Pages

صندوق الـكـُرات الزجاجية


فى البوست اللى فات ( السبع حاجات ) ذكرت أنا أننى قد قررت الهجرة من مصر و هو ما دفع بنت مصريةللأستغراب و السؤال فى تعليقها عن الهجرة و ما قد حدث للناس و دفع أغلب الناس للتفكير فى الهجرة .

و لأنى أقدر بنت مصرية تقدير كبير فقد قررت أن أجيب على تعليقها بمقال و ليس مجرد ردا ً عاديا ً .

و أولا ً أرجو أن يعذرنى كل من سوف يقرأ هذا المقال عن ما قد يراهما البعض أنهماخطأين , فى الحقيقة , نويت أن أقع فيهما عن قصد و بأصرار , الأول أننى سوف أوجة خطاب الحديث إلى بنت مصرية و ليس إلى ما هو مبنى للمجهول أو ضمير المخاطب و ظنى فى ذلك أن هذا حقها لأنها هى من أتاحت لى هذة الفرصة كى أعبر عن ما بى من معتقد فى هذا الموضوع الشائك ( الهجرة ) . كما أنه قناعتا ً منى بأن هذا تفضيل هى تستحقه عن جدارة نظرا ً لدورها المتابع و الدافع و المشارك فى كل ما يتعلق بالتدوين و المدونين .

و الثانى , أننى قد أقوم بسطر رأىِ دون مواربه أو خجل أو تملق أو نفاق و هو ما يعنى أننى سوف أقول الحقيقة فى رأى كما أراها و هو الشىء الذى قد يعجب به البعض و ترفضة الغالبية العظمى من قرّاء هذا المقال .

و الحقيقة أنه بعد ألتماس هذا العذر فأننى أطمع فى ما هو أكثر من ذلك و هو أن تعلق هى أو أيا ً من الأخوة المدونين أو الأخوات المدونات كلا ً فى مدونته على هذا الموضوع الهام , و أخيرا ً أرجو من كل من تعودوا على الدخول إلى مدونتى الصغيرة هذة لقراءة ما أكتبه من أشعار أن يلتمسوا لى العذر أيضا ً فى أننى و لأول مره منذ زمن أقوم بكتابة بوست عبارة عن مقال و ليس شعرا ً و هو ما قد يسبب لمن تعود أن يقرأ فى هذا المكان شعرا ً الديق و يسبب لى بالتالى الحرج

فعفوا ً جميلا ً

و لنبدأ الآن بسؤال بنت مصرية (( هو فيه أيه يا ناس ,,, كل الناس عايزة تهاجر ؟ )) .

هذا هو السؤال و أليكى الإجابة

ليس بالحب وحده يحى الأنسان ,, نحن نصحوا و ننام فى بيئة فاسدة إالى أبعد ما يمكن تصورة

نستنشق فى الصباح هواء مسمم بالعادم و الرصاص و نسبة التلوث فى مصر متزايدة و رائعة بل و متفوقة على غيرها من بلدان العالم الثالث فى هذا المجال , كما أن الطعام فاسد و ملىء بالمبيدات المسرطن منها و المشع , و المسمم منها و المهجّن , كما أن الأنسان فى هذا البلد يشرب مياة أقل ما توصف به هو أنها غير صحيّة , فإذ كانت الأحتياجات الأساسية للأنسان من مأكل و مشرب و تنفس هى فى هذة الحاله المذرية فماذا بعد ؟؟

أنظرى إلى حال الناس من حولك بقليل من التأمل و كثير من الحزن و الشفقه , رب الأسرة اللص أو الكاذب أو المرتشى , لدية أسبابه , و السبب , إذا لم يفعل ذلك فلن يجد قوت يومة ,, و هذا الأب ليس جاهلا ً أو عاطلا ً و لكنه يريد أن يعيش , فقط أن يحيا كما يحيا البشر فى أنحاء الأرض من أقصاها الى أقصاها ,, أن يستطيع أن يفكر فى شىء آخر غير المال و متطلبات الحياة و الأولاد , فما بالكِ برب الأسرة الجاهل أو العاطل , فالطامه هنا أشد كبرا ً و عظمة .

