من جيل لجيل

مش حاأقول إن إنت كنت بطل همام

مش حاأقول إنك أصيل

مش حاأقول إن إنت زرع

و إن إنت بحر

و إن إنت نيل

مش حأقول إنك عملت المستحيل

مش حأقول وأكتب غناوي أو كلام

حتى لو كان عندي ليه

مليون دليل

بس عايز أقول وحشنا

أصلي لما بأشوف عنيك مليانة طيبة

بس خِشنة

بأفتكر أيّام رهيبة

بأفتكر أيام في جيشنا

لمّا أول مرة صوتك رن

خدنا

هزّنا و مزّع سوكاتنا

أصبح الزوّاد و زادنا

يومها حسيت إني مصري

وإني عايش

وإني لابس إسم وطني

لفّ خصري

زي قايش

يومها حبّيت السلاح

وإرتحت جنبك ع المصير

جنب جرن السرس لأسمر

والسواقي

والحصير

وسط مصر

أصلك إنت بسيط يا ريس

و إبن غيط

مش إبن قصر

ولا كان في عيلتك يوم أمير

ولا كانش حيلتك طول حياتك

غير ضمير

بس إنت اصبحت الدليل

ضيّ و سبيل

ونور بيضوي بالكرامة

من جيل لجيل