Pages

ناس في بلدي


في بلادي ناس

بقلوب بتنبض بالضمير

و ناس بتحكم ع المصير

وناس عقولهم شىء خطير

و ناس حمير

و ناس بتهتف للحقوق

و ناس بتهتف للأمير

و ناس بتهرب في الشقوق

و ناس بتصرخ تستجير

و ناس بتشرب وسكي صودا

و ناس بتعطف ع الفقير

و ناس بتلبس لبس موضة

و ناس ماتعرفش الحرير

ودي ناس كتير

* * * *

في بلادي ناس راكبين يخوت

و ناس كتيييير من غير بيوت

و ناس تعيش

وناس تموت

وناس بيطحنها الكلام

وناس بيطحنها السكوت

وناس عيون

وناس ودان

وناس بيحدفها اللسان

جوه التابوت

و عيال بيكبر عمرهم

قبل الأوان

و بنات بيفرغ صبرهم

من غير أمان

من غير عريس

وناس تهيم مع الأذان

و ناس تطرقع باللبان

و مجرمين لابسين ذقون

و مجرمين لابسين بوليس

و ناس بتشحت بالرغيف

و ناس بتتعشى ف باريس

و ناس حيتان

وناس غيلان

وناس بيجمعها الإيمان

وناس حياتهم ليل غطيس

وناس حزانا

وناس تهيص

و ناس من الجوع تستغيث

لاتموت فطيس


6 comments:

نفسنا said...

ندعوكم لزيارة العدد الثالث من مجلة نفسنا

bos bos said...

أنا مررت ليك تاج حملة أنترنت بلا حدود ياريت تشوفه وتاخده
خالص تحياتى لك

أميرة ويلز said...

آآآآآه من وجع الكلمات

بلادي ناس راكبين يخوت و ناس كتيييير من غير بيوت و ناس تعيش وناس تموت وناس بيطحنها الكلام وناس بيطحنها السكوت

خير وصف لاسوأ حال

انت فين من زمان ماتخلش المجلة تشغلك عن المدونة وعن زيارتنا

تقبل تحياتى

semsem said...

نا س وناس وناس وناس

ناس لسه نايمه وناس بتصحى

وناس لسه معرفتش انهم من ضمن الناس


تحياتى على البوست الهايل

KING TOOOT said...

نفسنا
أشكركم على الدعوة و سألبيها فورا ً بإذن الله
______________
bos bos
أشكرك على التاج و لكن عندي تحفظ يمنعني من أني اجاوبه ( التحفظ بالمناسبة مش على الأسئلة و لكن على الفكرة بتاعت الحملة ) خالص تحياتي و أشكرك مرة تانية
______________
أميرة ويلز
الوجع مش في الكلمات ، الوجع في الواقع المرير اللي عايشينة
صحيح المجلة شاغلاني شوية بس أوعدك حاأهتم بالمدونة أكثر، زيارة مدونتك شرف ليا طبعا
______________
semsem
شرفتني زيارتك لمدونتي المتواضعة و أسعدني تعليقك جدا
تحياتي
______________
KING TOOOT

توتة توتة said...

هو انت تقريبا اول مرة اجي هنا
و عجبني اوي