Pages

الكبير كبير

الكبير كبير
والنص نص .. نص نص
مقولة مأثورة يعرفها كل أبناء و ينات جيلي
قالها الفنان إبراهيم نصر
ومن ساعة ماقالها و هي بقت على لسان كل الناس
وأنا كمان بقيت أقولها بس عمري ماحسيت معناها
لكن النهاردة عرفت معناها جدا
اليوم الأول في الدراسة لأبني عمر كان النهاردة
توقعت حاجات كتير جدا
كلها ماحصلتش
توقعت إنه يبكي
أو يرفض يدخل الفصل
أو يعند معايا و مع مامته الصبح و مايصحاش
أو يرفض يلبس اليونيفورم
أو حاجات تانية كتير
بس الولد ماعملش أي حاجة من كل ده
بالعكس
صحي من بدري و لبس هدومة
شرب اللبن على غير العادة
ونزل بمنتهى السهولة معانا وهو عارف إنه رايح المدرسة
دخل من باب المدرسة و هو مبتسم
ودخل الفصل بتاعه و سط بكاء الأطفال كلهم تقريبا
وهو في هدوء تام
وقعد وسط الأطفال و بدأ يلعب بالمكعبات بمنتهى الألفه
ولما جينا نسيبه و نمشي قلنا له أننا ماشيين
قال بمنتهى البساطة
أستودعكم الله
كده عادي جدا ؟؟!!!
ولما قربت منه و سألته انت مش حاتعيط طبعا زي الأولاد دول
قالي بمنتهى البرائة
بابا أنا بقيت كبير
ساعتها عرفت يعني إيه يكون إبنك
الكبير كبير
مش نص نص

3 comments:

ستيتة said...

ألف مبروك لعمر وعقبال ما توصلوه الجامعة أول يوم ان شاء الله
الزمن بيجري بسرعة وربنا يكرمكما في عمر وعلي

ملحوظة:
لأنه شبه بنتي الكبيرة جدا في كل فعل
لا تلتفتوا لو اتغيرت طريقته الأيام الجاية
هو مش ها يخاف ان شاء الله بس ها يبتدي يشعر بافتقادكما حبة نونو
ده غير مفعول عقله الباطن وربطه بين مدرسته وسي علي:)

ربنا يكرمكم

فاتيما said...

نفس الموقف حصلى .. بس مع ماجد اخويا
انا اللى اخدته اوصله المدرسة ف اول يوم
وكنت زيك متوقعة عياط وشهنفة وبهدلة السنين
مع انى كنت عمالة اتشكرله ف المدرسة جامد
ونجيب ف شنطة واداوت وكتب وحاجات حلوة وبتاع وبنستعد نفسيا من قبلها
وبنحكى ع العيال اللى هنلعب معاهم وكدا
وبعدين تخوفت برضو كل دا ينزل على مفيش
اول ما نوصل هناك

بس ماجد فاجئنى
وقف ف الطابور مع العيال عادى
واتلهى وسطهم
وانا اللى وقفت متنحة
ولما المدرسة شخطت فينا بذوق
وقالتلنا روحوا يا جماعة احنا مش هناكلهم
(كنت انا والامهات واقفين من بعيد نبص ع العيال )

مشيت وبعتله واحدة باى باى
وعلى ما وصلت لباب المدرسة
كانت عينى بترغرغ وانا اللى عيطت
:)

حسيت فجأة انه كبر
وبقى راجل وكدا
وبيروح المدرسة وبتاع
كنت بعامله كأم اكتر من أخت


وملحقتش اعمل كدا مع يوسف صحيح
بس ماجد عوضنى بدرى بدرى
ولوقتى لما بشوف الولاد رايحين المدارس
بقاعد اعاكسهم بقى
واهزر معاهم
وبيعجبنى شكلهم وهما شايلين الشنط
وصاحيين قرفانين ومتضررين
وأبصلهم بضحك بقى
اذ انى كنت ف هذا الموقف من ييجى تلات عقود ونصف
وكانت المدرسة اتعسسسسس ايام حياتى
ودلوقتى افتكرها وابتسم
:)


كل سنة دراسية وعمر طيب
وبخير
وراجل و كبير كبير
وعقبال على لما يحصله
:)


والأسبوع الجاى ان شاء الله
اغتت عليكو واكلمك اقولك ينفع اجى امتى بأذن الله اشوف لولو واخده ف حضنى
هوه وماماته واخوه


وعلى فكرة
بشارك ستوتة ف كلامها ف حاجة
والمتعلقة بالتصرفات والغرابة
و الشخصية المستقلة والحاجات دى ...
بأن ....
الواد طالع لأبووووووه
والله يصبحك بالخير يا عدوية

:))

صباح الفُل عليك
وعلى أرق مخلوقات الله
والنونو واخو النونو

sony2000 said...

الله

انا كنت كدا بردو
بحب المدرسه
وبحب كل حاجه متعلقه بيها

نفسي الايام دي ترجع تاني
براءه ملهاش حدود

ياريت