Pages

زي زمان


لمّا كنت في رابعة إبتدائي

كان معايا في الفصل طالب لطيف جدا ً

إسمة محمد أحمد صالح

و كان بالنسبة للمدرسين يعتبر طالب مثالي

أدب ، أخلاق ، شطارة في كل المواد ، حضور منتظم

و لأن مدرستنا كانت مشتركة و كان معانا بنات في الفصل

فبالنسبة للبنات كمان ، كان فتى أحلام كل بنات الفصل

وسيم و جسمه رياضي لأنه بيلعب سباحة في نادي الزمالك

و بالنسبة لينا إحنا كمان – أقصد الأولاد – كان محمد محبوب جدا ً

ظريف و كريم و صاحب صاحبه و مش أناني في الكورة

فضلت أنا و محمد أحمد صالح مع بعض في الفصل

سنة رابعة أول

و خامسة أول

وفي السنتين دول نشأت بيني و بينه صداقة قوية جداً

كنا مع بعض في الفصل و الحوش و الكانتين و أتوبيس المدرسة

يعني في كل مكان تقريباً

وفي سنة سادسة إبتدائي عرفنا في أول يوم في الدراسة

إن محمد أحمد صالح

سافر

يمكن ساعتها ما كنتش فاهم قوي

ولا مقدّر أن شخص كنت معاه طول الوقت

خلاص مش حاأشوفه تاني

لكني كنت حاسس إني فقدت حاجة مهمة قوي في حياتي

وحسيت إني عايز أشوفه

وأحكي معاه زي عادتنا

ومرت السنين

وسيبت المدرسة ورحت مدرسة تانية

وبعدها الجامعة

وفي يوم من الأيام قابلت بالصدفة

واحد كان جاري و كان معانا في المدرسة في إبتدائي

وعرفت منه إنه بعد ماخلص جيش سافر

وعرفت منه إنه قابل هناك بالصدفة

محمد أحمد صالح

وإنه بيقابله من وقت للثاني

أتجدد جوايا الإحساس إني أشوفه

وأحكي معاه زي زمان

و مرت سنين تانية ، وكنت بأحضر فرح واحد زميلنا

وهناك قابلت صديقي إللي مسافر

وإللي كنت قابلته قبل كده

وسألته على محمد

وعرفت منه إن محمد إتجوز وعنده بنوته أمورة إسمها حبيبة

وأخذت منه بريده الإلكتروني علشان أراسله

لكن البريد طلع غلط

وفضل جوايا إحساس بالحنين للماضي

وإني أشوفه وأحكي معاه زي زمان

وفضلت أتابع أخبار محمد من وقت للتاني

لغاية النهاردة

عرفت إن

محمد أحمد صالح

أتوفى

مش بمرض ، ولا حادثة ، ولا حاجة

نام و بس

إتصدمت

وحسيت كأني لسه طفل في سادسة إبتدائي

وأنا بأسأل سواق أتوبيس المدرسة عنه

وهو بيقول لي إنه " خلاص " سافر

وحسيت إني حيران

النهاردة كمان حسيت إني حيران

مع إني ماشوفتوش من سنين طويلة

بس حسيت إني عايز أشوفه

وأحكي معاه زي زمان


8 comments:

بسمه عبدالباسط said...

مش عارفة لية من أول سطر وكنت حاسة أنى هلاقى مفاجأة فى الآخر
ولاقيتها فعلا
ربنا يرحمه

ولكن هيا دى الدنيا بجد

عارف من كام يوم بس عرفت من صديقة ليا أن صديقة ليها وفى نفس سننا كده ومتجوزة وعندها بنوته لسة 5 شهور
ماتت

مش عارفة إيه علاقة الكلام ده كله ببعضه
ولكن فى النهاية هيا دى الدنيا
لقاء وفراق

... said...

الله يرحمه
المشكلة انه كان دايما جواك احساس انك عايز تشوفه
وان دة ممكن لانه بس مسافر
تعرف
احسن انك ما قابلتوش قريب
كدة هيفضل جواك زي زمان
مسافر

أميرة علي كوكب مهجور said...

ياربنا
سبحان الله انت عايز تشوفه وجالي ع بالك
وسبحان الله لما تحاول تشوفه هيسافر تاني من غير ما يحدد هيرجع امتي المرة دي سفر من غير رجوع

ربنا يرحمه

KING TOOOT said...

bos bos
فعلا يا بسمة ، هي دي الدنيا ، لقاء و فراق
كالعادة ، عندك قدرة تختصري كلام كتير في جملة واحدة مركزة
لقاء و فراق
تحياتي
____________________
Bothayna
يمكن فعلاً يفضل جوايا مسافر زي زمان
بس الغريب إني ماأعرفوش غير طفل
صورته جوايا وهو طفل
مش عارف إزاي واحد يكبر و يفضل جواه حنين لشخص آخر و الشخص ده يفضل في خياله طفل زي ماهو
كأن مافيش سنين عدت
نورتيني و شرفتي مدونتي
____________________
أميرة على كوكب مهجور
كل مرة كنت بأقول في نفسي أكيد حانتقابل في يوم من الأيام ، الصدمة بقى جت من أني ماأقدرش أقول الجملة دي المرة دي
خالص مودتي
____________________
KING TOOOT

د.سمر said...

بكيتني

:(

الله يرحمه ويغفرله ..ويجمعك به قريب

أنا اتوقعت تكون النهاية انك تشوفه وتنصدم إنه محمد احمد صالح اللي تعرفه هو زي ماهو بس ماتقدروا ترجعوا زي زمان

KING TOOOT said...

د.سمر
تحياتي و شكري على تعليقك الرقيق ،، وإن كنت بالفعل بعد وفاته لا أتمنى أن يجمعني الله به " قريباًً " كما كتبت أنتي
عموماً ،، الأعمار بيد الله تعالى
خالص مودتي وتقديري
KING TOOOT

صبرني يارب said...

الله يرحمه

ده محطات يا فندم كل واحد معاه تذكرته وهاينزل فى محطته

مش محتاجين اسباب ولا غيره

كلنا مفارقين وكلنا رايحين

KING TOOOT said...

صبرني يا رب
عندك حق
كلنا مفارقين .. مافيش حد خالد
ربنا يرحمه ويرحمنا جميعا
تحياتي
___________________
KING TOOOT