آه يا عم شفيق

أه يا عم شفيق

يا وسيم

يارقيق

يا أبو ضحكة بتضحك ع المخاليق

يا أبو شكل جنان

وجمال فتّان

و عَضَل ماتقولشي فشر بات مان

ولسان سوليفان

غرّقنا حنان

ووعوده صعبة على التصديق

مش قلت خلاص

حانعيش إخلاص

وحانشرب من نفس البلاّص

ولاقينا مافيش

ولا باب ولا شيش

لاشقق ولا شُغله ولا تَفريق

بس إستمارات

تحصيل دمغات

وطوابع ملزوقة للتزويق

وكمان وزارات

سبتها بالذات

على نفس حالتها من التلفيق

جرى إيه يا كبير

مابلاش تسبيل

الناس بتطالبك بالتغيير

علشان عارفين

إن إنت كهين

ولا تفرق حاجة عن التانيين

ماهي نفس الملّة

ونفس العلّة

ونفس الشلّه

ونفس الطين

ماهو نفس الشكل

ونفس الأكل

ونفس البوز

أبو سن طخين

إسمعها نصيحة

صريحة مريحة

بدل ما نقول لك

كلمة أبيحة

إخلع بالذوق

و إنزل من فوق

وبلاش نتكلم عالخوازيق