Pages

كلام رجّالة


الحقيقة أنا عندي كلمتين للرجالة ، و على الأخص الرجالة المتزوجين ، يعني الأزواج ، و أنا بأخصهم بالذات لأن في كلام من إللي حاأقوله مش حايحس بيه غير الرجالة المتجوزين ، لأن الأحساس بيه لازم يكون نابع من تجارب حياتية و معايشة مش مجرد حواديت من الغير .

كلنا كرجالة متجوزين عارفين إن الحياة الزوجية لا تخلوا من شوية منغصات ، وطبعا كلنا بنلوم دايما على الستات ، أو الزوجات يعني ، وطبعا غالبا بيكون لومنا عليهن صحيح ، لكن في الحقيقة أنا عايز نكون صادقين مع نفسينا شوية ، ونسأل بعض سؤال ، هل إحنا بنحب زوجاتنا فعلا ً ، هل شايفين إن إختيارنا ليهم كان شيء سليم ، هل عند الواحد مننا ثقة تامة في إختيارة للست إلي عايشة معاه ؟ ولا ساعات بيمر بلحظات ندم ؟

أغلب الرجالة بعد الزواج بكام سنة ووجود أطفال , بيبدأ يشعر بالملل ، وعدم الإكتراث بالست مراته ، على الرغم إنه مكترث – حلوة مكترث دي – بكل الستات بره البيت ، وأقدر أقول إن نسبة كبيرة جدا من حوارات الرجالة المتزوجين بتكون عن ستات هما على علاقة بيهم أو بيتمنوا إنهم يكونوا على علاقة بيهم ، أنا مابأقولش إن الرجالة كلهم أبالسه و ملاعين ولا إن الستات ملايكة ، لا ، بس أنا حاسس إن الناس فاهمة الحب غلط من وجهة نظري ، وتعالوا نشوف أمثلة ونحاول نجاوب على الأسأله دي :

كام مرة خفت على مراتك بجد وهي عيّانه ؟

كام مرة إتألمت من جواك فعلاً علشان هي بتتألم ؟

كام مرة هي إتكلمت معاك في موضوع وما إعتبرتوش تفاهة نسوان ؟

هل في يوم جبت لها هدية من غير أي مناسبة ؟ ( ماهي الهدية إلّي من غير مناسبة بتعبر عن الحب أكتر بكتيييييير )

شيلت عنها إبنك أو بنتك في الشارع في آخر خروجه ولاّ سيبتها شايلاه و إتلككت بإنك بتتكلم في الموبايل ؟

لما إتخانقت معاها آخر مرة علشان إتأخرت عليك وإنت مستنيها في الشارع ، كنت مستعجل فعلا و عندك شغل ولاّ كانت مجرد حجة تخفي وراها عدم صبرك وزهقك من الوقفة ؟

لما كان عندها أنفلونزا آخر مرة ، قمت حضرت إنت العشا ، ولاّ إتعشيت بره ورجعت قلت لها إنك شبعان ومش عايز تاكل ؟

كام مرة وإنت في الشارع بصبصت لواحدة ماشية ولابسة مش ولابد ؟

لما طلبت منها إنها تلبس الحجاب ، وقعدت تقول لها كلام ديني ممتاز ، كان الدين هو السبب ولاّ كنت عايزها تتحجب علشان تتجنب إن الناس تبص عليها و بس ؟

طيب لو إجابتك عن السؤال إللي فات بإن السبب هو الدين

ليه مش بتصلي ؟

ليه بتاخد رشوة في شغلك رغم إنها حرام ؟

ليه بتبص على الستات إللي مش متحجبه ، وإللي متحجبة كمان ؟

ليه بتشتم رغم إن الشتيمة حرام هي كمان ؟

ليه الدين في حياتك مابيظهرش غير في لبسها أو حقوقك عليها ؟

ليه بتكذب مع إنك عارف إن الكذب حرام ؟

نرجع للأسئلة الأولانية تاني

لما كانت حامل ، كام مرة رحت معاها عند الدكتور و مارجعتوش متخانقين، وكام مرة وصلتها عند الدكتور و مشيت بحجة الشغل رغم إنك ماعندكش شغل ولا حاجة والسبب الحقيقي هو إنك بتزهق من القعدة والإنتظار لغاية ماتدخلوا في دوركم

