Pages

بس عشقي خدني عندك

كنتي جاية من بعيد

حاضنة شنطة إيد و حلم

خطوتك مرسومة جدا

زي نجمة أحلى فيلم

ماشية جنب الناس وبينهم

بس عيني خلاص ما شافت

حد منهم

هو ينفع يبقى جنبك أي حد

هو ممكن يبقى شبهك أي ورد

أي نور

أي عروسة بحور

كل بساتين الحياة

جنب منك أرض بور

كل خير الكون يا غالية

جنب خيرك مالشرور

كل حب الدنيا ليكي

شمسي تشرق من عنيكي

كلمتي حاتقول عليكي

أحلى غنوة للسطور

هو ينفع يبقى جنبك أي حد

هو ممكن يبقى شبهك أي ورد

أي ناس

أي لؤلؤ . . أي ماس

الحرير جنبك فقير

و الذهب جنبك نحاس

أي لحظة أبعدها عنك

مش حاأعيشها من الأساس

إنتي قلب بريء و غالي

إنتي حلم بعيد و عالي

كنتي أبعد من خيالي

بس عشقي خدني عندك

6 comments:

bobo said...

يا لهووووووووووي.. الكلام الحلو دا فيا انا؟ الحب دا كله بتاعي انا؟ انا متاكدة اني اكتر انسانة محظوظة في الدنيا.. بحبك يا اغلى الناس

صبرني يارب said...

احم احم

انا جيت

شكلي جيت فى وقت غير مناسب

هههههههههههههه

ايه يا جدعان حافظوا على مشاعير الناس مش معقول كده
هههههههههههههههههههههه


دلوقتي انا باطبخ وريحة الفراخ والفاصوليا ماليه المنطقه

قوم اجي عندك الاقي الجو ده

الكلام والموسيقى الواحد عايز ياخد المخده فى حضنه وينام

ماشيها يا بوبو المخده

هههههههههههههههههه

تحياتي لكم وربنا يهنيكم ببعض يارب

وبجد الكلام حلو اوي

Laila said...

غريب ان واحد يحب مراتة كل الحب ده
شوفت عندك ابيات كتير عنها
واضح انها صاحبت التعليق الاولاني
حقيقي باحسدها عليك
يمكن ده اول تعليق عندك مني مع اني متابعه مدونتك من تقريبا سنة
يابختها بك

blackshwak said...

هممممممممممم

أحسد

ولا أحقد

ولا أعمل إيه بس ؟؟؟؟؟؟؟

هههههههههه

هدعيلكم أحسن
ربنا يوفقكم دائما وتفضلوا تحبوا بعض علي طول

بس الكلام الجميل ده إنت بتجيبه منين ياعم

أكيد أكيد من جوه قلبك

ربنا يوفقكم كمان مره

وشكرا ليك ولبوبو علي تعليقاتكم المشجعة
يشرفني إنكم بتتابعوني

سلااااااااام

KING TOOOT said...

bobo
الكلام الحلو ده ماينفعش يكون في أي حد غيرك
والحب دا كله ماينفعش يكون بتاع أي حد غيرك
ولو حد محظوظ في الدنيا .. يبقى أنا بالتأكيد
بحبك يا أغلى الناس
______________________
KING TOOOT

KING TOOOT said...

صبرني يا رب
يافندم إنتي تيجي في أي وقت
بيتك ومترحك
إنتي معاكي دعوة مفتوحة
بس تيجي ومعاكي الفراخ و الفاصوليا
ههههههههههههههههههههه
خالص مودتي و تقديري
______________________
Laila
مش حاتقولي غريب لو عرفتيها و عرفتي إن الحب ده أقل بكتير من إلّي هي تستحقه
وبجد يا بختي أنا بيها
تحياتي
______________________
blackshwak
الكلام الجميل ماينفعش يكون غير من القلب
وأنا لمّا بأكتب أي أبيات عن بوبو مش بتكون إيدي إلّي بتكتب
لا ،، بيكون قلبي فعلا
خالص شكري و إمتناني على تعليقك الجميل
______________________
KING TOOOT