في ليلة القدر

في ليلة القدر بأدعي لك

و بأهدي لك خشوع صوتي

و قلبي بيجري و يجيلك

و يخفي كلامه في سكوتي

في ليلة القدر أنا بأشكر

إلاهي و بحمده عليكي

و أصلي كتير عشان أقدر

أكون فعلا جدير بيكي

ووقت الفجر أسيب نومي

و أقوم ألقاكي بتصلي

تزول عني هموم يومي

و كُل المر بتحلي

و أنام بالليل على صوتك

وهو يرتّل القرآن

و أشوف دمعك على رموشك

مزوّدهم خشوع و إيمان

ولا عمرك في يوم كنتي

طريق بياخدنا للأحزان

حقيقي الزوجة لو إنتي

بتبقى هديّة م الرحمن