عشق كامل

النسايم فوق جبينها

فارده خصلة شعر طايرة

سارقة طرف الطرحة منها

رايحة تهرب بس حايره

و العيون مفتوحة دايما

بس دايما مكسوفين

و الخدود مبتسمة دايما

و الشفايف فرحانين

كفّها في إيديا ساكن

كل مره بيستخبه

و الرموش مفروده لكن

خجلانين خَجَل المحبه

و الكلام مابيننا همس

و المشاعر رايحه جايه

و إبتسامة روحها شمس

و القمر في جبينها هيَّ

هي روحي وروحي فيها

عمري كله مش كفاية

لو في يوم أهديه إليها

من بدايته للنهاية