Pages

سيرك العجايب


قرررررب وشوف

سيرك العجايب

أبو نور و نار

وبلاوي بالليل و النهار

وعيون بتنظر بإنبهار

على أي عايب

قررررب و شوف

سيرك العجايب

شوف عندنا الساحر شفيق

أبو أيد خفيفة و صوت رقيق

ونِمَر قديمة و ثقل دَم

يعمل ما يعمل مش مهم

ماهو أصله يبقى للمدير

أقرب صديق

ومديرنا خدّام للحبايب

قرررررب و شوف

سيرك العجايب

ع الحبل شوف موسى الجبان

الواد مصيبة و أُلعبان

في حكومة يلعب

وفي ثورة يلعب

وعلينا يلعب من زمان

ستّف لنا كل المصايب

قرررررب و شوف

سيرك العجايب

وفي فقرة الترابيز هنا

مرتضى يقدّم لنا

أجمل عروضة المزهلة

في البلطجة و البهدلة

و لأنه ساقط في النوادي

وإبنه ساقط زي دادي

أحلامة يحكم يوم بلادي

مع إنه معروف إنه خايب

قرررررب و شوف

سيرك العجايب

وعندنا المجهول عكاشة

بلياتشو عامل من نفسه باشا

وعلينا يطلع من حضن أهله

ويقول كلامة المليان بجهله

عنده السياسة و الفول قرايب

قرررررب و شوف

سيرك العجايب

في السيرك ده فقرات جديدة

وحاجات فريدة

وسنية و بديعة و تفيده

ورجال سياسة نصّهم

شايب و عايب

قررررب و شوف

عندنا

سيرك العجايب

5 comments:

شمس النهار said...

ضحكتني علي الصبح
صح كلهم بهلوانات من اللي بتلعب علي الحبلين مش حبل واحد

الازهرى said...

قرب وشوف حكايات زمان

الورد طالع من الجناين
فجر صخور
ملى القبور
هتف بصوته فى الميدان

الصوت يدوى فى الجناب
الصوت يزلزل العروش
الصوت يحرك الجيش
وفى النهاية ينام جعان

ساب الميدان قبل الفنال
هجم السباع
فاز الضباع
وفى النهاية الشر بان

فاتيما said...

ههههههههه


انتا عارف طبعننننننن
انا بضحك على ايه ....


وخدت اللينك وحطيتها عندى
عشان حتة الفندام دى
لايقة جدااااا
على كوباية النعنااااع بتاعتشى
ومينفعش ميتحطوش على صينية واحدة

انتى ساعات بتكمل افكارى بطريقة مذهلة
وساعات تانية بتجيبها على جنب كدا
وتقول انتا القوالة كلهااااا

احنا عاوزين نعمل شركة مساهمة تدوينية بقى ...ايه رأيك ؟



تعرف
كنت بفكر احط غنوة المولد بتاعة عدوية وابنه كخلفية للبوست
بس حسيت المولد للناس الحلوة البسيطة اللى اتلمت سوا من غير معاد ونصهم ع الاقل جاى من غير شر ولا هدف اسود زى قلبه ....
انما الواقع السياسى بتاعنا كله غرض ونفاق وسواد وشر مجتمعين سوا بقصد واحكام ....وميستاهلوش غير انهم يبقوا سيرك فعلا
فيه التجميعة المصقودة دى
بس يا ريتهم قاصدين يسلوا الناس
دول فاكرين هيتسلوا علينا

قصره بقى
ااقول الكلمة التى تختصر كل الإعجاب

الله

:)

صباح الورد
عليك وعلى كل حبايبى
اللى حداك يا اخى الغالى

Anonymous said...

ههههههه
جامده

صحة أون لاين said...

جميلة .. سلمت يمينك