Pages

فزوووورة شووووو

الست فيونكة ام حلاوة
مذيعة ولا كل المذيعات
عندها برنامج أسطورة
متذاع على كل القنوات
طبعاً مش قنوات الأرضي
دا كلامنا ع الفضائيات
و الست فيونكة أم حلاوة
بتغطى كل المساحات
و بتضرب كل الرجالة
و تعوّر كل الستات
و بترمي أسئلة فتّاكة
تقتلنا زي الحشرات
و الست فيونكة أم حلاوة
عندها فكر و نظريات
عن تعميم السينما الصامته
إللي حوارها بالأجساد
و آرائها جريئة و عفوية
علشان كده غرقانه حسّاد
متخصصة في كلام السيما
و الدين وفتاوى البوتيكات
و الأحداث الجارية ضروري
تاخد من وقتها حلقات
وجع الناس عندها كده دايماً
ينفع و بيجمع ألوفات
على كام راجل لابس بدلة
على جمهور أولاد و بنات
و كمان كام فنانة معتزلة
من إللي القطر عليهم فات
مابقوش يطلعوا جوّه السيما
ولا حتى في البكابورتات
قالوا خلاص بقى نعمل توبة
و نطرطش ع الفضائيات
و أتفقوا مع ست فيونكة
علشان سبوبة الدعايات
طلعوا في حلقة عن الحرية
و أتكلموا عن الأعتقالات
طلعوا في حلقة عن الطعمية
و هما بياكلوا غزل بنات
و لأن العالم حرامية
و بيسرقوا مخها بالذات
ف الست فيونكة من أشهر
عالم مطاريد القنوات
أتطردت و أتهانت جداً
في كتير قوي م الفضائيات
علشان كده ماعاديتش تقدم
برامجها في أم أشتراكات
و بقت تعرض في أبو مجاني
علشان توفير النفقات
تقدروا تعرفوا بقى بأتكلم
عن آنهي فيونكة يا حضرات ؟؟

9 comments:

Blue Magnifier said...

هاااااااالة سرحااااااااان
مش هتقدر تغمض عينيك
:D

مأمون المغازي said...

فيونكا سرحانة

في شد الوش ليها إبداعات

ترفع الأراذل

وتمرمض البكوات

بعد بكرا تلبس عباية

وتقول رمضان شهر الصلوات

بس قبل ما تصلي

تعال شوف الرقصات

دي رقصة تعيلب ودي رقصة حنيجل

ودي رقصة الأفوات

فيونكة حمرا ومولعة

تلملم العيلة يا محلى اللمة

بس حولين واحدة مخلعة

تروح للس تخليها بنت مدلعة

مسخة الحريم يا عالم

وريها مين ....؟ عارفين

لما عارفين .... ليه نكون امعه

كدا أكون عرفتها ولا لأ يا عم كينج

تحياتي وممكن تنشر الكلام دا هناك يابو صوت عالي

تحياتي لك ولكل أعضاء المجلة

رمضان كريم وكل عام وتعلي صوتك

والناس كلهم يصوموا ويعبدوا ربهم شوية صح

يا مصر اكتب إليكي رسائلي said...

تحياتي ولحد عندكم جي اقول
بمناسبة الشهر الكريم كل عام وانتم والأسرة الكريمة وكل الأصدقاء والأحباب بالخير ومصرنا الحبيبة كلها بالخير واليمن والبركات

shady said...

هالة سرحان
لازم تغزق عينيك

أجدع واحد في الشارع said...

كل سنة وانتو طيبين
انا خلاص خمت عنيا من الدنيا

عمر said...

والله كلهم واحد دى بقت عيشه تقرف ربنا يريحنا منهم

KING TOOOT said...

بلو ماجنيفر
الحقيقة أنا بأقدر أغمض عنيا
___________
مأمون المغازي
جميلة كلماتك و معانيك
طبعاً تبقى عرفتها يا عم مأمون
___________
يا مصر أكتب إليكي رسائلي
و أنت طيب
___________
شادي
وحشنا يا باشا
ربنا يجعل كلامنا خفيف عليهم و مايجبلناش التغزيق
ولا الخوازيق
____________
أجدع واحد في الشارع
طيب و لما تغمض عينك من الدنيا حاتفتحها فين ؟؟ بلاش اليأس يا جماعة و ماتخلوش برامج الدش تحبطكم للدرجة دى
____________
عمر
عندك حق يا عمر و الله
بس أنا عندي أمل أن التلفزيون و الفضائيات تتصلح إن شاء الله خلال القرن ده
ههههههههههههه
____________
KING TOOOT

واحد من الناس said...

احقر وارخم مزيعه شفتها
هاله سرحان
قمة التفاهه و السفله

اتفوه

أحمد said...

يا تقل دم هالة... ميشفلهوم مذيعة نظيفة شوية. أنا عارف فنانين بيجولها ليه أساسا.