![](https://blogger.googleusercontent.com/img/b/R29vZ2xl/AVvXsEgA5xyOeUuLUoj9nskSKjm5T0Krh1mAwTvz2dAt0r42xzS4q7kUEih18biP-MR_0BJn1rWZSI-hsJD09yw51mu-nqEkGJb9xe_YrWuYnTXnd9j_OHeVqpNcuqzHm5KBIuRjAKia/s400/google-tv-ads.png)
قصايد أباحة
في غاية البجاحه
وفدادين وقاحة
في حق إللي مات
برامج بذيئة
وألفاظها بيئة
تشعلل حريقة
في كل الشاشات
تمجّد حرامي
بإسلوب درامي
وتكتب أسامي
على التابلوهات
يا إعلام يا واطي
حاتفضل مِطاطي
ولابس بلاطي
فلول البلاد
حاتفضل مهاود
لكذبك معاود
عن الحق حاود
وكلّك فساد
كلامك نميمة
وصمتك جريمة
وحربك شتيمه
على البالونات
برامجك إثارة
عروضك دعارة
ضيوفك سكارى
ولا الكباريهات
بتهتف لخاين
وتخرب مداين
مادام الزباين
بتدفع كاشات
ياخدّام بأجرة
لمنظومة فاجرة
لزوم المتاجرة
من الإعلانات
يا أجهل وسامه
يا أغبى إبتسامه
يا نبع الرخامه
على المخلوقات
يا بوق الحكومة
يا دلدول يا بومه
يا مليان بارومه
في كل الحالات
يا لامم و داير
بأعداء يناير
تركّب ستاير
لعقل العباد
يا سايب مكانك
وسانن سنانك
وسايق جنانك
على الناس ساعات
حاتفضل بخسّه
تفكرنا لسّه
بناس مستفزّة
بتحكي حكايات
كلام مش حقيقي
ينشّف في ريقي
ويرسم طريقي
على الدبابات
مسيرك حاتنظف
ولازم حاتعرف
تبطّل تخرّف
وتنسى إللي فات
وتبقى ف مقامك
وليك إحترامك
ويصبح كلامك
صحيح معلومات
وتبقى الوزارة
في قلب المغارة
بتاكل بصارة
وسكر نبات
ونردم عليها
ونربط إيديها
ونكتب إليها
خطاب الحداد
1 comments:
رائعة جدا رغم الشاتيم اللى فيها ..
بس فيها من المرارة ما يعبر عنى بشدة
فوق الرائعة كمان
مسيرك حاتنظف
ولازم حاتعرف
تبطّل تخرّف
وتنسى إللي فات
تفتكر ؟؟
مش باينلهم
Post a Comment