Pages

الحب يا نااااااس


الحب ياناس

مش يوم و نسيب

ولا قلبين فرو

وجوز دباديب

ولا عيد و بتاع

ودراع في دراع

ومواقف خالية من التأديب

ولا شكل مريب

و في وقت غريب

ولا هي النعجة

وهو الديب

ولا هو هداية

عيال بتجيب

سلسلة ماشاء الله

وعقد صليب

ولا لحظة ضحك

وعمر كئيب

ولا آسف

بعد سنين تعزيب

الحب يا ناس

إحساس

وشعور

وقلوب بتشقشق

فجر و نور

وبحور في عيون

عايمين في بحور

من دمع الفرح

أبو موج بنّور

ورموش ألماظ

وشموس و بدور

يحضنها الضحك

داير مايدور

الحب

حقيقة

و نظرة جريئة

وصدق

وفعل

ونيّة بريئة

الحب إن إنت

تسعد قلب

حبيبك دايما

كل دقيقة

12 comments:

ميرا ( وومن ) said...

بس مين يعرف ويفهم ويقدر

هو كفاية الأفلام والمسلسلات اللي بوظت معاني كل حاجة حلوة وبقي كل شئ معناه مهزوز مختلط

-------

كلماتك في غاية الرقة والرقي

تقبل تحياتي

لـــولا وزهراء said...

وليد

-*-*-*

تحفه بجد
اكتر من رائع
انت عارف انى بافكر اعمل بوست عن مفهوم الحب بس بعد كلامك ده صعب انى الاقى تعريف اجمل من كده للحب


"الحب إن إنت

تسعد قلب

حبيبك دايما

كل دقيقة "

مش لاقيه اى كلمه تتقال بعد هذا الكلام اللى اكتر من رائع
تسلم ايدك يا وليد

زهراء

ـ-ـ- أحمد عبد العدل-ـ-ـ said...

ربنا يسعد قلبك دايماً ياملك :)
-------------
على الهامش : أنا فى جدة لكن القلوب مسلمة قبل الأيادى أكيد
دعواتك ياأبو عمر

فاتيما said...

بص يا وليد
طبعاااااااا القصيدة
كلها تحفة
من اولها لحد آخرها



بس النهاية بتاعتها
فى وجهة نظر أختك الغلبانة
هى معنى الحب و تجسيده



فكرة انك عاوز تسعد مخلوق آخر
و لما يكون سعيد
انتا قلبك يرفرف م الفرحة
و تحس بقيمتك قوى
و بلزمتك فغى الدنيا
و بإن ربنا خلقك
تكون سبب فى البهجة
و النفع على شخص تانى
فى الحياة دى

ممكن يكون
ابن او حبيب
او زوج او اخ او أم
او صديق او زميل أو حتى حد غريب عنك متعرفوش
لكن قررت تساعده
و تصدرله بعض من خير ربنا عليك

الحب ملوش معنى
و لا قيمة غير لما يكون عطاء

ربنا يسعد كل ايامك انتا
و هبة و عمر بيكا
و يزيدكم من كرمه
يارب و يبعد عنكم كل شر

بحبكم جداااااا
معلومة بل حقيقة تاريخية
المفروض مفروغ منها بس هكتبها برضو

صيدلانيه طالعه نازله said...

الله عليك يا وليد
الحب فعلا احساس و شعور
اننا نحس باللى بنحبه و نخاف عليه بجد و ندور على مصلحته و نحتويه
و نخليه ميشوفش فى الدنيا غير اللى بيحبه
هو ده الحب اللى اعرفه

ندى الياسمين said...

ده الى يفهم الكلام ده مين

الجيل الى متربي على افلام صفوت الشريف وصبيانه؟؟

تسلم اديك يا استاذنا
منين اجيب الناس لمعناة الكلام

sony2000 said...

الحب إن إنت

تسعد قلب

حبيبك دايما

كل دقيقة


alla
gamdaaaaaaaaaaaaaa gdan
thnx:)

محمد فؤاد (صاحب عمود النور) said...

الله
الله
الله
ايه ياعم وليد الكلام العالى دا|؟؟؟

كلمات حلوة وتشبهات احلى
تسلم افكارك

мαησηα said...

