في العيد يا عمري من كل عام

كل عام و عنيكي بتفتّح في حضني

كل عام و إيديكي من لمسه بتاخدني

كل عام و الحب بيننا مش كلام

وكلام ما بيننا في الحب يملى كام ألف عام

ولا لحظة في وجودك تفوتني

والصمت في وجودك كلام

والحرب في وجودك سلام

والنظرة بلسم للآلام

واللفته قمة الأهتمام

يا حبيبتي فات كام ألف عام

علشان لساني يقول حبيبتي

علشان يكون قادر يفوت من سجن خيبتي

ويبقى أسود تختفي من تحته شيبتي

أو ضيف مشاهد و السلام

مليون بخير في العيد يا عمري من كل عام

شوفي كام سنة

شوفي كام سنة

من يوم ما عيني شقشقت على نور صباحك

يومها بقى الوش الحزين

مبسوط و ضاحك

وعشقي دام ليكي و بقيت

ساكن في إحساسك و قلبك

كأنه بيت

كأني عمري ما يوم بكيت

ولا كنت يوم مهزوم و جيت

عل يوم نجاحك

يا حبيبتي كام مليون سنة

فاتت علينا

والحب دفيان بالهنا

وماسك إيدينا

يا حبيبتي كام مليون سنة

كنتي هنا

و كنت أنا

فارد جناحي في السما

بأحضن جناحك

من غير عيون

أحضني قلبي الضعيف

وأفردي علي كتفي شال

خللي إسمي يتحسب ضمن الرجال

بددي صمتي المخيف

غرّقيني بالآمال

شيلي من روحي المجون

والجنون

أو أي زيف

على أي حال

إنتي جوّايا الخيال

إنتي زرع و نور و ريف

إنتي بيت في قصيدة م الغزل العفيف

إنتي جنة من جمال

إنتي نسمة عصر في فصل الخريف

إنتي كل مافيكي شيء غالي و شريف

بس أغلى مافيكي قلب رقيق حَنون

وبريء كما قلب العيال

ومالوش في شغل الكدب و أمور الأحتيال

ماسك إيدين قلبي الكفيف

بيعلّموا إزاي يكون

أقرب ما يمكن م الكمال

من غير مايحتاج العيون

إعتذار

بأعتذر يا حبيبتي ليكي

وأنا مدبوح على ظروفنا

ولا عارف أزيح عنّك

وعنّي وشوش بتقرفنا

ولا عارف بإيدي أطول

وأجيب لك م السما حفنة

ولا عارف أبطّل أخاف

أو أقتل يأسنا و خوفنا

ولا عارف يا "بوبو" أطير

ولا عارف أكون قنديل

ولا عارف أخللي الحق

يجينا في يوم و يعرفنا

بأعتذر يا حبيبتي ليكي

وأنا مدبوح على ظروفنا

يوم لقانا .. زي النهاردة

زي النهاردة من خمس سنين كان يوم تاريخي في حياتي أنا و بوبو

في اليوم ده إتقابلنا أنا وهي في معرض الكتاب

ومن يوميها ماأفترقناش أبدا

ومن يوميها بدأت حكايتنا

ربنا يخليها و يبارك في عمرها يا رب

لأنها أعظم زوجة

وحبيبة

وصديقة

وأحسن أم لأشقى إبن في الدنيا

الأستاذ بيكا حبيبي

كل سنة و إنتي طيبة يا أغلى الناس

_________

كانت شمس الكون بتلوّن

طرحتها المجدولة

وعلى رموشها النور بيزيّن

نظرتها المبهورة

لمّا عنيّا شافتها إنسحبت

من نفسي الأحزان

وكأني مش نفس الماضي

ولا نفس الإنسان

نظرة عيني بقت تحضنها

ورموشي تغطيها

رحت لماجد صاحبي بأقول له

إني معجب بيها

تخطفني عنيكي

تخطفني عنيكي مابين الناس و تشيل من قلبي الخوف

تضحك و الفرح ماليها رغم الحزن و أي ظروف

تفرش قدامي السكة وتوّريني هاأروح على فين

تحضنّي بنظرة رقيقة بتدفّينا إحنا الإثتنين

ياحبيبتي ردّي عليا إنتي بشر و لاّ إنتي ملاك

ولاّ إنتي كل الدنيا الحلوة بحالها هناو هناك

بجمال الروح في عيونك أنا بعيوني بأبص و أشوف

وإن غبتي عليا دقيقة قبل ما تخلص أكون ملهوف

أنا قلبي و عقلي يا "بوبو" دايبين فيكي و مش عارفين

من قبل لقاكي و حبك كانوا إزاي الإثنين عايشين

على دمع الفرح

على دمع الفرح الساكن جوة عيونك

نازلة رموشك تتحنى

فرحانة كأنها بتبوس أعتاب الجنة

وكأن ماكانش في يوم أحزان

ولا خنجر دايس على ظهري

مسعور و جعان

وكأن ماكانش في يوم حيوان

داير ع الشر بيتمنى

يتشفّى كمان

من نظرة وضحكة جوة عيونك

كل النار صبحت دخان

قلبي خلاص إتطمّن جدا

ماباقاش خايف أو قلقان

أصل الخوف يا حبيبتي طريق

يبتدي لما يكون لي صديق

خاين أو أصلاً خوّان

وأنا دلوقتي ماليش يا حبيبتي

غيرك في الدنيا دي خلاّن

يبقى حاأخاف من إيه بالزمّة

وإنتي ملاك بهدوم ولسان

بديعة من صنع الرحمن

إللي تكوني معاه يتهنّى

علشان حضنك هوّ الجنة

وفي قلبك مليون رضوان