Pages

الصوابع


في البداية طبعا

لازم أقول لكل الناس ألف مبروك

ألف ألف مبروك

ألف مليون مبروك كمان

طبعا في حاجة كتير ممكن نتكلم فيها

بخصوص الثورة الجميلة

وبخصوص إللي فات

وإللي جاي

إنما أنا الحقيقة رغم فرحتي طول أيام الصمود الثماني عشر

و طبعا بعدها لما إنزاح الهم

وفهم إن إرحل يعني إمشي

وإن النطام يعني هوّ

لكن على هامش كل الأحداث الكبيرة دي

كان جوّايا تسائل بيؤرقني طول الوقت

وهو موضوع الصوابع الخارجية دي

يعني الصحف القومية كانت بتقول صوابع خارجية

طيب دوول وحشين لأنهم بتوع الحكومة

طيب بعض الصحف المستقلة هي كمان جايبة سيرة الصوابع الخارجية دي

وكمان الفضائيات و التلفزيون الموكوس بتاع الحكومة

والجدع بتاع الشرطة كمان

واحد لواء و لا عميد مش عارف

ده بقى قال إن في صوابع خارجية و داخلية

لأ وقال إنها صوابع إسلامية

( جديدة دي )

قال صوابع إسلامية قال

وحتى شوية مدونين كانوا بيقولوا موضوع الصوابع ده

بقيت أسأل الناس في التحرير

إيه موضوع الصوابع الخارجية دي

الحقيقة ماحدش جاويني

و فضلت أستفسر عن الموضوع طول أيام الثورة

أصل يا جماعة موضوع الصوابع ده عندنا مايفوتش كده

دا إحنا رجالة قوي يعني

و دي قصة تطير فيها رجاااااب

وبعدين مش بس بيتكلموا على الصوابع

لآ

ده بيقولوا إنها صوابع بتلعب

لأ و من ورا

يا خبر أسود و منيّل

فضلت أسأل على موضوع الصوابع ده

و جاية منين

وبتلعب ورا مييييين بالظبط

لحد يوم الذهاب المجيد

لما طلع لنا عم " سولوم"

وهو يا حبة عيني متشحتف

وبيقول إن أبو علاء فهم النداء

وقرر إنه يتوكّل على الله

ويلبس البجامة الكستور

ويمد رجليه على ترابيزة الأنترية جنب سوزان

ويقلّب بقى في الفضائيات

من ميلودي لحد روتانا و هو بيشرب التليو السخن

ساعتها بس إختفت سيرة كل الصوابع

إللي بتلعب

وإللي مابتلعبش

وساعتها بس عرفت

الصوابع دي كانت فين

وبتلعب ورا مييين بالظبط

غوروا في داهية يا بتوع الصوابع

يا

تييييييييييييييييييييييييييييت

5 comments:

فاتيما said...

هههههههه


شوفت .. اهى طلعت
اصابع داخلية اهى
:)

اضحكتنى يا وليد
والواحد قلقان
وصعبان عليه يضحك


دى صوابع زينب وانتا الصادق


طب انتا مجبتش سيرة الاجندات
الموضوع دا مهم جداااااااا
طلبة الجامعة
يعملوا ايه
ف اول السنة الدراسية الجديدة ؟!!!


بصراحة سوق الاجندات
انضرب ف مصر


واى حد هيدخل كنتاكى
هيبقى مشكوك ف وطنيته

الله يخربيتهوم
والبيوت اللى جنب بيوتهم

الف حمدلله ع السلامة
وتعيش مصر حرة
خالية من الغدر والخيانة
والغباء كمان ...

اشوفك دايما على اف خير
انتا وارق مخلوقة ف الكون
وعمر بيكا حبيبى ى ى ى

sony2000 said...

بجد ربنا يسامحهم
بس بأذن الله
ربنا ناصرنا
ويقولوا اللي يقلولوا

ياسو said...

ههههههههه ... هى التدوينه حلوه .. لكن الصوره جامده جدا...ياريت تشرفنى فى مدونتى نصائح للمدونين يمكن تفيدك فى تطوير مهاراتك التدوينيه.

KING TOOOT said...

فاتيما
صباحك ثورة
طبعا أنا مش ناسي الأجندات
بس كنت ناوي أخليها في تدوينة تانية لوحدها ، علشان يكون معاها الأقلام و النتايج و الذي منه
هههههههههههه
أما بخصوص كنتاكي بقى فإحنا طبيعي مش بندخله ، أصل إحنا من هواة الفراخ البلدي
و البيض البلدي
والسمن البلدي
والعيش البلدي
واللحمة البلدي
والكبدة البلدي
وكفاية كده بقى علشان ريقي جري
ولازم أطلع أجري وراه
سلام ياأم يوسف
وسلام كبييييير ليوسف
________________________
sony2000
ربنا يسمع منك و ينصرنا دايما
أشكرك على مرورك
تحياتي
________________________
ياسو
الحقيقة أنا إفتكرت في الأول إسمك باسو ( بحرف الباء ) مش ياسو بحرف الياء
وخصوصا إن الصورة تنفع تكون باسو خالص
نورت مدونتي و إنتظرني هناك في مدونتك دائما
________________________
KING TOOOT

shady said...

العالم اللى بتحكم دى كلها ما شركتش فى الثورة وفاهمه الثورة على إنها شوية إصلاحات مصر محتاجة حكومة ثورة من الفئات المضطهدة فى عصر مبارك مش حكومة من أصحاب مبارك والمعارضة الكرتونية أظرف شئ إن منير فخرى عبد النور بتاع الكويز معتبرينه معارضة