إفتح الشباُاك في اوضتك
وإبتسم وأفرح و طير
خلّي قلبك هو عرشك
تبقى بيه أجمل أمير
سيّب حنان الكون يضمّك
أوعى تسمح شيء يغُمّك
وإبقى طيب زي أمك
وإملا روحك بالضمير
إفتح الشبّاك في أوضتك
وإبتسم وأفرح و طير
خلّي آخر الكون ده حلمك
وإبقى سيد الناس بعلمك
الفاروق على إسمه إسمك
هو نورك والسبيل
إفتح الشبّاك في أوضتك
وإبتسم وإفرح وطير
صلّي و أسجد وإرضي ربّك
هو فيه مين قدّه حبّك ؟
والإيمان حايقوّي قلبك
والنبي هو الدليل
إفتح الشبّاك في أوضتك
وإبتسم وإفرح و طير
إبقى وسط الصحبة نور
وإوعى ياأبني من الغرور
أصله داء كل الشرور
للغني أو للفقير
إفتح الشبّاك في أوضتك
وإبتسم وإفرح وطير
خير بلدنا مالوهش حصر
ماأنت يا أبني إبن أصل
أصل بلدك هي مصر
إلّي فيها الخير كتير
إفتح الشبّاك في أوضتك
وإبتسم وإفرح و طير
خلّي قلبك هو عرشك
تبقى بيه أجمل أمير
.jfif)
.jpg)
13 comments:
العصفور الصغنون بتاعنا
هيسمع كلامك يا وليد
و يصحى و يفتح شباكه
و ينور عليكم بنوره
يا حبيبى عمر عسولة
حتى و هوه نايم
تعرف ؟
انا كنت بحب ابص على يوسف و هوه نايم قوى
متفهمش ليه؟
شكلهم بيبقى جميل قوى
و رقيق قوى
و برىء قوى
مفيش ف الدنيا منظر اجمل من كدا
ربنا يحرس عمورة يا رب
و يخليكم ليه يا وليد انت و هبة
كلام القلب و الضمير منبعه
اجمل منه الاحساس الى مغلفه
:-)))
ربنا يخليهولكم و ينورلكم بيه دنيتكم
اولا حمدا لله على سلامه عمر
تاثرت جدا بهذه القصيده
جعلتنى اتمنى ان يكون لى ابنا
ان استمتع بمشاعر الابوه
جميله جدا
والف حمدا لله على السلامه
وربنا يخلى لك عمر وتفرح بيه وتجوزه ومتنساش قصيده زى دى بقى قبل الفرح على طول
تحياتى لك وللاسره الكريمه
جميل اوي البوست ده
ربنا يباركلك في عمر وينور دنيتكم كلكم
تحياتي البسكوتية
الله عليك
جميلة اووووووووووووووووى
اووووووووووووووووووووى
اوووووووووووووووووووووووووى
كلها تفاؤل كدا
ربنا يباركلك فى عمر
ومبروك المسابقة :)
ان شاء الله هحضر الحفل يوم الجمعة
تحياتى يا شاعرنا الهمام
شاب فقرى
الف مبروك على الفوز في المسابقة
دايما يارب من نجاح لنجاح
وجميلة ابياتك لعمورة جدا
ربنا يسعد قلوبكم يارب
يعنى اعمل ايه دلوقتي
اتفرج على عمر وهو نايم ولا اقرا الكلام الجميل الى باباه كاتبهوله
كده يا استاذ وليد هاخليك تتبناني مش معقول كده
ههههههههههههههههه
مبرووووووك على الفوز والنشر ويارب دايما فى نجاح
وبوسلي عمر
البوست هايل بجد
ربنا يسعدك دايما يا أستاذ وليد
وليد
الشاعر المبدع
ابيات رائعة من الشعر تدعو لحب الحياة والاستمتاع بها
كلمات جميلة تحتوى الحكمة وتدعى للعلم واليمان وتنتهى بحب مصر
بجد شاملة ورائعة
تحياتى لقلمك
فاتيما
الحقيقة هو مش دايما بيسمع الكلام يعني
أصلة عنده شخصية مستقلة
عيّل دماااااغ ع الآخر
فعلا شكلهم وهما نايمين بيبقى حاجة تانية
ربنا يكرمك عن قريب إن شاء الله بالنظر لوجه يوسف وهو نايم
وهو صاحي كمان
___________________
Wanda
آمييييييييييييين
نورتي مدونتي وسعيد بتعليقك جدا
خالص تحياتي
___________________
رحلة البحث
إحساس الأبوة هو فعلا أجمل إحساس في الدنيا بالنسبة للراجل
مش بس علشان بتحس إن إبنك ده إمتداد ليك
لكن كمان لأن الأبن الصغير ده بيديك حنان من نوع خاص جدا
نورت المدونة
____________________
Baskouta
أشكرك على التعليق الرقيق ده
خالص تقديري
____________________
شاب فقري
الله يبارك فيك
إنتظرتك بس إنت ماجتش الحفلة
كان نفسي أقابلك وأقعد معاك
معلش خيرها في غيرها
_____________________
ستيتة
نورتي المدونة يا دكتورة وبجد كان نفسنا نشوفك يوم الحفلة
بس تتعوض إن شاء الله
_____________________
صبرني يا رب
إنتي تعملي إللي أنتي عايزاه
إنتي عندنا أنا و بوبو حاجة كبيرة جدا
ومعاكي كل الصلاحيات
سلامي لكي
ولزوجك العزيز
ربنا يكرمكوا و يبارك لكوا في أولادكم
_____________________
Mohammed
شكرا على المرور الكريم
_____________________
mohamed ghalia
أشكرك جدا على مرورك
وتشجيعك
وتعليقك
وكل حاجة
نورت المدونة
_____________________
القدر و أنا
أنا سعيد جدا بتحليلك للقصيدة بالشكل الهايل ده
والحقيقة هو الترتيب ده ماكانش مقصود ، لكنها جت كده زي ما بيقولوا
خالص تحياتي وترحيبي
_____________________
KING TOOOT
تحففففففففففففففففففففففففففففة بجد
انا اول مرة ادخل هنا بس بجد ان شاء الله مش هتكون اول مرة
ربنا يحميه يارب ويبارك فيه
ويحميكم كلكم ويبارك فيكم وما تنحرموش من بعض ابداً
سمو الأميرة سارة
نورتي مدونتي المتواضعة
بتعليقك الجميل
ودعواتك الصادقة
خالص تقديري و إحترامي
____________________
KING TOOOT
الله عيني دمعت وانا بقرا وبما ان معنديش حد اقوله الكلام ده فأنا حقوله لنفسي اعتبروني زي عمر او ابتنوني مافيش مشكلة
:D
Post a Comment