تليفون البيت
على صوت رنّاته
ياما فرحت
وياما بكيت
وياما سرقت في نص الليل
ضحكة حكياته
وياما كتمت في قلبي آهاته
ولما في يوم قلت انا حبيت
علشان مكسوف
وحأموت مالخوف
قلتها كلمة في تليفون البيت
أرفع سمّاعته
ألاقي إصحاب
وأرفع سمّاعته
ألاقي عتاب
وأرفع سمّاعته
ألاقي مصير
ومشاعر دايبه في الأحباب
وألاقي كلام و حكاوي كتير
وأسمع أنفاس صمت التفكير
وألاقي تهاني عشان خفّيت
وأرّد ألاقي عزول شرير
وأشتم نفسي علشان ردّيت
وألقاني لصوت رنّاته أسير
و ليالي كتير ياما إستنيت
أخبار على صوت تليفون البيت
دلوقتي خلاص
تليفون البيت الطيب جدا
مش موجود في بيوت الناس
ومافيش أجراس
ومافيش لا زراير ولا أقراص
و مافيش
تررن تررن
في البيت
.jfif)
.jpg)
12 comments:
فقدنا تليفون البيت وبقى وجوده زي عدمه
تحياتي لقلمك الفريد من نوعه
:-)))))))))))))))))))))))
فكرتنى بماقبل وجوده
اصلا
هو موجود بس كل كام سنة يزيد عليه تليفون محمول يزقه على جنب
بس لازال هو الاكيد الثابت
(مش بعمل دعاية للمصرية متخفش :-)) دانا ساعات بدعى عليهم )
فكرتنى بوالدى الله يمسيه بالخير (قاعد يتفرج علىالاخبار علشان يقول نتيجة مبارة الجزائر النهارده)
يتصل بالناس و لما يحب يعاتبهم يقولهم عارفين اغنيةعلى الحجار عنوان بيتنا زى ماكان انا بقى ياعزيزى العنوان و التلفون زى ماكان بس انت نسيت العنوان :-))و النمرة و انا بتصل بيك افكرك :-))
صحيح
السنة دى لما نزلت و خلصت مشاوير اوراق و مصالح
كل مايسالونى نمرة المحمول اقولهم دى مش مضمونة خذوا نمرة البيت اضمن
يبصولى كانى جاية من العصر الحجرى :-))))))))) دلوقتى فهمت
لو قلت لك اني مش بحب رنة تليفون البيت
ولا بقيت بحب رنة أي تليفون
تحلل ده إزاي؟
ولو قلت لك إنه ممكن يرن وأبص له ومردش ومش عاوزة أرد كمان
ماهو ها يجيب خبر حلو
وعشرين خبر من بتوع كيد العوازل
عجبني قوي قوي اللي كتبته
وبيعجبني انك تقدر تصيغ أي فكرة بسيطة في طريقة شعرية ليها معنى وفعلا عميقة
تحياتي
الحقيقة علاقتى بالتليفونات عموماً بقت سيئة للغاية :)) و يبدو انى مع (ستيتة حسب الله الحمش ) فى نفس المستوى .... يمكن لأن رنة التليفون هيا إعلان بمجهول و يمكن لأن الحاجات الحلوة بتتعمل مش بتتقال و يمكن لأننا مبقناش نروح البيت كتير قل ارتباطنا بالحاجات اللى فيه ،، ساعات بتمنى ترجع و سائل الاتصالات زى زمااان ،،،، اللى عاوز يسلم على حد يتعب و يبقى ليها طعم لما يزوره أو حتى يبعت له جواب بدل الرنة المزعجة اللى ممكن تجيله و هو نايم أو بيشرب شاى أو بيفكر أو سايق أو أى حاجة ،، علشان كده بفضل الايميلات فى التواصل بحس انها اشيك كتيير ،،،، لكن فى النهاية اللى يقدر يكون شاعر و سط الضوضاء اللى عايشينها أكيد هيشوف كل حاجة حلوة زى روحه الجميلة
نسلم عينك و روحك وقلمك
و دمتَ بكل الخير و الحب و السعادة
تقديرى
Unique
أشكرك على تعليقك الرقيق
وسعيد بزيارتك لمدونتي جدا
تحياتي