ليه لما عيالك يعملوا حاجة غلط بتزعق لها هي ، رغم إنك مسؤول عنهم زيها بالظبط

و أخيراً

كام مرة فكرت إنك تطلقها ، وإلي وقف قرارك هما العيال

طيب ماهو إنت إللي إخترتها ، هي مش مناسبة ليك ، ومش عارفة تفهمك ، ولا تحس بيك ، ومليانه عيوب ، طيب هي مالها ، ما أنت إللي جيت و قلت يا أخونّا أنا عايز أتجوز البت دي ، و كانت وقتها زي العسل على قلبك ، يعني الموقف بيكون يحتمل تبريرين ، الأول إنها مش مناسبة ، طيب إختارتها ليه ، أو إنها مناسبة بس إنت إللي مش عايز تشيل مسؤولية ، طيب هي مالها

طبعا فيه ستات تجنن العالِم و تكفّر العابد ، بس حتى لو كده ، قاعد معاها ليه ، سايبها تبقى على زمتك ليه ، سايبها تبقى أم عيل و إتنين وتلاتة من عيالك ليه ، ما تطلقها من الأول ، كل الناس المتزوجين عارفين كويس إن الإنسان عشرته بتبان من أول كام شهر ، ودي سهله قوي إننا مانجبش فيهم أطفال ، ويبقوا الكام شهر دول إختبار للحياة ، ليك وليها ، لأن هي كمان ممكن تخلعك وترتاح منك لو إنت طلعت زي الزفت .

وهم القوة إلي رجالة كتير بتعيش فيه ده ، وإلي ستات أكتر بتعيش فيه هما كمان ده وهم كبير ، الحياة الزوجية يا جماعة مش حرب ، ولا خناقة لازم واحد فيها يعوّر التاني ، الموضوع توافق ، أنا أغيّر حته ، وهي تغيّر حته ، أنا أنزل درجة وهي تنزل درجة ، علشان نبقى مع بعض ، لما تدايقني أقول لها إني متدايق ، بس من غير ما أجرحها وأشتمها وأهينها ، لما أزعل منها أبقى في زعلي حنين ، وفي غضبي حنين ، وفي قسوتي حنين ، علشان هي كمان تعمل إلي أنا عايزة وهي سعيدة إنها بتسعدني ، إيه الفايدة في إني إعيش مع إنسانه كارهاني و وجودي في البيت بيبقى بالنسبة ليها نكد وخنقة ، إزاي ممكن حد يعيش مع حد مش طايقه ، آخر الكلام يا رجالة ، القهر مش مرجله ، و الضرب والشتيمة وقلة الأدب أسهل حاجة في الدنيا ، خليك فارس في أخلاقك ، حاتلاقيها أميرة تستحق إنك تحبها وتحميها وتكون أم أولادك .

5 comments:

bos bos بسمه عبدالباسط said...

كلاااااااااااااااااام تماااااااااااام جدااااااااااا

بس الكلام ده لو بقى فيه رجالة أصلا ومعلش فى كلمتى بس صدقنى كل ما تبص حواليك هتلاقى أن الراجل اللى بجد بقى نادر أصلا
وأنا معاك أنه فيه ستات زى الزفت
ولكن مش كلهم زفت
ومش كل الرجالة زفت

ولكن الواحد منهم بقى يعمل اللى فى مزاجه يعنى يخطب ولا يتجوز واحدة ويطلع عنيها وتلاقيه برة عايش حياتة ويقولك أنا رااااااجل

طيب هيا فين حياتها اللى أنت عمال تدمر فيها

للأسف رجالة كتيرة فاهمين الرجولة غلط
فاهمين أنها مد إيد وضرب وعنف
فاهمين أنها أهانة
فاهمين أنها أهدار لكرامة الست
فاهمين أنها قسوة ونكد وعكننة على الست اللى معاه
فاهمين عكس كل اللى المفروض يحصل

وعلشان كده معظم بيوتنا اللى فيها بنات وستات مخطوبة أو متجوزة عايشين فى قهر ونكد وقرف ولأن الرجالة اللى معاهم مش رجالة وفاهمين الرجولة غلط

