Pages

إفتح ببان قلبك



إفتح ببان قلبك على الدرفتين
و ألمس بشاير فرحتك
خد لك يومين
و أفرح و سلم ع الأيدين
الممدودين
و أنسى الليالى المكسورين
و الناى الحزين
و أسمع تراتيل اللى جاى
من بعيد
بدراعات مفتوحين
و ألمس حاجات
و محتاجات
كانوا على جناح الأمل
متشعبطين
أحضن شعورك بالنجاح
بأشتياق
و بحنين
و ألمس سلاسل م الذهب
فى السما متعلقين
و مشدودين
على نول حرير
ماسكاه أيدين
ع الحب و الخير مفطومين
أنسى بقى كل اللى فات
المتاعب و السكات
و الصراخ و الأنين
و الدموع جوا العينين
مش حاييجوا تانى غير يوم الفرح
أو فى مره لو يكونوا
مطروفين

12 comments:

ملك said...

انت دخلتنى فى حالة بهجه جميلة.شكراً

KING TOOOT said...

ملك
جميل أن حالات البهجة دى تبقى موجودة من وقت للثانى
KING TOOOT

Dalia Fouad said...

كلامك جميل جداومعبر أوى وفعلا يتحس

ماشى الطريق said...

يا إبنى إنت جامد جداً صادق جداً
ومن أكتر الناس اللى حبيت شعرهم فى حياتى
بجد مش هزار

shady said...

طب اعمل ايه لو كانوا دايماً مطروفين

حلو كالعاده يا عم كينج

KING TOOOT said...

داليا فؤاد
مرحبا ً بيكى زائرة دائما ً عندنا إن شاء الله و شاكر جدا ً على التشجيع
______________________
كتابة
الله يخليك يا كتابة و شكرا ً على الكلام اللى بيرفع روحى المعنوية ,, و خصوصا ً أنها اليومين دول مش ولا بد
______________________
شادى
وحشتنا يا زعيم ,, بقالك كتير مادخلتش عندى ولا جيت تزورنى مع أنى أنا عندك على طول ,, معلش ,, أنا عارف أن مشاغل الحزب بتزيد و كمان أعضاء الحزب ماشاء الله فى أزدياد مستمر ,,, مع الأسف
KING TOOOT

islam yousef said...

مش عهارف اقول ايه ؟
انت خساره و الله ,
انت مين؟ انت ايه؟ انت الأبنودى و اللا جاهين و اللا فؤاد حداد و اللا بيرم
المدونه بتاعتك كلها تستحق انها تكون على الورق و فى البيوت وو فى الشرايط و القلوب ...انت بتلامس القلب ..بتلامس الواقع ..دى مش مبالغه او نفاق’ بقولك شوفلك حل و شوفلنا

KING TOOOT said...

يا عم أسلام ألف ألف شكر للكلام الجميل ده ,, وياريت بس نوصل نبقى ربع الناس دى ,, بس موضوع أن الكلام أللى أنا بأكتبة يطبع على ورق ,, أيدى على كتفك , تفتكر ممكن حد يطبع ديوان شعر عامى لواحد مش معروف و هاوى ,, صعب جدا ً إنما نقول يا رب
KING TOOOT

Romantic Rose said...

رائع كالعاااده يا كينج .. بجد حسيت اني ببتسم و بقتح قلبي و ايديا فعلا ..

سبحان الله دايما بتيجي ابياتك ماشيه مع حالتي النفسيه .. و علشان كده بحب ازور مدونتك ف اوقات متفرقه .. ربنا يخليك و تمتعنا بالكلام الحلو دايما ..

freedom said...

هقول ايه؟
عندما يخرج الاحساس بهذا الصدق
يجب أن تكون الكتابة رائعة
يا كينج
فعلا اسم على مسمى
أتساءل بينى وبين نفسي
كيف لم أزر هنا من قبل ؟؟
وأندم كثيرا

KING TOOOT said...

رومانتيك روز
و أنا دايما ً بأنتظر تعليقك يا روز علشان فعلا ً بيدينى دفعة للأمام
ربنا ما يقتع لك عادة يا روز و نشوفك على طول عندنا
___________________________
فريدوم
مرحبا ً بيك دايما ً و حقيقى أنا سعيد بتشجيعك
بالمناسبة ,, مدونتك ممتازة يا فريدوم و كتاباتك فيها شىء مختلف و جميل
KING TOOOT

إتينا said...

مش عارفه ليه لفيت فى المدونة بشكل عشوائى .. عجبنى اوى .. مش حالة البهجة الوقتيه .. لأ ان تكون فى روح لسه ماوصلهاش معنى العنين المطروفين ..