Pages

أيام عُمري

صحيت م النوم

لقيت الحلم متربّع

على كُمّي

و راسي في حضنك

كأني بنام في حضن أمي

وروحك جنبي ناموسية

و قلبك نور

و سهراية

ينط جنوني من عبّي

يعدي السور

و يجري بلهفته معايا

ساعات م النطه بأتعور

يسيل دمي

لكن آخرتها بأرجعلك

و أسيب عندك

بَقِيت هَمّي

عشان بكرة أنام و أصحى

ألاقي الهمّ متزوّق

بعُقد زهور

و وش كأنه بدر بدور

و عقل مافيش عَليه ضلمة

و حِس رقيق ولا النسمة

و ألاقي عنيكي مبتسمة

أشوفها و أدوخ

و أروح أدفن جتت خجلي

في أبعد كوخ

و أعود تاني

أعاير كل أحزاني

و أتشفّىَ

و أنا في حضنك

يادوب بأنعس و بأدّفىَ

و أروح في النوم

و بكرة أقوم

يعدي عليا نفس اليوم

و نفسي افضل كده على طول

ليوم ماأكبر

أو أتوفّى

11 comments:

بسمه عبدالباسط said...

ليك تاج عندى روح أستلمه بسرعة

... said...

جميلة ورقيقة جدا

dodda said...

مشاعر خالصه
اذيبت مع التقليب على نار هاديه
تم تتبيلها على يد خبير
وصبت فى قالب جميل الشكل...
تسلم ايدك

Mahmoud البطراوى said...

هو ده الطبيعى بتاعك؟؟

ولا المره دى اروع من كل مره

القصيده حلوه اوى بجد
تهبل وتسرق العقل والقلب

Anonymous said...

عيني ياعيني الله اكبر ياكبير ده مش نق ولا حسد على فكرة دي غلاسة سلامي لبوبا ولعمر يا ريس

سبهللة said...

كلام اكتر من رائع
بسيط وجميل
والصور فى الكلام هايلة

KING TOOOT said...

bos bos
إستلمته
لا و إيه تاج من إللي هو
السهل الممتنع
جاري الإجابة يا زميلتي العزيزة
_______________
بثينة
أشكرك جدا جدا
_______________
dodda
يعني كده بقى أبقى أنا الشيف بتاع الأكله دي ؟
طيب بالهنا و الشفا
(:
تحياتي
________________
بطوط حبوب
ألف شكر يا سيدي على تعليقاتك المشجعة دائما
و الحقيقة أنا المرة دي كنت حاسس الكلام قوي قوي
نورت مدونتي المتواضعة
_________________
قلوب حائرة
مش نق ولا حسد إيه بس
دا انتي بدأتي التعليق بكلمتين
عيني
يا عيني
هو في أكثر من كده نق
سلامك وصل خمس مرات يوم الخميس ، خمسة في الشهر
(:
_________________
سبهللة
أشكرك على تعليقك الجميل
و على زيارتك الأولى لمدونتي
و ياريت تتكرر على طول
تحياتي
__________________
KING TOOOT

Anonymous said...

تصدق انى اول مره اقرالك حاجه
والحاجه دى اثرت فيا قوى
انا ماباعرفش اقول حلوه وجميله ومشكور يا اخى وكلام المنتديات ده
بس هاقول دخلت عقلي بسرعه قوى

KING TOOOT said...

وينكي
عيب عليكي ، بقالنا بنشتغل مع بعض أكتر من سنة و لسه داخلة المدونة بتاعتي دلوقت
طيييييييييب ، الخصومات حاتنزل ترف عليكي بقى و إبقي وريني حاتعملي إيه
ههههههههههههه
بجد أنا مبسوط جدا إنك زورتيني و شكرا جدا على تعليقك الرقيق
تحياتي
KING TOOOT

Anonymous said...

هههههههههههه
من اولها تهديدات كده؟؟
والله انا بقالى قرن مادخلتش عند حد خالص
بس دا هايتغير من هنا ورايح
انا ضفتك على الريدر عشان كل ما تكتب حاجه اقفلك على باب البلوج
اى خدمه
:P

Anonymous said...

جميلة جدا جدااا والله من كتر جملها مش عارفة اختار جزء اعلق عليه
تسلم علي ابداعك
تحياتي
طرئعة دماغ