ظل عيوني

الظل السارح

تحت عيوني كان إمبارح

جارح نفسه

واقف بين إحباطه و يأسه

بيلملم أحزانه و عجزه

و بيحضن بالنظرة عيونك

و يجفف بدموعه جفونك

و يغطي بأحزانه شجونك

يفديكي بحياته و نفسة

الظل ده عمره

ما قابل منك حزن في عمره

ولا يوم شاف

ولا يوم منك شك و خاف

و حايفضل على إيدك صامد

وسط الموج و الضرب الجامد

لا حايسكت ولا يصبح خامد

ولا يوم حاتسميه خوّاف

و عد الظل

عمره يا عمري في يوم ما يضل

أو حتى يتوه

أو مافيا الأحلام ياخدوه

وعد الظل في عيني حقيقة

أصل عيوني ظلالها بريئة

دايما واقفه بألف طريقة

حوالين قلبك و بيحموه