في الميدان

في الميدان أبو قلب ثاير

كنت قاعد جنب منّك

آخر جمعة من يناير

كتفي شايل بكره عنّك

كنت أنا و إنتي و بلادي

و إسماعيل و أحمد و شادي

وسارة و أميرة و صليب

كلّهم راميين دموعهم ع الورق

قلبهم مليان قلق

حاسّين بأنه يوم غريب

يوم مصير

يوم مفترق

بس يومها خلاص ماعاد ينفع رجوع

ولاعاد خنوع

ولا عاد خضوع

ولاعاد كلام

بيسدّ جوع حس إتخنق

فاكرة يومها هتفنا قولنا كام هتاف؟

كان هتافنا بالمئات

بالآلاف

كان هتافنا صوت رهيب

زلزل الأرض إللي كانت

فجرها أصفر كئيب

وإللي كان نورها إتحرق

حبة’ عرق

غرقوا جبيني إللي ياما

ذُل شاف

فقر شاف

ظلم شاف

بس عمره ف يوم ما باع

أو حتى خاف

لمّا فجأة الضرب طوّح

و الأمان ساب الميدان

وطار و روّح

كنت أنا و إنتي و عمر

بنجري ندفع للرصاص

عربون أمل

فاكرة يومها شيلنا مين

متعوّرين

شيلنا سارة

و إسماعيل

و شادي و أميرة و نبيل

ومات صليب

ومينا و أحمد وإبراهيم

وميت حبيب

و قلوبنا و عيوننا إتملت

دموع قنايل

ودموع بتبكي ع السنابل

عإللي ماتوا م البارود

أو م الحريق

يومها شلّة من الجنود

سدّوا الطريق

وماهمّهمش إن الهتاف

أبيض بريء

شدّوا من إيدي العلم

و الكتاب

والقلم

طوّحوا شنطة إيديكي ع الرصيف

صرختك كانت رقيقة

بس صوتها كان مخيف

أصله صوت حق و حقيقة

مش فساد كذّاب و زيف

يومها كسّرنا الحواجز

و القيود

شيلنا كل الممنوعات

و السلاسل

والجنود

طارت الأحلام لفوق

من غير مصادرة

أو مطاردة

أو حدود