هو مين قال أن لو خطيبى أو جوزى حنين معايا أن ده معناه أنه راجل خيخة وضعيف
هو مين قال أن ضربك وقسوتك وأهانتك معناها أنك راجل حمش ولازم تعمل كده علشان تبقى راجل

طيب فين الكلمة الحلوة
اللمسة الحلوة
النظرة الحلوة

فيييييييين أحترامك ليها وتقديرك

فين حااااااجات كتيرة قوى ما بقتش موجودة الا نادراااااااااا

أنا لو فضلت أتكلم مش هخلص الا الصبح

حرااااام عليك يا وليد فتحتنى لية

على العموم فى النهاية لو كل واحد عايز بجد أميرة وست الستات تبقى معاه
ياريت هو كمان يبقى الفارس والراجل اللى بجد

ـ-ـ- أحمد عبد العدل-ـ-ـ said...

طيب أنا بستأذنك بقى أجيب خطيبتى و نقيم عندك و عند مدونة بوبو كمان أد تمانين تسعين سنة كده :))
بحب أوى الحياة السعيدة بعقل يعنى مش لازم أكون مجنون علشان أكون بحب بجد ،،، الحب و السعادة قرار ... و أى قرار له ضريبة و كل واحد يعيش اللى هو عاوزه ،،،
على فكرة الكلام محتاج بيحس مش حد متجوز علشان يفهمه ،،، للأسف فى ناس متجوزين أعرفهم و لا هيأثر فيهم الكلام ده لأنه لو هيتأثر بيه مكانش من الأول عمل حاجة من اللى فيه

تسلم ايدك ويبدو بجد انى سعيد الحظ بمعرفة مدونك الفاضلة

blackshwak said...

السلام عليكم

أولا احب أشكرك من كل قلبي علي تعليقك الأخير في مدونتي
متعرفش هو بيعني بالنسبة ليا إيه
لأني بعتبر حضرتك من أفضل الناس اللي قابلتها
فكريا طبعا
......................
أما بالنسبة لموضوع البوست الجامد ده
فهقولك إرحمنا ياعم
مش عارفين نجاريك في مواضيعك وآرائك السديدة
عايزين نعيش جنبكم ياسيدي
هههههه
لا والله بهزر مش حسد ... بس بجد مواضيعك كلها مميزة
ومش هضيف ولا أعلق علي الموضوع أكتر من كده عشان انا مش شايف إن ممكن حاجه تانيه تتضاف

تحياتي لك
ولقلمك

سلام

KING TOOOT said...

بسمة
يابنتي ليه التشاؤم ده
مش كل الرجالة وحشين، ومش كل الستات مغلوبة على أمرها
بس إللي أنا قصدته ، هو إن الرجالة تفكر إن ممكن حاجات بسيطة تكون مؤثرة جدا في الحياة الزوجية
وبعدين قلبك أبيض ، واخدة الموضوع بعصبية قوي كده ليه ؟
تحياتي إلى أختي الصغيرة العصبية
_______________________
أحمد عبد العدل
يافندم تشرف وتآنس إنت و خطيبتك و كل أصحابكم كمان ، المدونة هنا و عند بوبو مجانية والإقامة دائمة لو تحب
شوف أنا بأختلف معاك إن الحب و السعادة قرار ،، أنا رأي إن إستمرارهم قرار لكن هما ذاتهم خليط مشاعر صعب يتكوّن غير بتدخل من الله سبحانه و تعالى ، بعظيم قدرته ، إلا بقى لو تقصد إن الحب و السعادة قرار من الله
كده نبقى متفقين
تحياتي وصدقني أنا المحظوظ بزياراتك لمدونتي
خالص مودتي و تقديري
_________________________
blackshwak
أشكرك جدا على تعليقك الجميل وتشجيعك الدائم لشخصي المتواضع
مدونتك بجد مميزة و جميله و أفكارها جديدة جدا وأنا فعلا سعيد إني من المتابعين ليها و بأعتبر نفسي محظوظ إني عرفتها و إني عرفتك طبعا
تحياتي
_______________________
KING TOOOT

صبرني يارب said...

مش باقولك فى بوستات بتقع مني

ازاي البوست ده ما عداش عليا


تمام اوي هابروزه واحطه على ازاز العربيه او التوكتوك لكل الرجاله

يارب يفهموا والنبى يارب