عليكم فضله وتظل هى نعمه الزوجه لك فى الدنيا , ربنا يفرح قلوبكم مع بعض ويبارك لكم فى عمر
فرحانه بالبوست ده اوى اوى اوى
ويمكن لاول مره اكتب كومنت والدموع فى عيونى من فرحتى بهذا الكلام ....

ربنا يكفيكم شر الحسد والحاسدين
ربنا يكفيكم شر الحقد والحاقدين
ادعو لكما من قلبى ان يسعد قلوبكما معا ..............
يارب مية سنه فى سعاده وهنا وحب وخير وسعاده
وتحيه خاصه لهبه وهى اسم غالى على قلبى ووبوسه كبييييييييييره لعمر

زهراء

мαησηα said...

يا عسل

كل سنة وانتوا طيبييييييييييييين وبخير وحب وهنا وسعادة يارب اللهم اميييييييييين

ماشاء الله عليكم الله اكبر

قل اعوذ برب الفلق بجد خايفة عليكوا تتحسدوا

ربنا يحميكوا ويخلى لكم عمر يارب اللهم اميييييييين

Mafrousa said...

ماشا الله
الله اكبر عليكم
ربنا يبعد عنكم الشيطان و يخليكوا لبعض
و يهنيكم و يسعدكم يارب

البوست جميل
و الاجمل منه انى استشعرت صدق الكلمات
يعنى مش كلام وبس
ربنا يجعل بيتكم دايما مليان بالحب
و البيت اللى بيبقى مليان حب بتصغر قدامه اكبر المشاكل

الله اكبر عليكم مرة تانية
علقوا خرزة زرقا على البوست
ولا اقولك خمسة و خميسة
تحياتي

فاتيما said...

اعيط ؟؟!!


متهيألى دا الوقت
و المكان
و الموقف المناسب
اللى اعيط فيه و انا مطمنة
و مبسوطة
و حاسة ان دموعى
ليها قيمة


يا خراااشى عليكم
و على جمالكم


ربنا يخليكم لبعض
يا وليد



تعرف ؟؟



قصة حبكم دى
نموذج بالنسبالى
محسسنى ان المشاعر الحقيقة
موجودة
و قادرة تتجسد فى شكل أشخاص
من لحم و دم
مش بس شخوص ف التاريخ
و قصص و روايات
او اشعار معرفش اصحابها



انتوا حكاية
لمساها و حساها
و لما قلبى بيدق كل يوم
بفتكركم
و اطمن روحى
ان ممكن يكون فيه حد
شبه كدا
و ناس تانية
شبه كدا
و لما اتخض شوية و اخاف ..اقول لأ
فيه قلوب كدا و فيه مشاعر كدا
و ارجع اطمن تانى

صحيح
مش زيكم
انتوا اصلكم
ملكوش زى


بس حاجة
شبههكم

ممكن تتواجد ف الحياة
من غير ما تبقى عجبة
او مثار دهشة
او حتى استنكار

بالعكس

مثار اعجاب
و انبهار
لأنها كل يوم بتاكد صدقها
و ضفافيتها
و نقاءها النادر ف الدنيا دى
و لأنها إستثناء
فلأسف بتأكد القادعة العامة
ان مفيش كدا


لأ
فيه كدا
و انتوا كدا
و اجمل كدا ف الدنيااااااااا



ربنا يخليكم لبعض
و لعمر بيكا
و لمن سيأتون فى علم الغيب
عشان يكبروا قصة الحب دى
اكتر و اكتر
يا رب

كل سنة و انتوا حبايب
لحد العالم ما يخلص

و تكونلك بوبو الصحبة
و الرفقة
و الونس
كمان ف الجنة
زى ما هى ملاكك الحارس ف الدنيا


ان شاء الله

بحبكم قووووووووى
و ربنا عالم ما ف القلوب

بوسات لهبة
و حضونات لعمر

و الف باقة ورد ليك
يا راعى الملك من اختكم فاتيما
اللى بتعتز بمعرفتكم
فوق الوصف

Baskouta said...

الله على كدة
كل سنة وانتوا طيبين وفي الحب متهنين
ودايما سوا والحب منور دنيتكم ومدفي قلوبكم
كل عيد حب وانتي طيبة يا بوبو

تحياتي لحضرتك ولبوبو ولعمر

تحيات بسكوتية

Remas said...

كل عيد حب وانتو طيبين

ربنا يخليكم لبعض يارب
وبجد انا بفرح اوى بيكم
والبوست دا بالذات يجنن صادق اوى وعسول

ماشاء الله عليكم ربنا يبعد عنكم عيون الناس

ميرا ( وومن ) said...

بسم الله ما شاء الله

الله أكبر عليكم
ربنا يخليكم لبعض يارب

انا هاروح اقعد في حضن فايتما وأعيط

انا أصلي مش بستحمل المشاعر الرقيقة المهفهفة دي

ربنا يكرمكم ويحفظكم لبعض

سواحة said...

بقالى يومين بدورلى على عيد :-)
حلو العيد ده بس ده عيد خصوصى ملناش احنا فيه
بس ميمنعش نغلس و نقول :-)
كل سنة و انتم حبوبين و مع بعض حلوين ليوم الدين ويقيكم و يرقيكم من العين

مجرد بنت said...

كل سنة وانتم طبيبين
وفى الحب غرقانين
وبالسعادة متهنيين
وزى الطيور مرفرفين

هوبتي said...

بجد الف الف الف الف مبرووووووووك
وانا عايزه اقولك ان ربنا يحميكم يارب ويخليكو لبعض ونفشل كل سنة نحتفل معاكم

شمس النهار said...