_______________________
Wanda
هو خلاص ماباقاش موجود
يمكن السبب إنه ثابت ، و طبعا حايختل زي كل الثوابت إلّي إختلت في حياتنا
إشمعنا هو يعني مش حايختل و يختفي
خالص تقديري لتعليقك المميز
_______________________
ستينه حسب الله الحمش
يا دكتورة التليفون مالوش دعوة بالأخبار ، هي الأخبار إللي بقت مش ولابد
التليفون الغلبان ده مالو بس
أنا إلّي قاهرني عليه ، إننا زمان إستنيناه تسع سنين بالدور لغاية ما ركب ، ويوم ما ركب كان يوم مميز جدا في حياتنا ، وأمي قعدت تتصل بكل معارفنا علشان تقول لهم النمرة و تعرفهم إننا إنتقلنا لشريحة أصحاب التليفونات
دلوقت إتلزق على قفاه من محمول قد ركبته
بالزمة مش حاجة تحزن
أشكرك على رأيك في ما أكتب أو أصيغ
خالص مودتي و تقديري
__________________________
أحمد عبد العدل
صديقي المزوغ من الإجتماع إلّي فات و ماجاش
كان نفسي أشوفك جدا في إجتماع نادي الزراعيين بس ماليش نصيب
شوف ،، إنت رأيك صح جدا ، وسائل الإتصال الحديثة قضت على الحميمية و الود المباشر بين الناس و خلّت القلوب أصبحت قاسية جدا
لأننا بنتعامل مع بعض حاليا من ورا شاشات
شاشة كمبيوتر أو شاشة موبايل أو شاشة تليفزيون
عندك حق في كل ما قلت
وأشكرك على مجاملتك الجميلة
وأشوفك على خير قريبا إن شاء الله
_________________________
KING TOOOT
وليد
انا أتصلت بهبه أمبارح الضهر علشان أحاول أشوفكم لأنى كنت فى مصر وهيا ما ردتش عليا كان نفسى أشوفكم بجد
على العموم المرة الجاية هعرفكم من قبلها بيوووووووم
دلوقتي بقت رسااااااااااائل
ورنات
سلامي
بسمة عبد الباسط
يعني أخنقك يا بسمة و أخلص منك ؟ يعني تبقي في القاهرة وماتعديش تشوفي أخوكي الكبير و مرات أخوكي الكبير و أبن أخوكي الكبير
هبة عايزة تشوفك جدا ووحشتيها قوي و عمر و أنا كمان
حانعديها المرة دي بس بعد كده ، الغياب بالخصم
هههههههههههههه
سلامي للعائلة الكريمة
إنما ليكي إنتي لأ
ههههههههههههههههههه
______________________
KING TOOOT
شمس النهار
ماهو ده إللي قاهرني ، الأمور كلها أصبحت مجرد أصوات و أشكال على شاشات
خالص تحياتي
__________________
KING TOOOT
تخنقنى ليه وأنا ذنبى إييييييييييه
يا ماااااااااماااااااااا
ههههههههههههههه
والله ماكنت محددة انى هاجى كنت سايباها للظروف ولما وصلت أتصلت بهبه قلت ممكن اقدر اشوفكم فى اى مكان بس هيا ماردتش
ان شاء الله أحتمال السبت الجاى اجى تانى هبقى أعرفكم أكييييييييييد
وأنتوا كمان كلكم وحشتوووووونى قوووووووى قووووووووووووى
ان شاء الله أقدر أشوفكم الاسبوع الجاى
بسمة عبد الباسط
الأسبوع الجاي مش بعيد
وحانشوف كلامك المرة دي حايكون جد ولا زي كل مرة، مدهون بزبدة
هههههههههههه
تحياتي
_________________
KING TOOOT
الله احسنت
فعلا اختفى تليفون البيت نهائى بشكله القديم وبصوت جرسة المميز وبقى مكانه موبيلات ونغمات
بجد استمتعت بكلامك جدااااااا
Post a Comment