Pages

أحضان الوطن


وسط أحضان الوطن

نسمع حكاية شعب مات

لما أتسجن

نسمع حكاية طفل داب

من الشجن

والشجن أصله بنارين

نار بتحرق في البدن

ونار تشعلل في الفتن

تفضل تعيش في أرضها

وتصب نار على وردها

تتحول الورود جنود

تقتل الريف والمدن

وتحط بزر الشر

يصبح شجر

يطرح بشاير ضوء

أسود غطيس

يفرد قلوعه في المحن

والقلوع تسحب سفينة

تمشي في وسط نيل

تهدم مدينة

والمدينة بعد المدينة

تصحي يا بلادي حزينة

تجري وأنتِ تفكري

بتدوّري

على أي أبن أتولد

مشربش سموم الفتن

جوه البلد

تلقي الولاد جتت

مترميين وسط الغيطان

والعيدان

ألّي كانت متذوقة بالخير

صبحت كئيبة مكسرة

متكسرة جواها روحها

والبنات أم الشعور المدفّرة

على حجر الأمهات

أموات

في عنيهم ضحك الخجل

من الولاد

ولسة بردة تدوّري

لاكن مفيش

تجري تشوفي

وسط أرض من التراب والدم

مبتنتهيش

لاكن مفيش

تفضل الحقيقة واضحة

تخفي وشك

لجل بعيونك ما تشوفيش

بصي شوفي

من حقيقتك ما تخافيش

عن عيونك ما تداريش

أصلك أنتِ ما تقدريش

تفتحي عيونك شويه

كمان شويه

تظهر الحقيقة واضحة

ان الحياة أسمها حرية

وان السجون كانت مرض

وأن المرض كان دفين

جوه الجسد طول السنين

مستني حبة من الفتن

تمسك في أطراف البدن

تجرده من كل شيء

من الأمل

من الأحلام

و حتى من الوطن

12 comments:

حــلم said...

براقة

بجد كلمات حلوة

حبيت أمر هنا
ممكن
؟؟؟؟

Anonymous said...

Beautiful

Ahmed Shokeir said...

من أفضل ماكتب عن الفتن

ملك said...

"والبنات أم الشعور المدفّرة

على حجر الأمهات

أموات

في عنيهم ضحك الخجل

من الولاد"
رائعة..بجد أتأثرت بها جداً
ده أول مره أمر و أكيد ان شاء الله مش الاخيرة
تحياتى

KING TOOOT said...

حلم
أهلا ً بكى و سهلا ً دائما ً يا حلم و شكرا ً على التشجيع
_____________________________
ِِanonymous
Thank you
_____________________________
احمد شقير
ألف شكر يا أبو حميد آدينا بنحاول يا باشا , على فكرة زيارتك الأخيرة لدبى كانت جامده بجد
_____________________________
ملك
مرحبا ً بيك طبعا ً و أتمنى بجد أنها ماتكونش آخر مره و يا ريت نشوفك هنا دائما ً و تشاركنا بتعليقاتك
على فكرة المدونه بتاعتك ( ملك و كتابه) رائعة و أجمل حاجة عجبتنى فيها هى القمر بسنان و بيشرب سجاير كمان و الشمس أللى بودان و بتطلع لسانها كمان
جنان فنى جدا ً حقيقى
سعيد جدا ً بمرورك و أهتمامك
_____________________________
KING TOOOT

Romantic Rose said...

حلوه حلوه حلوه بجد ..

اجمل جزء و اكتر جزء وصل اعماقي "
"والبنات أم الشعور المدفّرة

على حجر الأمهات

أموات

في عنيهم ضحك الخجل

من الولاد"

اد ايه انت متمكن من ادواتك يا وليد .. بسم الله ما شاء الله .. ربنا يزيدك

change destiny said...

Sad but true.
You know how topick your words too . It's beautiful .

KING TOOOT said...

رومانتيك روز
أشكرك على الآراء الإيجابية المستمره و التشجيع الدائم
__________________________
Change destiny
Thank you
Nice to pass here , do it always
__________________________

KING TOOOT

shady said...

جميل وحتفضل جميل فى مصر او البرازيل
ههههههههههه

KING TOOOT said...

شادى
أستراليا إن شاء الله يا باشا
الله يخليك للشعب دايما ً يا ريس
ههههههههههههههههه
KING TOOOT

islam yousef said...

المواجهه هى الحل و ليس شعار الاخوان ,من النار ييجى النور و من الدم نصنع وطن

tamer said...

تسلم ومشكوووور توب على الكلمات الحلوة والعرض الطيب



وفقنا الله لما فية الخير


مع خالص تحياتى