كل سنة وانتم طيبين

وتعيشوا مع بعض في خير وهنا وسعادة

ويدوم حبكم الي الابد

ويكفيكم شر العين

:))

سلامي

Anonymous said...

حرام عليك يا وليد فكرتنى بأيام مفيش أحلى منها بجد

وده بالأضافة الى قصتك أنت وهبه اللى أنا شايفاها أروع قصة فى الوجود واللى ممكن يتكتب عنها كتير قوووووووووووووووى

ويمكن أنا ماكنتش معاكم فى اليوم ده بس من ساعة ما بقيت معاكم وحاجات كتيرة قوى أتغيرت للأحسن

ربنا يخليكم لبعض

bosbos
بسمه عبدالباسط

KING TOOOT said...

sony2000
اللهم آمين
أشكرك على الدعوات الجميلة
_________________
ندى الياسمين
ربنا يخليكي يا فندم
وسلامي إلى فارسك النبيل
_________________
Ms Venus
أشكرك جدا علبى تعليقك الرقيق
نورتيني
_________________
حفيدة عرابي
آمين يا رب
أشكرك جدا
_________________
زهراء
100 سنة بس ؟! دا أنتي بخيله قوي
قولي مليون
مليار
بأختصار كده
العمر كله دنيا و آخره نكون أنا و هي مع بعض
أشكرك جدا على تعليقك
وأشكرك أكثر على دعواتك الصادقة
_________________
manona
مايحمكيش من حاسدين ولا غيرة
إحنا و الحمد لله مابينفعش معانا العينين المدورة
سعيد جدا بتعليقك الجميل
_________________
واحدة مفروسة
خرزة زرقاء و خمسة و خميسة ؟! يا خبر أبيض
كل ده علشان إثنين بيحبوا بعض
هو الحب بقى عملة نادرة للدرجة دي
حاضر يا فندم
نعلق
مع إن الحسد مابينفعش معانا خالص
أصل قلوبنا صادقة قوي في مشاعرها
نورتيني
_________________
فاتيما
.
.
و تكونلك بوبو الصحبة
و الرفقة
و الونس
كمان ف الجنة
زى ما هى ملاكك الحارس ف الدنيا

.
.
المقطع ده من تعليقك مش قادر أقول لك خلاني من جوايا عامل إزاي
بأتمناه بجد
وكل حاجة بأعملها كويسة أو فيها شيء يقرب ني من الجنة بيكون ده سبب أساسي فيه
نفسي أدخل معاها الجنة
( بإعتبار إنها داخله داخله يعني ) لأن أكبر ذنب هي بتعمله إنها تقول للتلاميذ في الفصل "ياغجر" فبيتهيألي كده مايعتبرش حاجة يعني
ههههههههههههههههههههه
طبعا كله في علم الله
وربنا سبحانه و تعالى أعلم
بس أنا بجد بأتمنى إننا نكون أنا و هي مع بعض في الجنة
على فكرة يا فاتيما
إنتي كمان بالنسبة لنا نموزج نادر من لحم و دم على حب الناس و حب الخير
ربنا يديم عليكي نعمة المحبة
قولي آمين
_________________
baskouta
أشكرك جدا على دعواتك الجميلة
وتعليقك الرقيق
_________________
reem
أشكرك جدا يا ريم
نورتي مدونتي
_________________
ميرا ( وومن ) ا
هو إيه موضوع العياط ده
هو إنتوا تزعلوا تعيطو
تفرحوا تعيطوا
؟؟
عموما لو دموع فرح مافيش مانع
تحياتي
_________________
Wanda
يا ستي العيد عيدكم
وأهلا بيكم في كل أعيادنا الخصوصية
_________________
مجرد بنت
آه
دا أنا عندي منافسين في الشعر أهه
نورتيني و سعيد جدا بكلماتك
_________________
هبة الحياة
أشكرك جدا على تعليقك الجميل
تقديري
_________________
شمس النهار
اللهم آمين
ويارب تكون أبواب السما مفتوحة
_________________
bosbos
إنتي فين يا بنتي
إنتي ليكي معايا حساب عسييييير
مدونتك فين ؟
كلامك فين ؟
إنتي نفسك فين ؟
ماينفعش الخناق هنا
مستنيين مكالمة خصوصي نعرف فيها آخر أخبارك
ومش أنا إللي حاأتصل
أنا أخوكي الكبير
يعني إنتي إللي لازم تتصلي بيا
إشتري كارت بعشرة و أطلبيني وبلاش بخل
ههههههههههههههههههههههه
طمينينا عليكي بجد
تليفونك على طول مقفول على فكرة
__________________
KING TOOOT

محمد فؤاد (صاحب عمود النور) said...

كل سنه وانتوا طيبين
وكل سنه وانتوا فارحنين ويارب يتمها عليكوا نعمه وتفضلوا طول العمر تحبوا بعض

Anonymous said...

بنت مصر
شات بنت مصر
دردشة بنت مصر
دردشة مصرية
شات مصري
شات بنات مصر
شات
دردشة
بنات مصر
دليل بنت مصر
بنت مصر
شات بنت مصر
دردشة بنت مصر
العاب بنت مصر
فيديو بنت مصر
يوتيوب بنت مصر
جوال بنت مصر
موبايل بنت مصر
توبيكات بنت مصر
مطبخ بنت مصر
ازياء بنت مصر
الموضة بنت مصر
ماسنجر بنت مصر
صور بنت مصر
دردشة بنت مصر الكتابية
بنت مصر
دردشة كتابية مصرية
شات بنت مصر الكتابي
شات بنت مصر
دردشة بنت مصر
دردشة بنت مصر الصوتية
بنت مصر
شات بنت مصر الصوتي
دردشة بنت مصر
شات بنت مصر
دردشة صوتية مصرية
شات الحب