Pages

عند نقاية الصحفيين


كنت ف يوم خمسة و عشرين
عند نقابة الصحفيين
واقف وسط الناس بأتفرج
مع ناس كانوا متظاهرين
الناس كانت مليا الشارع
و أنا من طبعى غاوى شوارع
أصلى بأحب الناس و الزحمة
و آكل لحمة راس و كوارع
يومها لقيت الشرطة بحالها
مليا الدنيا بكل رجالها
و كل ولادها و كل بناتها
و كل شيوخها و كل عيالها
فيه ناس منهم لابسة الميرى
و حبه تباعهم لابسة حميرى
آسف غلطة مش مقصوده
أقصد أقول لابسين كشميرى
فجأة دار الضرب علينا
من قدامنا و من تحتينا
و أحنا بقينا فى وسط الدايرة
لا استسلمنا ولا أحنا جرينا
الأغرب من كل غريب
و الأعجب من كل عجيب
أن الضرب ماجابش نتيجة
ولا خلانا فى يومها نغيب
ولا خلانا نقول ما تكبر
ولا خوفنا من المتقدر
مع أننا م الأول كنا
عارفين أن الضرب حايحصل

10 comments:

shady said...

غبى راجل غبى ما يعرفش اننا عناديين
وعلى الظلم والضيم مش ساكتين
وانت لا احنا فى البلد يا ابو راسين

KING TOOOT said...

شادى
ملعوبة يا باشا
KING TOOOT

Ahmed Shokeir said...

ايه الصورة الخطيرة دى... للوهله الأولى أنا افتكرتهم بتوع كليه الفنون الجميله اللى فى الزمالك بيرسموا لوح على النيل

وبعدين حرااام الواد المفترى الصايع ده نازل ضرب فى 14 واحد مره واحده

ROMANTIC ROSE said...

تفتكر التاريخ هيعيد نفسه يوم 7/9 ؟

KING TOOOT said...

رومانتيك روز
تفتكرى التاريخ مش حايعيد نفسه يوم 7/9 ؟
KING TOOOT

Haitham said...

هما مفروض يدركوا إن الضرب دا خلاص بقى موضة قديمة..يعني الناس اتعودت ومفيش حد فارق معاه يضرب ولا يضرب ..لازم يدوروا على طريقة جديدة لحبس أنفاسنا

KING TOOOT said...

هيثم
يعنى جتتنا نحست ؟
و ماباقاش عندنا حاجة نخسرها ؟
يمكن
KING TOOOT

KING TOOOT said...

احمد
ماهو فى الاخر خد جزاء صياعته و بات فى الحجز و الله اعلم حصل فيه ايه جوه
KING TOOOT

ROMANTIC ROSE said...

التاريخ اعاد نفسه بالفعل و المره دي رويترز ما خلتش لحد كلمه ..
نعمان جمعه قال اتخنقنا و انا بقول اتفضحنا !!

KING TOOOT said...

رومانتيك روز
لا أحنا أتوكسنا
KING TOOOT