Pages

العيد في بلدنا

في بلدنا يا خلق العيد بيفوت

على ناس بتعيش فوق ناس بتموت

مخاليق واكلين شاربين نايمين

على صحن تراب و بواقي تابوت

----

العيد في بلدنا يا خلق حزين

مش عارف يبكي لمين و لمين

مع إن العيد في الأصل سعيد

و بييجي يفرّحنا المفروض

----

العيد أحسن له خلاص مايجيش

ما الميت مش أحسن له يعيش

و طالاما القرش "بح" مافيش

يبقى الكل أحسن له يموت

----

و في نفس الوقت في بلدي حيتان

واكلين شاربين أشكال و ألوان

دافعين ألافات على فسحة جنان

لابسين مايوهات ولا ورق التوت

----

و كأن مافتش هناك رمضان

ولا شافوا صيام ولا شافوا إيمان

و لا راح ينزلوا في القبر كمان

ولا حياهوب لجتتهم دود

----

آخرتها يقولوا علينا رعاع

و إننا بيئة و واطيين و جياع

ولا يطمر فينا الخير و بتاع

و عنينة حسودة و شعب حقود

----

طاب ما أحنا بنحقد مش ناكرين

و بندعي عليكم دنيا و دين

يا لمامة يا حرامية يا واطيين

حقنّا جاي و ربنا موجود

4 comments:

moustafa said...

wonderful blog
make money|affiliate programmes|work at home
www.theway2profits.blogspot.com

Borsa said...

thanx for this nice blog and please let me take a copy to my site

البث المباشر لمباريات كأس العالم للشباب

ليس فقيرا من يحب said...

جميييييييييييييييييييييله

تسلم ايديك

سلامى لبوبو وعمر

KING TOOOT said...

moustafa
borsa
أشكركم
_____________________
ليس فقيرا من يحب
أشكرك جدا على تعليقك
و السلام وصل لبوبو و عمر
_____________________
KING TOOOT