Pages

قبل ما عيونك تفتــّـح

قلبي من خوفه عليكي

صاحي طول لياليه مانام

لجل ما الأحلام تهوّب

ناحيتك هادية فسلام

ييجي حلمك بين أيديا

أجري اشوفه قبل منك

و أغسله بدموع عنيا

و ابعده كام خطوة عنك

وأما يبقى الحلم صافي

كل أحداث فيه بتفرح

أجري اصبّه بين جفونك

قبل ما عيونك تفتّح

بعد ما تطمنّي ضحكة

فوق شفايفك و إبتسام

أرمي راسي ع المخدة

و أبتدي أنعس و أنام

9 comments:

Lobna Ahmed Nour said...

احساس جميل اوي وشاعرية عالي

تحياتي

Empress appy said...

حلوة قوى بس اللى يفهمها ويحسها بجد تسلم ايديك

dodda said...

جميل اوى

ياما نفسى كابوس الثانويه العامه يتلغى بقى

ممكن تساعدنى؟؟
مع انى اتخرجت وعملت اتنين دبلوما ولسه بحلم انى اكتشقت انى فى ثانويه عامه قبل الامتحانات باسبوعين
!!!!

سمر الشافعى said...

ولما يبقى الحلم صافى
اجرى اصبه بين جفونك

كلمات رقيقه واحساس عالى جدا احيك عليه

Anonymous said...

كلامك جميل يا وليد بس صدمتنى من الجملة دى

أرمي راسي ع المخدة

حسيت أنه حد هيضربك علشان تنام

بس كل الكلام جمييييييييييييييل ورمانسى ربنا يخليكوا لبعض

تحياتى

eshrakatt said...

كل ما اقرا تعليقاتك عند سهى ارجع ادخل عندك تانى
انا مش عارفه اقولك حاجه غير انى بحسد المدام يا عم
بجد بجد فيض من المشاعراحييك عليه
انت شاعر هايل بحس ان الكلمه طياعه معاك لينه بتشكلها وبتطاوعك بحس انك بتملك زمام الكلام
تحياتى

Anonymous said...

كل مااقرالك حاجة تفكرنى بعمنا صلاح جاهين
طبعا ده مش عيب لكن المرة دى حسيت ان لك صوت خاص بك انت
داوم وافرد قلوعك ولا يهمك لانك فعلا موهوب جدا
تحياتى
اميمة عز الدين

dodda said...

تاج الاحلام
برجاء الحضور للاستلام

حتى يسود السلام

KING TOOOT said...

uniqe
أشكرك جدا على مرورك و تعليقك الرقيق
__________________
appy
ألف شكر و صدقيني أي حد بيحب بجد حايفهمها على طول
__________________
dodda
لا يا ستي ، كله إلا كابوس الثانوية العامة ده
تحياتي
__________________
سمر الشافعي
أشكرك على تشجيعك و تعليقك الجميل
__________________
bos bos
قوليلي ، لو بتعملي حاجة مهمة قوي و نجحتي فيها على أكمل وجه و خلاص كانت الدنيا ليل جدا و خلصتيها خلاص ، و عايزة تنامي ، حاتعملي إيه ؟
مش حاترمي راسك ع المخدة و إنتي مبسوطة و حاسة بالسعادة ؟
هو ده المعنى المقصود
أشكرك يا زميلتي العزيزة
__________________
eshrakatt
ده كده بقى يبقى أشكر سهى جدا جدا إنها كانت السبب في مرورك عليا
على العموم إللي يتحسد بجد هو أنا مش المدام، لأنها فعلا أنسانة تستاهل قد كده مليون مرة وصف و حب و كل حاجة حلوة
أشكرك على تعليقك الجميل و ياريت تزوريني على طول
__________________
اميمة عز الدين
عمنا صلاح جاهين ،، يالااااااااهوي
عيب أيه بس ؟؟!!! هو أنا حتى أوصل أبقى ربعه
لا لا لا ،،
دي الكلمة دي كبيييييييييرة جدا جدا جدا
ياريت بس عندي حته صغيرة من موهبة عمنا صلاح جاهين
دا أنا كنت مشيت بقى و يا أرض أنهدي ما عليكي قدي
أشكرك على التشبيه المجامل لأقصى حد
تحياتي
__________________
dodda
رغم أن التاج هناك ماعليهوش اسمي
بس الدعوة مقبولة
حاضر
__________________
KING TOOOT