الناس فى هذا البلد لا يجدوا ما يأكلون , تعودوا على الجوع فأزداد جوعهم جوعا ً و أنهارة القيم من حولهم أنهيار الجبال , الشاب الذى يرى فى الخديعة أصول لعالم المال و الأعمال لا تنتظرى منه أن يحمل لواء الرأس مالية الوطنية و لكن أنتظرى منه أن يحيا على أجساد البشر و أن يتذوق لحم الفقراء على شوايات الجريل فى محلات الأكلات السريعة و أن يستطعمة و يعتاد عليه , البنت التى ترى أن العرى فى الفن أفضل طريقة للوصول الى الشهرة و المال لا تنتظرى منها أن تجتهد لتخرج من صوتها أنت عمرى أو الأطلال , إن الفساد ليس كلمة أو موقف بل هو نمط حياة تفشى و تزايد حتى طغى و تجبر على كل القيم النبيله و المعانى السامية , ومن الخطأ الشديد أن نتصور أن ما حدث قد حدث بأيادى غريبة آثمة أرادة ببلدنا الشرور و أنزلت بها الكوارث و عظائم الأمور . فمن السهل على أى أنسان أن يعلق أخطائه على اقرب شمّاعة خاوية فى دولاب الحياة و لكن من الصعب أن يقتنع أو يقنع أحد بأنها الحقيقة , فنحن سببا ً رئيسيا ً فيما نحن فيه .

نعم ,, لقد سقطنا كمجتمع و كدولة فى غياهب سحيقة للنسيان وسط الدنيا , جميعا ً , جميعا ً و جميعنا مسؤل عن ما هو فيه ,, منذ أن أختفى حلم الوطن و ظهر حلم المال ,, أنا لست ضد المال و لكنى ضد أن يكون هذا المال ثمنا ً لأوجاع الناس أو جوعهم .

المجتمع المصرى يتمذق منذ ثلاثون عاما ً و جميعنا نقف دون حراك , و كأننا نشاهد مأساة تحدث لأناس غيرنا و كأننا لا تعنينا البلد أو ما فيها من سخف و تيه يملأ العقول قبل الآذان و العيون .

الشاب يبيع كرامته اليوم ليأكل الفتات و يصبح فتات و السلطة لا تلقى له بالا ً أو حتى ألتفات , إننا الآن فى ما يشبه صندوق ملىء بالكرات الزجاجية و لكنه يتدحرج إلى المجهول , و بالتالى تحول الحلم الوطنى إلى أحلام شخصية مبعثرة , كل ٌ يريد أن يحافظ على كراته الزجاجية سليمة داخل هذا الصندوق المجنون المتدحرج إلى الهاوية , و أنا قررت بمنتهى العقل الناضج و القلب الحزين المعتصر ألما ً أن آخذ كراتى و أقفذ من هذا الصندوق بلا رجعة

قد أكون متشائما ً ولكنى لست مخادعا ً و أسوأ أنواع الخداع هو خداع النفس بأسم التفائل ,, أقرأى كتاب اليابان للكاتب عادل حمودة لتعرفى لماذا نحن فى الخلف دائما ُ , أقرأى قصيدة هوامش على دفتر النكسة التى كتبها نذار قبانى منذ سبعة و ثلاثون عاما ً لتعرفى عن مأساتنا الكثير , لقد لخص نذار قبانى مأساة الشخصية العربية فى بيتين فقال

خلاصة القضية

توجز فى عبارة

لقد لبسنا قشرة الحضارة

و الروح جاهلية

16 comments:

shady said...

