تاجين في الراس .. توجع

وصلني التاج ده من بسمة ( الروح )

عبارة عن تاجين في بعض

و طبعا لازم أجاوب عليهم

و إليكم المصايب السوده

_______________________________________________________________________

التاج الأول

أعطيتك ثلاث وردات من هم الثلاث أشخاص اللى هتعطيهم الورد اللى معاك ؟

الحقيقة أنا حا أهادي الثلاث وردات لمراتي ، أصلها بتحب الورد جدا

لو أعطيتك ورقة فيها 3 سطور وقلت لك أكتب فيها اللى أنت عاوزة هتكتب أيه ؟

غالبا حاأعمل فيها حسابات شغلي الملغبطة دائما وإللي ماحدش بيفهمها غيري

ما هو هدفك فى الحياه ؟

و الله بأحاول على قدر إستطاعتي أني أعمل لدنياي كأني أعيش أبدا و أعمل لآخرتي كأني أموت غدا زي ما الرسول صلى الله عليه وسلم قال في الحديث الشريف

المقولة ( ان شاء الله بكرة هيكون أحسن من النهاردة ) هل تصدق هذه المقولة ولماذا ؟

الحقيقة مش دايما ، ده بيتوقف على مين قال المقولة ، يعني مثلا لو حققت في شغلي تقدم معين وواحد من زمايلي قال المقولة دي حاأصدقه ، لكن لو الحكومة مثلا عملت لنا إعلان في التليفزيون يقول بكره أحسن من النهاردة ، حاأفطس على روحي من الضحك و مش حاأصدق طبعا ، بالعكس حاأعرف إن الأيام الجاية سوده و مهببه بهباب .

من المغنى اللى بتحبه أوى ؟

هي مغنية ، الست أم كلثوم

وأيه أحلى أغنية بتحبها ؟

رق الحبيب ، الأغنية دي معجزة فنية بجد

غزة تمثل لك أيه فى حياتك ؟

صورة جديدة للواقع العربي المرير

اعطى لأنتمائك لوطنك درجة من المائة ؟

لو الإنتماء مقصود به الحب و التضحية يبقى مية في المية ، لكن لو مقصود بيه الرضا و التغاضي عن أخطائها يبقى صفر في المية

لو تزوجت وأنجبت ولدين وبنتين هتسميهم أيه ؟

أنا متجوز بالفعل و عندي ولد أسمه عمر ، و إن شاء الله لو جبت ولد تاني حاأسميه يوسف

أما البنت فالأولى إن شاء الله تبقى مريم أما الثانية بقى لسه مافكرتش

عمرك غشيت فى أمتحان وأنت صغير ؟

آه ، بس أتقفشت ، لأني ماكنتش بأعرف أوطي صوتي ، و بعد كده بقيت مش بأغش بقيت بأغشش بس

لو أتعرض عليك رشوة وأنت فى زنقة مالية هتعمل أيه ؟

حاأرفضها ، على فص عيييييييييييني ، معلش بقى ، رضاء ربنا أهم

قول 3 صفات ب 3 كلمات توصف بيهم شخصيتك

هادي ، طموح ، كتوم

صفة عاوزها فى شريك حياتك ؟

الحقيقة هي صفة كنت بأتمناها و ربنا كتبهالي و هي العقل ، صحيح هي صفة نادرة شوية في الستات بس الحمد لله لقيتها في شريكة حياتي و الحمد لله .

ايه اللى غير دراستك وشايف نفسك فيه قوى

سباق السيارات ، كنت نفسي طول عمري أكون سائق في سباق السيارات السريعة

طب دلوقتى أيه المكان اللى نفسك تكون فيه

نفسي أكون في السويد ، في مدينة أستوكهولم بالذات ، و في منطقة سلوسن بالتحديد ، علشان فيه واحد ناصب عليا في ألفين دولار و نفسي أخدهم منه

_____________________________________________________________________

التاج الثاني

بدأت تدوين من أمتى ودخلت عالم التدوين ده أزاى ؟

بدأت من شهر يونيو 2005

و دخلت التدوين بالصدفة ، لأني كنت بأتجول على النت و إتكعبلت في مدونه و بدأت أقرأها و منها دخلت عدة مدونات و بعدين قلت لنفسي ، طيب ماتعمل أنت كمان مدونة بدل ما أنت بتكتب لنفسك كده ، و عملت مدونتي فعلا و من ساعتها مابطلتش تدوين .

