Pages

صباح مبكر


تصحى عيوني

تشيل ستارة رموشي

تلقا عيونك نعسانين على حلمهم

تضحك جفوني

تمدي إيدك تحوشي

لتشوف جفونك و هي بتضمهم

كفك في حضني

و قلبي بين حضن كفك

و كفي مابين خصلتين بيلمهم

صوتك ياخدني

بسحره من بين شفايفك

لو مرّه كلمة يوم حاتخرج منّهم

إمحي القوادم

ووجيعة الروح يا روحي

وروحي داوي جروح مشاعري و همهم

لعيالنا لازم

تحكي أو يوم تبوحي

عن حب صادق بين أبوهم و أمهم


7 comments:

ياسمين حميد said...

الله! ه

BoBo said...

بجد مش قادرة معلقش.. كل مرة امنع نفسي واقول احسن الناس تقول مراته وبتجامله، بس المرة دي بقى لازم اعلق واقول اني بحبك واني سعيدة وفخورة اني مراتك وانك بتكتب كل مرة احلى من اللي قبلها
الله عليك

بثينــــــة said...

مش ممكن كم الدفء والرقة هنا
بجد أحلي كلام ممكن يتقال في وصف صباح ملؤه الحب
فرصة ان بوبو هنا
أحييكم انتم الاتنين مع بعض

بطوط حبوب said...

روعه
اقل كلمه تتوصف

كراكيب نـهـى مـحمود said...

صورة ناعمه رسمتها الكلمات
حلوة اوي بجد

dodda said...

ربنا يديم عليكو النعمه
ويباركلكو فى الاولاد
وبوكيه ورد ربيعى للجميله بوبو
عشان خلتك تكتب الكلام الحلو دة

KING TOOOT said...

ياسمين حميد
الف شكر
_________________
bobo
بأعشقك
و ياريت أوفيكي بس جزء بسيط من حقك بالكلمات المتواضعة دي
لأن حبي ليكي أكبر من أنه يتوصف بأي كلام
_________________
بثينة
كل حاجة يا بثينة لما بتكون حقيقية و صادقة بتكون دافية حتى لو في عز الشتا
نورتيني
_________________
بطوط حبوب
شرفتني يا صديقي
_________________
نهى محمود
سعيد جدا بكلماتك و زيارتك
أيه الغيبة دي كلها
__________________
dodda
مليون آمين على دعواتك
و مليون شكر على البوكية
على فكرة ،، بوبو مش بس خليتني أكتب الكلام ده ، هي خليتني أكتب كل الكلام إللي في المدونة و أكتر منه لسه ماأتنشرش
تحياتي
___________________
KING TOOOT