حرام عليكم انا حيجلى اكتئاب من يوم ما خلصت الكليه وبيجيلى اكتئاب فى الشتا ومبسوط ان الشتا دخل السنه دى ولسه ما جاليش اكتئاب
وبعدين بالنسبه لسفر سافر يا كينج هاجر وارجع بعد كام سنه زرنا ومعاك جنسية الخواجات وحترجع تلقيها زى ما هى ما تخفش بس ياريت ترجع انت ذى ما كنت
قنديل كان بيقول ان اهم انجازات مبارك انه خلى امل كل مصرى
انه يسيب مصر
بس للاسف انت عارف مسئولياتى هنا الحزب والقيادة السياسية حسبهم لمين
ربنا يوفقك يا حبيبى البلد دى خرباااااااانه ومفيش امل منها فى المستقبل القريب

ايــــــــــــــــــوب said...

هاجر خارج الوطن واحتفظ بوطنك داخلك

Romantic Rose said...

يعني انت عارف انك هتهاجر علشان تحتفظ بكراتك سليمه ..
كينج .. انت متاكد انك و انت بتنط و انك لما هترجع "ان رجعت و ما اتجوزتش خواجايه و نسيت القصه كلها" كراتك هتفضل سليمه ؟؟؟
أشك أشك أشك الف مره .. و بالرغم من دموعي اللي ماقدرتش احوشها لاني معقده من السفر و الهجره لان ابويا مسافر و اخويا و خالي و عمي و 90% من احب اصحابي بنات و اولاد كلهم مسافرين .. سافر يا كينج و كمل اللسته و ربنا يوفقك .. بس اتمني انك ما تنساش البلوج علي الاقل.

مــهــــاجـــر said...

كينج توت .. إنت وضعت يدك على الجرح ونكأته بلا رحمه .... أنا كنت أكره شئ أسمه سفر وكنت أعتقد أن من يسافر للخارج يتخلى عملياً عن أهله وبلده علانيةً .. بس الكلام ده زمان قبل ما أذق المر وأرى السحنه القبيحه التى غلفت وجه بلدى الجميل وأرى الإنسان بلا قيمه أو ثمن ... فماذا كانت النتيجه أننى عزمت على الهجرة بأى ثمن كانت وأدرت للجميع ظهرى وقلبى يكاد ينفطر وقاطعت حب بلدى سراً وعلانية وأنا الآن حاسس أننى بلا روح أو أمل ...
هاجر يا كينج ولكن أحتفظ ببقية من حب بلدك وغلفها وضعها بعيدا فى ركن ناء من قلبك لا يصل إلية صدأ الأيام ومرور السنين ففى يومِ ما ستكون فى حاجة إلية

islam yousef said...

الشىء اللى بيخلى لواحديفكر فى الهجره هو الإحساس بالغربه ,الغربه بين الأهل و بين كل الناس و بين نفسك ,نفسك تكون غريبه عنك و تحس انك مش عايزها مش طايقها تسافر جايز تطيقها بمكان تانى
و بما اننا مصريين نفسك هيا مصرك نفسنا هىا مصرنا و احنا تغربنا عنها و الواحد ما هوش عارف هو اللى مش عايزها و اللا هيا اللى مش عايزاه و علشان كده عايش فى توهه ,الوطن هو من ترتاح فيه نفسى ,لا أكرهها و لكنى أعتب عليها و احيانا العتاب هو بداية الشقاق و الشقاق هو بداية الفراق و السفر و البحث عن وطن

KING TOOOT said...

