Pages

أصل الحياة



أصل الحياة
زي ما قال الكتاب
مية وتراب
يعني طين
أنتوا ليه مستغربين
زي ما قال الكتاب
مية و تراب
يبقى طين
والطين حنين
يتحط جواه الجنين
يصبح ثمر
فوق الشجر
أو عيدان متمرجحين
من ريح في ليل
في ضوء قمر
نازل على جبينها المطر
والمطر فوق الجباه
يدي لون أخضر مريح
هو دا لون الحياة
والجنين
أبو أصل طين
أبو خير بيكفي المحتاجين
يفتح دراعة للحياة
يلقى التراب
يحضن سماه
هو و الأحلام معاه
يبدر الخير في الهوا
تنزل بذرتين سوا
تغرز في طين
تصبح عيدان متمرجحين
منورين
وسط الحياة
هوه دا معنا الحياة
خير كثير
شمس ظهر وظل ليل
والمعنا كان
موجود زمان
قبل ما يحبي الزمان
كوكب الأرض السعيد
كان وحيد
كان كله خير
لكن وحيد
تتفرد أيام كثير
كل فجر وكل ليل
وكوكب الأرض السعيد
تعيس عشان عايش وحيد
آم نزله من السما
إنسان جميل
أسمه آدم
واخد الايمان دليل
ومعاه مراته و أمنا
تعبد وتشكر ربنا
كوكب الأرض أنبسط
والضحك على خده أنفرط
وشه أنفرد
ومر النسيم العليل
بس دا كان في البداية
قبل ما تبوخ الحكاية
آدم وحوا خلفوا
خلفوا أولاد كثير
والولاد جابم ولاد
وتقسموا كل الأراضي
والأراضي صبحت بلاد
والبلاد لازم تحارب
لجل ما يزيد العناد
مزعوا جسد ألّي كان
كوكب الأرض السعيد
ويرجع الكوكب تعيس
يبكي وينـزف على الحياة
وعلى المطر
والقمر
والشجر
والعيدان
ألّي كانوا مزروعين
وسط طين
الطين دبل
والورد راح فوق الجبل
لجل ما ينجى ببزرته
لجل ما يعيش وحدته
ويبدر الخير في الهوا
تنزل البذور تموت
وسط طين كان أرتوى
دم الجنود
والشجر صالب قوامه
بس كان راح فين مقامه
يبكي الشجر
يرضى بأساوة القدر
ويعيش حزين
زي طفل يتيم
هجراه السنين
بصبح شجر عريان
من غير غطا
أصل الغطا الأخضر سقط
دبلان حزين
تفضل فروع
تبكي بدموع
على الأنسان
و فى عز برد وعز جوع
تسقط فروع
والشجر
أبوورد نادي
لا ورد فيه
ولا عش فيه
ولا فرع أخضر يستره
يغطيه
وألف آه
كل دا ولسه هنا
أحفاد أبونا وأمنا
بيسألوا ويفكروا
يمكن في يوم يتوصلوا
لحياة جميلة ممكنه
على كوكب الأرض السعيد
ويدوره في كل أتـجاه
على أصل كلمة الحياة

4 comments:

Romantic Rose said...

سلام عليكم .. مش ممكن يا توت .. حلوه حلوه حلوه .. ما شاء الله .. مالهاش حل من الرقه و البساطه و النضج .. حاسه ان الوحي المره دي كان جي ف الجون .. لازم تحاول تنشرها في مجله او جريده و انا متاكده انها هتكون بدايه حقيقيه ليك ..

بس استني و بلاش كروته .. دي خلاص قريناها دلوقتي من علي البلوج بتاعك .. الاسبوع بعد الجاي ان شاء الله عاوزين واحده جديده لبنت مصريه .. ولا اكمنها بقت نصف شهريه هتسيبلنا ننشر القصايد البايته ؟؟

ما تبقاش بخيل و اكتب دايما يا توت .. ربنا يوفقك.

KING TOOOT said...

يا رافعه معنوياتى دايما ً يا روز
على فكرة أنا عمرى ما حاولت أنى أنشر أللى أنا بأكتبه خالص فى أى جريده أو مجله مطبوعه مش عارف ليه
يمكن الموضوع عندى هواية اكتر من انه احتراف و كده
بس أوعدك أنى أفكر فى موضوع النشر ده
أما بقى بخصوص القصيدة القادمة لجريدة بنت مصرية فأنا بجد نفسى القصيدة دى تتنشر فى بنت مصرية و حقيقى نفسى أعرف رأى الناس فيها بالذات بجد
و اوعدك بكل جديد دايما ً ان شاء الله
KING TOOOT

shady said...

الله عليك الله ايه الجمال ده انت كاتب معلقه ايه الالياذه الشديده دى لا جميله اوى انت كتبت قصة الحياه على كوكب الارض فى قصيده سلسله وسهله وغاية فى الروعه
ربنا يكرمك
اه على فكره انا بضم صوتى لرومانتك
شعرك ده فعلا شعر محترفين ويستحق النشر

KING TOOOT said...

و الله يا جماعة انا مش عارف أشكركم أزاى على التشجيع ده ,, و سعيد جدا ً لدرجة ما تتصوروهاش حقيقى
يا شادى أنا فعلا ً سعيد جدا ً أنها عجبتك و كنت مستنى رأيك لأنه مهم ليا جدا ً و أتمنى أنى أكون عند حسن ظنك دايما ً و بالنسبة لموضوع النشر فأنا فعلا ً بدأت أفكر بجدية فى الموضوع بس يمكن لسه محتاج وقت شوية
و أنت كمان حارمنا من حاجاتك الحلوة ,, لدرجة أنى قلقت عليك لايكون سيكا بعث لك أتنين من زوار الفجر
بس دلوقتى أتطمنت
KING TOOOT