Pages

العتمة نور



لما حياتنا تتخنق وسط القبور
لما النسايم تتسجن جوا الصدور
لما تبقى رحيتنا موت
تغزل الأحلام تابوت
نتخبى فيه
من كل ظلم و كل جور
والحياة تاخدنا جوه
نبقى أحنا هوه
تتحول الأحلام سفينة
تتحول الدمعة لبحور
وتبقى فينا
العتمة نور
نبنى بالأفكار مدينة
نحيا على أفكار ماضينا
تنفرد أفكارنا فينا
تهرب ,, تدور
من غير جتت يحبسها سور
تفرد الأحاسيس جسور
تملى فى السموات بدور
تهدّ أعشاش النسور
أللى كانت يوم رميتنا فى التابوت
فى القبور
نعرف أن العتمة ضلمة
نعرف أنها مقرفة
نعرف بأن النور ده شمس
ترمي الدفا
ننسى كل ماضينا أمس
يبقى صوت كلماتنا همس
بس همس جرىء وراقى
زى أصوات السواقى
زى هفهفة النخيل
زى صوت مركب فى نيل
زى ضحكة بنت صافية
زى كلمة حب دافيه
زى كف ولد جميل
مليانة عافية
يوم ما يبقى الحق نور
يوم ما نلبس القطيفة
يوم ما يبقى لكل واحد
حق فى كنوز الخليفة
كلنا نعرف ساعتها
أن لون العتمة أسود
و أن لون الضى نور

4 comments:

bos bos said...

يوم ما يبقى الحق نور
يوم ما نلبس القطيفة
يوم ما يبقى لكل واحد
حق فى كنوز الخليفة
كلنا نعرف ساعتها
أن لون العتمة أسود
و أن لون الضى نور

بس أمتى هيجى اليوم ده
يوم ما يبقى الحق نور

KING TOOOT said...

bos bos
ما تقلقيش ،، التاريخ نفسه بيقول أن اليوم ده لازم بييجي مهما أتأخر أو غاب ، لأن مهما العتمة طالت النور تمللي أقوى
KING TOOOT

أميرة ويلز said...

يوم ما يبقى الحق نور
يوم ما نلبس القطيفة
يوم ما يبقى لكل واحد
حق فى كنوز الخليفة
كلنا نعرف ساعتها
أن لون العتمة أسود
و أن لون الضى نور

ـــــــ

عجبتنى اوى كنوز الخليفة

ربنا يسمع منك

KING TOOOT said...

اميرة ويلز
أصل كنوز الخليفة كتير قوي
اللهم آمين
KING TOOOT