شادى
معلش يا زعيم بقى سامحنى على الإكتآب أللى سببتهولك بس غصب عنى و الله ,, هى العملية كأيبه طبيعى
______________________________
أيوب
معادلة صعبة بس صدقنى حا أحاول بكل ما أوتيت من قوة
______________________________
رومانتيك روز
يا روز أنا مش حا أنسى أبدا ً القصة كلها و مش حا أتجوز خوجاية ولا حاجة ,, أنا مسافر معايا عائلتى و زوجتى و أبنى و هما دول كراتى أللى عايز أحافظ عليهم ,, و طبعا ً البلوج ده أصبح حاجة أساسية فى حياتى ما أقدرش أنى أستغنى عنها و الحوار و الكلام و الأشعار حا تستمر عادى من هناك و بشكل دورى و منتظم إن شاء الله
أنا أقدر أستغنى عن المدونين الأعزاء دول برده .
_____________________________
مهاجر
نصيحتك غالية جدا ً و فعلا ً أنا محتاجها فى مرحلة الأنتقال دى و التغير أللى حايحصل لى فى حياتى علشان ما أخسرش أحساسى بوطنى ولا بنفسى
أشكرك على النصيحة و أوعدك أنى حا أعمل المستحيل لتنفيذها
__________________________
إسلام يوسف
أنا يا اسلام مش مهاجر أبحث عن وطن ,, لأنى أنا عندى وطن ,, أنا مسافر أبحث عن حياة أقدر أعيش فيها زى البنى آدمين التانية ما هى عايشة و للأسف أنا فقدت الأمل فى أن ده ممكن يتحقق فى مصر
و بالنسبة للغربة فهى مابتشكلش عندى أزمة قوى لأنى متعود عليها من زمان و جربتها أكتر من مرة
__________________________
KING TOOOT

Anonymous said...

hello, I immigrated like you are saying and my experience is that all countries are the same. I used to think that in France I will find a level of life that is incomparably better that my home -Arabic country- but this was NOT true and the difference is actually not that big. Of course this is ONLY my PERSONAL experience. Good luck to you but be careful and LOOK BEFORE YOU LEAP. I advise you to visit the country where you are going for a year or more and then go back to Egypte and then you can really decide.

mindonna said...

حظا سعيدا يا كينج توت

أنا أعتقد ان أي حتة هتكون أحسن حالا من هنا
فرنسا مش بلد مناسبة للهجرة ، يمكن عشان كده أستاذ المهاجر بيقول كده ,بالذات بالنسبة للعرب

لو هتهاجر يبقي سافر لبلد مليانة مهاجرين
أرض الله واسعة يا توت

KING TOOOT said...

ميندوننا
أستراليا إن شاء الله و ربنا يوفقنى و أقدر أحقق أللى ما قدرتش أحققه هنا
_____________________________

anonymous
Thank you for your advise
______________________________
KING TOOOT

Bent Masreya said...

عزيزى كينج توت

انا لما سألتك انت هتهاجر
مكنش الهدف انى اسخر من فكرة الهجرة

خلينى اقولك مبدأيا ان الهجرة والسفر مسائل بتتعلق بالظروف الشخصية اكتر
وكل انسان اعلم بظروفة وحاجاته ومشاكله

ومؤمنة كمان بإن أرض الله واسعة

وان من حقك لو ملقتش رزقك فى بلد تدور عليه فى بلد تانية

بس هجرة؟؟؟؟

يعنى ماترجعش تانى

تقلع جذورك وتبدر من جديد فى ارض جديدة

مش عايزة كلامى يبان رومانسى
بس محاولات الإصلاح لازم تستمر

والفساد مش فى مصر بس

وانت اذا كنت بتدور على مكان مافيهوش فساد يبقى هتفضل طول عمرك تتنقل من بلد لبلد

انت متخيل لما كل الناس تسيب البلد -وانا اقصد اى واحد من اى بلد عايز يسيب بلده- مصر باه او السعودية او ليبيا او الهند حتى- هيهربوا من الفساد

حقك تدور على رزقك فى مكان مفيهوش فساد، بس الفساد فى كل مكان

عموما احيانا بيكون السفر نفسه مفيد للبلد ، تخدمها وانت بعيد مثلا
او ترجع لها فى يوم من الأيام

هترجع؟؟؟؟

KING TOOOT said...

