أوباما أوباما ... يا بابا و ماما

أوباما أوباما

يا بابا و ماما

يامليان وسامة

و زوق و إحترام

ياريتك يا غالي

تفوت الليالي

و تفهم يا خالي

ضرورة السلام

لبيتك و بيتنا

و قووتك و قووتنا

و طنط و خالتنا

و كل الكلام

عشاني و عشانك

و علشان عيالك

لابد لخيالك

يفك اللجام

لأنك يا ناصح

ماتعملش فالح

و تحدف قوالح

و تطلب غرام

ولا تفتكرشي

حاتسرق و تمشي

و تنهب في قرشي

و تخرج تمام

دا أنا مصري يابا

وواكل لــِبابه

و ساكن خرابه

و بأركب ترام

و باشرب مجاري

و بأكل ما جالي

ولا آخد في بالي

وآخر إنسجام

حاتثبت كرامة

و تلبس كمامة

حاتلقى السلامة

و تلقى الحمام

تسوق الرخامة

و تعمل دراما

حاتلقى الشهامة

بتقلب زكام

شتايم حاتسمع

و براغيت حاتلدع

و بكفوفنا نلسع

قفاك في الزحام

فياريت يا شاطر

تبطّل تخاطر

و تبعد مخاطر

عن العم سام

و تفهم يا "بودي"

لا عمر اليهودي

حايلغي وجودي

ولا في المنام

و لا عُمر شعبك

و شعبي إللي راعبك

مايتداس في كعبك

و كعب المدام

و لو مش مصدّق

فممكن تحقق

و ممكن تدقق

في كل النظام

حاتلقى الحقيقة

أمامك جريئة

و زي الحريقة

في وسط الغمام