لا حيااااااااااة فيمن تنادى يا وليد

ربنا يباركلك ويرزقك ومايحرم قلبك ابدا من فرحته قول امييييييييييييين


=================

ممكن طلب ادعيلى انت وبوب ابقى زيكم

يعنى الاقى حد فاهم الحب زيك كده

وابقى انا حلوة اوى زى بوبو علشان

ربنا يرزقنى بحد حلو اوى زيك

ممكن انه طلب بس يارب تفتكروا تدعولى

فاتيما said...

صباح الخير علي الجميع

يا جماااااااعة
أنا بعتذرلكم بشدة
لأن حد ابن حلال
دخل مدونتى
و بعت لينكات
و نشر بوست بشع عليها
و أذى مشاعركم
و عيونكم


انا شيلت الحاجات
دى خلاص

و حطيت بوست جديد
عشان اشرح فيه اللى حصل
بس مش راضى يطلع ف الريدر


معرفش ليه؟؟


المدونة شكلها
فيها مشاكل فنية


انا غيرت الباس ورد القديمة
لأنها كانت سهلة
و غالبا ابن الحلال خمنها
و تخمينها نجح
أخويا عملى باسورد
جديدة معقدة
و عالله اللى دخل دا
ميعرفهاش هيا روخرا


و أختكم بخير
متقلقوش
ماما بس جالها حالة هلع
و عشان كدا
مش هفتح المدونة تانى
الا لما أعرف اصلح اللخبطات دى


الناس اللى إتبعتلها لينكات منى فيها سخافات
معلش .. بجد معلش


و عاوزة أشكر خيخة جدااااا
و علا صيدلانية طالعة نازلة
و بطوط حبوب و خالد همس
و د.ستيتة و وندا
و كل حد نبهنى و كلف خاطره يتصل
من الساعة اربعة الفجر
لحد كتابة التعليق دا

منحرمشى منكو

وأسفة للمرة التانية

KING TOOOT said...

ميرا ( وومن ) ا
أشكرك جدا على تعليقك
وفعلا على رأيك الأفلام و المسلسلات بوظت معاني كل حاجة
_________________
زهراء
منورة المدونة و التعليقات كالعادة
إكتبي عن الموضوع
عايزين نعرف رأيك إيه
تحياتي
_________________
أحمد عبد العدل
منور يا صديقي
وإن شاء الله القلوب و الأيادي تلتقي عن قريب بإذن الله
خالص تحياتي
_________________
فاتيما
موافقك جدا جدا
وخصوصا في المقطع ده من تعليقك
=====

ممكن يكون
ابن او حبيب
او زوج او اخ او أم
او صديق او زميل أو حتى حد غريب عنك متعرفوش
لكن قررت تساعده
و تصدرله بعض من خير ربنا عليك

الحب ملوش معنى
و لا قيمة غير لما يكون عطاء
=====
في رأي الحب كده بالظبط
وأي حب غير كده يبقى مش حب
الحب بيصفي الروح من الطمع و الشر و الحقد
مافيش أب أو أم ممكن يحقد على إبنه أو يطمع فيه
صح ؟
نورتيني
وربنا يرجّع إبن أختي بالسلامة
_________________
صيدلانية طالعة نازلة
أشكرك جدا على متابعت مدونتي
وطبعا بأشكرك أكثر على تعليقك
وسلامي لزوجك المحترم
خالص تحياتي
__________________
ندى الياسمين
وليه السيرة دي بس
ماأحنا كده كويسين
منورة يا فندم
وحشانا و الله
__________________
sony 2000
أشكرك جدا
خالص تحياتي
وتقديري
__________________
محمد فؤاد
إنت فين يا واد إنت
مختفي فين
؟؟
الدنيا مضلمة من غيرك يا صاحب عمود النور
__________________
мαησηα
يارب يرزقك بكل الخير
على قدر فضله وليس فضلك
وعلى قدر عطائه وليس عطائك
ولا يحرمك الخير أبداإن شاء الله
-----------
حاأخلي بوبو تدعيلك هيا كمان
أصل هي دعوتها مستجابه أكتر مني بكتير إن شاء الله
نورتيني
___________________
فاتيما
لا محتاجة أسف أول مرة
ولا مرة تانية
بس يا بت بلاش عبط
___________________
KING TOOOT

Honda said...

مدونة الربح
مدونة الربح من جوجل ادسنس
profit blog
مدونة الشلة
مدونة الشله
شات الشلة
شات الشله
مدونة شات الشلة
دردشة شات الشلة
مدونة بنات كول
مدونة بنات
بنات كول