Pages

لزوجتي في عيد ميلادها

يوم ما أتولدتي الفجر بان

طبطب بنورة ع المكان

يومها جبين الدنيا فتّح وردُه

فوق كل الغيطان

الدنيا رسمت لون سماها بضحكتك

و الأرض فرحت يوم ما لمست خطوتك

و الشمس زادت نورها من نور بسمتك

كل الحياة حست ساعتها بالحنان

يوم ما اتولدتي الحزن راح

عن كل اشكال الجراح

و اتفتحت ابواب كتيرة

للمحبة و السماح

يومها الربيع الحلو كان هو الوجود

يفرد نسايمه و يحضنك و الناس شهود

لجل ما يوفي بوعده ليّا و العهود

ويحفظك ليوم ماأخدك بر الأمان

يوم ما أتولدتي مليتي كل الدنيا نور

و الموج يوميها مابقاش بيقسى ع البحور

ضي القمر خاصم هلاله

ونوره كان بدر البدور

كل الشجر لوّن فروعه بالندى

و الخضرة فرشت توبها لحدود المدى

وصوت غناكي في كل الدنيا ليه صدى

مايكونش أجمل من كده غير اللآذان

يوم أتولدتي

يا حبيبتي

يومها بس الفجر بان

9 comments:

Unknown said...

كل سنة وهى طيبة

كل سنة وانتوا مع بعض وبتحبوا بعض

كل سنة وعمر معاكوا وفرحانين معاه وبيه وجايبينله اخوات يارب

كل سنة وانتوا بتمتعونا بكلامكم واحاسيسكم الجميلة دى

جزاكم الله خيرا بجد

... said...

كل سنة وانتم طيبين
جميلة أوي القصيدة
زي كل كتاباتك
وزي بوبو نفسها
ربنا يسعدكم

dodda said...

كل سنه وانتم ب1000 خير

ربنايخليكو لبعض
ويباركلكوا فى عمر

HERO said...

كل سنة وهي طيبة وفعلا يابختها بيك
ولا كأنها رئيسة جمهورية بتغنلها في عيد ميلادها
ربنا يديم المحبة والالفة ما بينكوا يارب

تحياتي

أحمد سلامــة said...

الله عليك الله
المدونة الشيقة دي اكتشاف اليوم
مش هتتنسي
والشكر لفاتيما
راجعلك يا شاعر

Anonymous said...

حلوة بجد
تسلم ايديك وربنا يخليهالك

ياسمين حميد said...

كل سنة وهي طيبة
كل سنة وانتوا الاثنين طيبين
وبتحبوا بعض
ومع بعض

ايــــــــــــــــــوب said...

يوم الميلاد
اليوم اللى بيحصل فيه الميلاد
ولا اللى بيحصل فيه اللقا ؟؟
بين الأحبه ... كل شمس جديدة ... اعلان ليوم ميلاد
....
كل سنة وانتوا طيبين
وكل يوم ... مبلاد جديد

KING TOOOT said...

إنسانة
يارب يسمع منك كل دعواتك لينا
و يارب يحقق لك أحلامك كلها إن شاء الله
_______________________
بثينة
لا يا بثينة بوبو أحلى بكتييييييييييير
أشكرك جدا
_______________________
dodda
و إنتي طيبة
يارب آمين
_______________________
hero
يا صديقي هي رئيسة جمهورية قلبي
و يا بختي أنا بيها
_______________________
أحمد سلامة
ألف شكر ليك و لفاتيما إللي صيطتنا وسط الخلق
تحياتي
________________________
Anonymous
أشكرك على الزيارة
________________________
ياسمين حميد
أهم حاجة مع بعض و بنحب بعض دي
يارب آمين
________________________
ايــــوب
الحقيقة هي كل لحظة معاها ميلاد جديد ليا انا
تحياتي
________________________
KING TOOOT