Pages

الكبير مش مِستَكَنيَص


الكبير مش مِستَكَنيَص

م اللجاجة في الحوار

و السماجة و الدباجة

و الخناقة و الشجار

و المعاندة و المناهدة

و التلسين على الدولار

و الكلام الظلم جدا

عن حاجات أسعارها نار

هو فاهم ؟

أيوة فاهم

إن دي أحقاد صغار

ناس بتكذب ع الحقيقة

مزقوقين على ناس كبار

يكتبوا مليون مقالة

يعملوا مليون حوار

عن مجاعة و عن بتاعة

إسمها تصحيح مسار

الكبير كمان مزمزق

م الكلام عن الفروق

و النظر بعيون حسودة

م اللي تحت للي فوق

و الكلام عن ناس بتلمع

خللى كل الناس تفوق

إن كل الشعب عايش

محشورين جوه الشقوق

هو قال الكلمة حكمة

ماتجيبوش سيرة الحقوق

و إللي حايبلطج و ينطق

يومها يقعد ع الخازوق

و الخازوق يا اخونا حاجة

مش دعاية أو هزار

ناس شافتها مره واحدة

عقلهم فلسع و طار

و إللي يركب مره فوقه

يبقى عمره كله عار

بعد كل كلامنا لازم

تمشي دهرك للجدار

او تسافر برّه فورا

يا أبني و تبلّغ فرار

لو حاتحلم تبقى عايش

تقضي عمرك في انتظار

و لو حاتطلب مره حقك

تبقى أنت أكبر حمار


8 comments:

HERO said...

الله الله
بجد مش عارف اقول ايه
كلام حلو قوي والله يعني بتحسسني ان انا بقرا حاجات تحرق الدم وانا مبسوط ومتمزج من الشعؤ والقافية

تحياتي

nonoymm said...

الله طب ليه الغلط دة
حلوة اوي
تحيا

شفقة و احسان said...

حلو الكلام جدا جدا

ياسمين حميد said...

هو يعني إيه مستكنيص؟

واحدة مفروسة said...

ههههههههههههههههههههه

KING TOOOT said...

hero
ماتقولش حاجة ياعم
كفاية زيارتك ليا في مدونتي المتواضعة دي
تحيات كبيييييييرة
_____________________
nonoymm
ماأقصدش الغلط و الله
هي جت فيكي ؟؟
معلش
نورتيني
______________________
شفقة و إحسان
حلو التعليق جدا جدا
جدا
______________________
ياسمين حميد
شوفي يا ستي
مستكنيص هي فعل
سكنيص
سَ كَ نِ يِ صَ
و في صيغة المضارع يبقى
يستكنيص
و في صيغة الماضي يبقى
إستكنيص
و فاعله هو
مستكنيص
و الإستكنياص في حقيقته هو فعل الإستكنياص بشدة أو الأستكنياص المستمر
و هو مقابل لأفعال كثيرة مثل
مستكُيّف
و مستروّق
و مستمزّك
و مستلز
و مستشنكح
و ما إلى ذلك من أفعال الإنبساط و السرور
تحيااااااااااااااااتي
___________________________
واحدة مفروسة
هق هق هق هق هق هق هق هق
___________________________
KING TOOOT

dodda said...

من الواضح انن حمضطر قريب نستورد برسيم


وما ضاع حق وراءه مطالب
:O)

Anonymous said...

you really should release ur poems in a book bro. u write some really good stuff.