Pages

عم يوســف


عم يوسف

كلنا في حي الظاهر نعرف عم يوسف

الراجل العجوز ، صاحب المكتبة على ناصية شارع حمدي

عم يوسف راجل عجوز صحيح ، لكن عنده إبتسامة دائمة

والحقيقة لما تعرفوا قصته حاتستغربوا قوي من إبتسامته دي

عم يوسف ، أرمل لزوجة ماتت بعد صراع مع المرض حداشر سنة

وطبعا الصراع ده قضى على مدخرات عم يوسف تماما

وعم يوسف كمان أب لخمس أولاد ، و بنت

والبنت دي ليها قصة

البنت دي وهي في عز شبابها

ماتت من ثلاثة عشر سنة في حادثة عربية أقل ما يقال عنها إنها بشعة

أما باقي أولاد عم يوسف ، فكلهم في أمريكا

وآخر مكالمة كانت بين أصغر إبن فيهم و بين عم يوسف كانت من عشر سنين

عم يوسف كمان بيته إتهد لأنه كان قديم جدا

وإنتقل عم يوسف علشان يعيش في المكتبة

عم يوسف مثال صارخ على الوحدة في الدنيا دي

الغريب بقى إنه عنده قدرة على الإبتسام رغم سنوات شقائة السبعين

أنا زي كل الناس في الحي كنت فاكر إن عم يوسف مبتسم دائما

لغاية في يوم لما دخلت فجأة المكتبة علشان اصوّر ورق

لقيت عم يوسف بيبكي

حسيت بالخجل لدرجة إني خرجت من المكتبة ووقفت على الباب

علشان أمنع أي حد يدخل

كنت ساعتها لسه عمري أربعتاشر سنة

ماكنتش بأحسب إن ده خسارة فلوس لعم يوسف

كان كل همي وقتها إني أمنع أي حد يدايق عم يوسف في اللحظة دي

بعدها مرت سنين ، كنت حاسس فيها بإحساس غريب قوي

زي مايكون بقى بيني و بين عم يوسف سر ماحدش يعرفه

وكأن السر ده لازم أجتهد جدا في حياتي علشان أخبيه

سنين و سنين و أنا أقول في نفسي

ياترا لو عم يوسف عرف إللي أنا عملته

كان حايبقى سعيد

ولا لأ ؟

والنهاردة

عرفت من والدي إن عم يوسف مات

مات من غير ما أعرف هو كان حايبقى سعيد ولا لأ

لكنه مات بعد ما علمني إن الوحدة

مهما كان ظاهرها بسيط

إلا إنها أصعب شيء على الإنسان

وأكيد

هو دلوقتي سعيد

لأنه أكيد

مش وحيد

الله يرحمه

7 comments:

adel said...

الله يرحمه

Mahdy Moubarak said...

الله يرحم عم يوسف
وأحسن حاجة إن الإنسان يعيش مع الناس رغم موتِه !

وعم يوسف هيعيش معك .. لأنه علِّمك حاجة جديدة ..

تحياتى
مهدى

سواحة said...

الله يرحمه و يرحم اولاده الى سابوه للزمن

اما اجابة السؤال :-)
فاسال نفسك كنت 14 سنة
نقول كنت لسه اول الشباب و نهاية المراهقة دلوقتى ان راجل
لو الزمن غصب على عينك الدموع حتتكسف منها ؟؟ و ليه تتكسف و ده عادى فى الانسان؟ولو حد حكم عليك لدموعك يهمك رأيه ؟؟
الحق جاوب بسرعة قبل ما عمر يكبر و الزمن يحيره فى دموعه

البنفسج الحزين said...

الله يرحمه رحمه واسعه....
هاجاوبك علي السؤال اللي معرفتش تاخد اجابته من عم يوسف .....
أكيد لو كان عرف اللي انت عملته كان هينبسط لأنه كان هيعرف ان في حد في الدنيا حاسس بيه وبألمه.....ويمكن كمان ده كان هيخفف احساسه بالوحده .....
تحياتي

ميرا ( وومن ) said...

كل واحد مننا في حياتة عم يوسف بينهم سر

ويموت عم يوسف من غير ما ينكشف السر

ونفضل نسأل ياتري في يوم هانعرف ؟؟ ولا هانبقي عم يوسف تاني

الله يرحمة

KING TOOOT said...

adel
ربنا يرحمنا جميعا
__________________
Mahdy Moubarak
نورت مدونتي بزيارتك الولى
وأتمنى ماتكونش الأخيرة
وأشكر لك دعائك لعم يوسف بالرحمة
___________________
Wanda
ياواندا موضوع الدموع ده عند الرجالة بيكون مختلف شوية عنه عند الستات
يعني أنا ماأقدرش أبكي قدّام الناس أبدا
يمكن قدّام ناس معينه أقدر
لكن على العموم صعب قوي
_____________________
البنفسج الحزين
صدقيني لو قلت لك إني حسيت بيه جدا في اللحظة دي
بس كنت طول الوقت حاسس إنه لو عرف كان حايزعل
_____________________
ميرا (وومن)ا
لا إن شاء الله ماحدش فينا يعيش الوحدة
بجد الإحساس ده صعب جدا
_____________________
فاتيما
من عنيّا
لو ماكنتش إتأخرت
لأن واضح إن تعليقك موجود من فترة مش قليلة
_____________________
KING TOOOT

Adnan said...

جميلة و مباشرة و حميمية