زي زمان

لمّا كنت في رابعة إبتدائي

كان معايا في الفصل طالب لطيف جدا ً

إسمة محمد أحمد صالح

و كان بالنسبة للمدرسين يعتبر طالب مثالي

أدب ، أخلاق ، شطارة في كل المواد ، حضور منتظم

و لأن مدرستنا كانت مشتركة و كان معانا بنات في الفصل

فبالنسبة للبنات كمان ، كان فتى أحلام كل بنات الفصل

وسيم و جسمه رياضي لأنه بيلعب سباحة في نادي الزمالك

و بالنسبة لينا إحنا كمان – أقصد الأولاد – كان محمد محبوب جدا ً

ظريف و كريم و صاحب صاحبه و مش أناني في الكورة

فضلت أنا و محمد أحمد صالح مع بعض في الفصل

سنة رابعة أول

و خامسة أول

وفي السنتين دول نشأت بيني و بينه صداقة قوية جداً

كنا مع بعض في الفصل و الحوش و الكانتين و أتوبيس المدرسة

يعني في كل مكان تقريباً

وفي سنة سادسة إبتدائي عرفنا في أول يوم في الدراسة

إن محمد أحمد صالح

سافر

يمكن ساعتها ما كنتش فاهم قوي

ولا مقدّر أن شخص كنت معاه طول الوقت

خلاص مش حاأشوفه تاني

لكني كنت حاسس إني فقدت حاجة مهمة قوي في حياتي

وحسيت إني عايز أشوفه

وأحكي معاه زي عادتنا

ومرت السنين

وسيبت المدرسة ورحت مدرسة تانية

وبعدها الجامعة

وفي يوم من الأيام قابلت بالصدفة

واحد كان جاري و كان معانا في المدرسة في إبتدائي

وعرفت منه إنه بعد ماخلص جيش سافر

وعرفت منه إنه قابل هناك بالصدفة

محمد أحمد صالح

وإنه بيقابله من وقت للثاني

أتجدد جوايا الإحساس إني أشوفه

وأحكي معاه زي زمان

و مرت سنين تانية ، وكنت بأحضر فرح واحد زميلنا

وهناك قابلت صديقي إللي مسافر

وإللي كنت قابلته قبل كده

وسألته على محمد

وعرفت منه إن محمد إتجوز وعنده بنوته أمورة إسمها حبيبة

وأخذت منه بريده الإلكتروني علشان أراسله

لكن البريد طلع غلط

وفضل جوايا إحساس بالحنين للماضي

وإني أشوفه وأحكي معاه زي زمان

وفضلت أتابع أخبار محمد من وقت للتاني

لغاية النهاردة

عرفت إن

محمد أحمد صالح

أتوفى

مش بمرض ، ولا حادثة ، ولا حاجة

نام و بس

إتصدمت

وحسيت كأني لسه طفل في سادسة إبتدائي

وأنا بأسأل سواق أتوبيس المدرسة عنه

وهو بيقول لي إنه " خلاص " سافر

وحسيت إني حيران

النهاردة كمان حسيت إني حيران

مع إني ماشوفتوش من سنين طويلة

بس حسيت إني عايز أشوفه

وأحكي معاه زي زمان