Pages

أجمل نساء الدنيا



أجمل نساء الدنيا في عينيا أنا

قدرت تأخدني في ثانية من روحي أنا

فاكرة الأغنية دي ، فاكرة سمعناها كام مرة و إحنا مخطوبين ؟ مليون .. أو ميت مليون مرة تقريبا ، كل يوم ، و كل لحظة وإحنا حبنا لسه بيتكون ، و بيتغزل على نول مشاعرنا و حياتنا ، كل لما أفتكر أي زكرى من زكرياتنا مع بعض في أيام الخطوبة ، ألاقي خلفيتها الأغنية دي ، فاكرة لما كنتي تخرجي من شغلك ، وتروحي على بيتك جري ، علشان تلحقي تطبخي أكل تحفه ، وتنزلي تاني المغرب علشان نتقابل بعد ما أكون خلصت شغلي ، كنتي بتعملي ده لمجرد إننا ناكل مع بعض ، و أقول لك يا مجنونة حد يفضل لغاية دلوقت من غير غدا ، كنتي تقولي لي ما أنت لغاية دلوقت من غير غدا ، كنت في الوقت ده عايش لوحدي ، وكنت بأتمنى أني آكل أي أكله بيتي كده و سخنه ، طبيخ و أرز و لحمة و الكلام ده ، و بمجرد ما أتمنى ، كنت ألاقيكي جايبة الأكل معاكي ، و ناكل مع بعض ، وأحنا بنسمع سوا

أجمل نساء الدنيا جوة عيوني أنتي

أجمل نساء الدنيا أنتي يا حبيبتي

فاكرة لما كنا رايحين ننقي العفش بتاعنا من دمياط ، كنتي متوترة و مستعجلة و خايفة الوقت مايكفيش إننا ننقي كل حاجة ، ساعتها قلت لك ماتخافيش حانلحق إن شاء الله ، ولما وصلنا شقتنا في مصر كانت الساعة بقت حوالي حداشر بالليل وكان معانا مامتك ، فاكرة يوميها أنتي ومامتك نمتوا فين ؟ كانت أول لحظة تغمض فيها عنيكي في شقتنا ، بيتك و بيتي .

أنا مش مصدق نفسي إنك بين إيديا

من يوم ما حبك خدني مش بتنام عنيا

فاكرة لما كنّا بنسمع الأغنية دي في الأوبرا من الراديو في موبايلاتنا في نفس الوقت ، و أول لما سمعنا الجملة إللي فاتت دي ، شبكنا إيدينا من غير ما نشعر ، وساعتها كل أصحابنا إللي ماكانوش لسه عارفين إرتباطنا إستغربوا قوي ، ولون خدودك بقى أحمر من الخجل ، ساعتها نظرة عنيكي كانت بتقول لي ، خبيني من عنيهم ، و كانت بتقول لهم ، أيوة .. أنا بأحب الراجل ده .

إحساس جميل جوايا أكبر م الغرام

و إللي مابيني و بينك أكبر م الكلام

أحساس جديد .. خدنا لبعيد .. مالوش حدود

أجمل من كل النسا

حبيبتي ، حقيقي لو فيه أغنية ممكن تقرب ولو شوية صغيرة من وصفك ، حاتكون الأغنية دي ، أغنية خطوبتنا و حبنا ، أجمل نساء الدنيا


2 comments:

Borsa said...

thanx for this nice blog and please let me take a copy to my sites

تسوق على الانترنت
شراء على النت
Online Shop
Online games
البورصة المصرية

KING TOOOT said...

Borsa
Thanx
____________________
KING TOOOT