قلبي إللي كانت ضحكته بتطير بعيد
وكان سعيد أكتر من أكتر سعيد
ما أعرفش ليه الفرح جوّاه إنكسر
حواليه ملايين البشر لكن وحيد
من قلبي قلت خلاص للدنيا غووري
خدي معاكي المال وحبّة غروري
آخرتها حاأتشال كَفَن جوه التابوت
ما أنا في طابور الموت مستنّي دوري
عالعيشة مرغم والحياة جابراني جبر
والعمر عدّى والمرار شبّعني صبر
من صغري أنا مفتون ،، عايش غريب
مستنّي روحي تغيب بقى وتروح لقبر
أنا قلت مرّة للألم ما كفايه همّ
وتروح تشوف غير جتتي تملاها غمّ
ولا مرّة رد ولا حتى شاور بإديه لحد
طلع الألم من حظّي أنا أعمى و أصمّ
يا حبيبتي ما إنتي من زمان عارفة الحقيقة
لو كان بإيدي ما كنت عمري أبعد دقيقة
و العُمر دوُر ،، لابد يوصل منتهاه
أمّا الحياة موجودة في عنيكي البريئه
.jpg)
