معلش يا جيمي خيرها في غيرها
معرفتش تبقى أنت أميرها
ولا تبقى رئيس و تضيّعني
و تاخدني حبيس و تجوّعني
هو أنت يا جيمي عاجبك يعني
رجّالة بابا و عمايلها
معلش يا جيمي خيرها في غيرها
معرفتش تبقى أنت أميرها
معلش يا جيمي بقى عدّيها
ماهو أبوك كان خانق أهاليها
وإن حد في يوم نوّر فيها
ييجي أبوك طالع و ينيّلها
معلش يا جيمي خيرها في غيرها
ماعرفتش تبقى أنت أميرها
من نظرة عينك كارهينك
مهما حاتتجمّل فاقسينك
طاب قول لنا كده و حيات دينك
أموالنا الضايعة إيه مصيرها
معلش يا جيمي خيرها في غيرها
ماعرفتش تبقى أنت أميرها
سيبك انت يا واد م الحركات دي
من يومك كده واقف ضدي
علشان مارضتش اعمل خدّي
لمداسك قنطرة على نيلها
معلش يا جيمي خيرها في غيرها
ماعرفتش تبقى أنت أميرها
إوعاك يوم تاخد على خاطرك
وإستعبر بقى م إللي حصل لك
صدّقني جرايمك أوفر لك
في الدنيا تدفع فواتيرها
معلش يا جيمي خيرها في غيرها
ماعرفتش نبقى أنت أميرها
معلش يا جيمي و حياة بابا
العاشق للظلم صبابة
عارفينها دموعك كذّابة
فبلاش تحتمي ورا تأثيرها
معلش يا جيمي خيرها في غيرها
ماعرفتش تبقى أنت أميرها
حضّر ماكنة في شنطة و فوطة
لمحاكمة سليمة و مظبوطة
من ثورة بريئة صغنطوطة
بس بتملى الكون بضميرها
معلش يا جيمي خيرها في غيرها
ماعرفتش تبقى أنت أميرها
.jfif)
.jpg)
5 comments:
انا عاوزة اعمل ثورة ف البلوجر
واعمل قايمة مطالب
يجب الإسراع ف تنفيذها
يحطولنا امكانية انى اصفر
واسقف
وكلام ياخد كلام بالحضن
واحدف صواريخ ف سما البوست
أصله كدا مينفعش
لما ينكتب الكلام دا
أى حاجة تنقال بعده
متنفعش
تحفففففففففففة يا وليد
بجد ..تنفع غنوة وتقليسة
عارفو انا بقراها
متهيألى انى نامية وحد ييجى يصحينى
يااااااااااه
معقولة
من شهر ونص يادوب
الناس كلها كان املها ضايع
وهوه كابس عليها و مترستق
مين يقول كدا ؟!!
مين يتخيل ان الكلام يبقى حقيقة
والكابوس ينزاح
ويبقى سراب للطاغى
وحق مبين للشعب
يسلم لسانك وقلمك وقلبك
انا فرحاااااااانة جدا بمجييكم امبارح وهيفضل اليوم دا ف ذاكرتى وانتوا جزء منه
جزء حلووووووو وجميل
بوسلى بوبو الجميلة
وعقلة صباع الثورة
المناضل .... عمر بيكا
:)
كلام في الجون
بس ربنا يقتص منه ومن كل الشلة
ياعيني لما دماغ الكبير تمخمخ كدا
بتطلع احلي كلام صح:)
انتا من الاحرار ياعلي
رائعة جدا جدا فى تعبيراتها موسيقتها
وكمان أنها عكس كل اللى أتكتب ليه أو لمابرك أنها مافيهاش ألفاظ خارجة.
جميلة
بس الغريبة أن لسة فى ناس متعاطفة معاه ، وبتقول نديله فرصة !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
فاتيما
كل الصفافير
والتسقيف وصل
وكل الكلام حضن كل الكلام
والصواريخ نورت سما البوست و غرقته نوريا ستي
ولا تزعلي ولا تعملي ثورة ولا حاجة
ههههههههههههههه
أنا بقى كنت مصدّق من يوم 25 إن كل ده حايحصل و أكتر
مبروك علينا بلدنا
وهو بقى خيرها في غيرها
___________________
شمس النهار
يمهل ولا يهمل
ربنا عادل و أكيد مش حايسيب حق الشعب يضيع
تحياتي
___________________
sony2000
أحرار إيه بقى ما راحت عليهم
مع إني بأحبهم جدا
بس ثورتنا أحلى
نورتي المدونة واللقاء التدويني و بنك الدم
___________________
candy
الناس دي يروحوا معاه شرم الشيخ أو يخلّوه يشتري جزيرة في المحيط يحكمها و هما يعيشوا معاه فيها
تحياتي و تقديري
___________________
KING TOOOT
Post a Comment