بنت مصرية
أكيد راجع طبعا ً بس أمتى ؟؟ مش عارف
على فكرة أنا ما فهمتش سؤالك على أعتبار أنه سخرية ,, لا ,, أنا طبعا ً عارف أنه مش سخرية و لكن مجرد فكرة الهجرة يمكن هى أللى حركت السؤال ده جواكى
و بخصوص الفساد فأنا مش بأدور على مكان مافيهوش فساد ,, طبعا ً ده يبقى طلب مستحيل ,, لكن أنا عايز أكون بنى آدم ,, يعنى أعيش بأحترام و أتعامل بأحترام ,, عايز آخد حقى الطبيعى فى الحياة ,, حقى بس ,, مش أكثر ,, زى ما ربنا قدّره لى ,, مش عايز أتخنق من الدنيا و نفسى و الناس و الهواء و الشغل و البلد و الصوت العالى و الشوارع و العربيات و كل حاجة حوالينا
يمكن أكون أنا الرومانسى ,, بس هو ده اللى أنا عايزة حقيقى
شكرا ً على التعليق الجميل
KING TOOOT

Ahmed Shokeir said...

مش عارف ياكينج انا ليه حاسس إن لغة التشاؤم عندك أوفر أوي .. مشاكل اه فيه مشاكل وأى مكان تاني هاتروحه مش أكيد هايكون جنة
زي مافيه سلبيات فى بلدنا عددتها فى البوست .. فيه كمان إيجابيات
المهم فى الاخر الواحد يوازن بين السلبيات والإيجابيات فى بلده وبين السلبيات والإيجابيات فى المكان اللى هوه رايحله وبعدين يقرر جايز اللى تقدر تطيقه بره غيرك مليقدرش واللى يقدر غيرك يطيقه إنت ماتقدرش وإسأل اللى سافروا وعايشيين بره .. وهما يقوللولك الوجه الآخر للحياة
وبالتوفيق فى جميع الأحوال

سامية said...

فكرتني بقصيدة لأمين حداد بحبها جدا.. وما تفتكرش إني بوجهلك بيها أي اتهام أو باتريق عليك.. بالعكس والله.. أنا نفسي فكرت في الهجرة والقصيدة دي باقولها لنفسي قبل ما أقولها لأي حد وفتح الموضوع خلاني أفتكرها

القصيدة إسمها إهرب:

إهرب
خد فى وشك واهرب
عدِّي الأحياء المتهدمه
والأوض المضلمه
والكنب والاكلمه
عدى الناس اللى أدمنوا الدموع
والناس اللى بيوتها لازقه فى بيوت ربنا
عدى النهر اللى اتعمد فيه يسوع
والنهر اللى حاضن القراريط والأفدنه
ما تاخدش معاك الهدوم
ولا الأغانى
ولا الأفلام
ما تاخدش معاك الأحلام
ولا الذكريات الهاديه
ولا الماجنه
سيب أمك ... حتبقى مِطّمنه
سيب الألم والجروح
ويللا ... روح
روح بالجسد والروح
الماضى أشلاء
والحاضر هباء
والدنيا متجننه
احبس دموعك هناك
واولد ولادك هناك
وعيش معاهم هناك
وانسى هنا

آسفة للإطالة وآسفة إذا تسببت القصيدة في وجع أي حد.. هي بتوجعني أنا شخصيا

ماريو said...

فى كتاب 1000 ليلة وليلة هذا الشعر

نقَِل ركابك عن رَبع ظمئت به
الى الجناب الذى يهوى به مطر

فإن رجعت فما فى الرد منقصة
عليك , قد رد موسى قبل والخضر

صحيح مصر وطننا , بس المكان اللى الاقى فيه نفسى يستحق تعب الرحلة , ربنا يكرمك

KING TOOOT said...

ماريو
دعواتك معانا ,, علشان ربنا يكرمنا إن شاء الله فى حياتنا الجديدة
KING TOOOT

KING TOOOT said...

أحمد شقير
يا عم أحمد ماينفعش أوازن بين أنى أكون بنى آدم و بين وطنى
أنا عايز أكون أنسان عندى حقوق و أعيش فى مجتمع بيحترمنى و حكومة بتحترم عقلى و فى جو مش ملوث و عايز إبنى يطلع عارف قيمة العمل و عارف حقوقة وواجباته
الموضوع مش شخصى وخلاص ,, أنا عندى عائله بأفكر فى مستقبلها
____________________________
سامية
جميله القصيدة جدا ً و حقيقى سعيد بأنك علقتى بيها على الموضوع

_____________________________
KING TOOOT