عم يوســف

عم يوسف

كلنا في حي الظاهر نعرف عم يوسف

الراجل العجوز ، صاحب المكتبة على ناصية شارع حمدي

عم يوسف راجل عجوز صحيح ، لكن عنده إبتسامة دائمة

والحقيقة لما تعرفوا قصته حاتستغربوا قوي من إبتسامته دي

عم يوسف ، أرمل لزوجة ماتت بعد صراع مع المرض حداشر سنة

وطبعا الصراع ده قضى على مدخرات عم يوسف تماما

وعم يوسف كمان أب لخمس أولاد ، و بنت

والبنت دي ليها قصة

البنت دي وهي في عز شبابها

ماتت من ثلاثة عشر سنة في حادثة عربية أقل ما يقال عنها إنها بشعة

أما باقي أولاد عم يوسف ، فكلهم في أمريكا

وآخر مكالمة كانت بين أصغر إبن فيهم و بين عم يوسف كانت من عشر سنين

عم يوسف كمان بيته إتهد لأنه كان قديم جدا

وإنتقل عم يوسف علشان يعيش في المكتبة

عم يوسف مثال صارخ على الوحدة في الدنيا دي

الغريب بقى إنه عنده قدرة على الإبتسام رغم سنوات شقائة السبعين

أنا زي كل الناس في الحي كنت فاكر إن عم يوسف مبتسم دائما

لغاية في يوم لما دخلت فجأة المكتبة علشان اصوّر ورق

لقيت عم يوسف بيبكي

حسيت بالخجل لدرجة إني خرجت من المكتبة ووقفت على الباب

علشان أمنع أي حد يدخل

كنت ساعتها لسه عمري أربعتاشر سنة

ماكنتش بأحسب إن ده خسارة فلوس لعم يوسف

كان كل همي وقتها إني أمنع أي حد يدايق عم يوسف في اللحظة دي

بعدها مرت سنين ، كنت حاسس فيها بإحساس غريب قوي

زي مايكون بقى بيني و بين عم يوسف سر ماحدش يعرفه

وكأن السر ده لازم أجتهد جدا في حياتي علشان أخبيه

سنين و سنين و أنا أقول في نفسي

ياترا لو عم يوسف عرف إللي أنا عملته

كان حايبقى سعيد

ولا لأ ؟

والنهاردة

عرفت من والدي إن عم يوسف مات

مات من غير ما أعرف هو كان حايبقى سعيد ولا لأ

لكنه مات بعد ما علمني إن الوحدة

مهما كان ظاهرها بسيط

إلا إنها أصعب شيء على الإنسان

وأكيد

هو دلوقتي سعيد

لأنه أكيد

مش وحيد

الله يرحمه