Pages

فزورة التل


حزر فزر أنت و هي

فكروا كده و قولولنا الحل

فزورة عن واحد راجل

زوّد فيها و خلاها خل

لاطع صورته في كل نصيبة

و كل ميدان و كل محل

ناقص يطلع لنا في الحلم

او في الضلمة عشان نتشل

راسم لنا حتة مستقبل

لو تعرفه عقلك يختل

هاري بدنّــا خطط و مصايب

ما عملهاش حتى المحتل

هاري جيوبنا رسوم و ضرايب

علشان نخضع أو نتذل

حتى الأطفال الغلبانة

في أمتحاناتهم أسمة أهو طل

حاجة تخللي البطن تكركب

و الواحد بقى منه إتعل

تقدروا تعرفوا مين يا حبايب

بعد خرابها قعد ع التل ؟

8 comments:

أميرة ويلز said...

هيييه انا اول رد

استمرارا لمسيرة السلام والتنمية التى
دعا اليها الرئيس المذكور اعلاه

ههههههههه

مسيرة ايه ايه الكلام الكوميدى
انا صعبان عليا العيال اللى فى الامتحان دول
على رايك مسيرة ايه وتنمية ايه وهو خاربها اساسا

اجمل تحية ليك ياكينج بجد انت روعة

shady said...

من غيره حسنى الكداب هو والكلابه واقفين على الباب ويطلوا علينا من الشباك بانجازات خياليه عن مدن خراب منسيه

واحد من الناس said...

مش عارف اضحك ولا ابكي
النفاق و الفساد كتروا قوي
مش عارف بصراحه هتتحل امتى
عموما ربنا يستر عالبلد

Ferekico said...

عمال اعصر دماغي و افكر يطلع مين اللي بتتكلم عنه ده .. بس بعد طول معاناة قدرت اتوصل لأنه ممكن يكون اي حد في مصر غير الريس

طب بالله عليك مش انا برده ذكي؟:D

KING TOOOT said...

أميرة ويلز
سعيد بمرورك و أتمنى أشوفك دايماًفي مدونتي المتواضعة
__________________
شادي
يا زعيم ما هو أنت عارف موضوع الأنجازات دي علشان خيالنا يبقى واسع ،، تدريب لخيالنا يعني
___________________
واحد من الناس
لا أبكي ،، و أبكي بحرقة كمان
معلش كان نفسي أقول لك أضحك بس ماينفعش
___________________
فريكيكو
ايه يا بني ده ،، دا أنت ذكي قوي
___________________
KING TOOOT

HANY said...

ولاء جمال محمد حسنى مبارك

وربنا يدينا ويديك طولة العمر

وتقبل تحياتى

أشرف حمدي said...

انا عارف الحل
العجل في بطن أمه
الا هي أمه اسمها ايه ؟ حد يعرف ؟؟؟

KING TOOOT said...

هاني
تحياتي و تقديري
معلومة جديدة عليا موضوع ولاء ده بس أنت عرفت منين أنه حايسميها ولاء
________________
أشرف حمدي
معقول ،، صاحب أبداع كراكتوز عندنا في المدونة المتواضعة بتاعتنا دي !!! أنا سعيد جداً بتعليقك
بخصوص موضوع الست الحاجة أمه فأنا ما أعرفش ، بس كفايا علينا أسم أبوه
________________
KING TOOOT