أيام عُمري

صحيت م النوم

لقيت الحلم متربّع

على كُمّي

و راسي في حضنك

كأني بنام في حضن أمي

وروحك جنبي ناموسية

و قلبك نور

و سهراية

ينط جنوني من عبّي

يعدي السور

و يجري بلهفته معايا

ساعات م النطه بأتعور

يسيل دمي

لكن آخرتها بأرجعلك

و أسيب عندك

بَقِيت هَمّي

عشان بكرة أنام و أصحى

ألاقي الهمّ متزوّق

بعُقد زهور

و وش كأنه بدر بدور

و عقل مافيش عَليه ضلمة

و حِس رقيق ولا النسمة

و ألاقي عنيكي مبتسمة

أشوفها و أدوخ

و أروح أدفن جتت خجلي

في أبعد كوخ

و أعود تاني

أعاير كل أحزاني

و أتشفّىَ

و أنا في حضنك

يادوب بأنعس و بأدّفىَ

و أروح في النوم

و بكرة أقوم

يعدي عليا نفس اليوم

و نفسي افضل كده على طول

ليوم ماأكبر

أو أتوفّى