أيه كان أنطباعك فى البداية ؟

كنت مبسوط ، و في نفس الوقت مستغرب إن إللي بأكتبه بيلاقي حد يرد عليه و يهتم إنه يقراه

مين أكتر واحد بتهتم بتعليقه على بوستك الجديد ؟

الحقيقة هي مراتي ، رغم إنها مش دايما بتعلق كتابةً عندي ، بس طبعا بتقرأ كل إللي بأكتبه و تقول رأيها فيه قبل ما ينزل حتى على البلوج

أيه أهم حاجة أتعلمتها من عالم التدوين ؟

إن الإختلاف لا يفسد للود قضية ، بجد مش شعارات ، لأني ليه أصحاب مدونين و مدونات بأختلف معاهم في حاجات كتير لكننا أصحاب و بنتشارك كمان عمل واحد جماعي ناجح و الحمد لله

أيه أكتر حاجة كرهتها ؟

الفزلكة الفاضية و محاولة بعض المدونين أنهم يفهمونا إن الكتابة و الإبداع الأدبي لازم يكونوا منبعجين و مقعرين و غامضين و متنيلين على عينهم ، و إن لو الناس مافهمتش إللي أنا كاتبه يبقى كده أنا نجحت ، و ده دليل إني واد مثقف فذ و ماليش زي ، مع إن الموضوع أبسط من كده بكتير ، و السهولة في تناول أي موضوع في رأي هي سر نجاحه .

حاسس أن التدوين له تأثير ؟

له تأثير عليا أنا شخصيا ، أو على المدونين أنفسهم ، لكن لو تقصد تأثير على البلد أو الأحداث الجارية فهو تأثير طفيف ولا يذكر

تاج الأسرار

وصلني تاج جديد

من زميلتي و أختي الصغيرة

bos bos

و طبعا دي طريقتها في الإنتقام مني

بسبب المهام الكثيرة جدا إللي بأكلفها بيها في المجلة

لكن ولا يهمنا

نحن لها

هاهاهاهاهاها

المرة دي بقى جايبالي تاج من سؤال واحد بس

إنما إيه

سؤال بست إجابات

و كل إجابة أنقح من إللي قبلها

عموما

نبدأ و نشوف

السؤال هو

تحدث عن ستة أسرار قد لا يكتشفها من يقابلك للمرة الأولى

و إليكم الإجابات

السر الأول

من الوهلة الأولى بيتخيل من يراني أني عنيف الطباع ، على الرغم أني في حقيقة الأمر إنسان أتجنب العنف دائما ، و أجنح إلى السلم في اغلب الأحيان ولا أحب أن أبدأ أبدا بالإعتداء على حد و رغم إن صحتي كويسة و جسمي يعتبر ضخم بعض الشيء إلا إن إستخدامي للقوة في شتى صورها هو آخر شيء أفكر فيه أو أحاول إني استخدمه ، كما إني لا أحب الظلم و أكره أن أكون ظالما

السر الثاني

في العمل ، غالبا بيتصور مرؤوسيني أني بلا قلب أو مشاعر ، و هو الأمر اللي بيسبب دائما نوع من عدم التآلف بيني و بينهم بشكل كامل ، و الحقيقة أنهم مايعرفوش أبدا ان ده يتم عن قصد و نيه مبيته ، فأنا مؤمن أن الموظف المصري لو صاحب المدير بتاعة من غير مايخاف منه ، يبقى قول على العمل كله يارحمن يا رحيم ، و طبعا لأني مش عايز أواجه فشل في عملي فأنا بأضطر إني أضع مسافة مناسبة بيني و بين كل واحد على حسب شخصيته و طبيعته في العمل و التعامل

السر الثالث

قد يتصور من يراني لأول مرة أني إنسان غامض ، و ده لأني بأحاول دايما لما اقابل حد لأول مرة أني ماأخليش على وجهي أي تعبير إطلاقا ، و إن مشاعري و رأي تجاهه يفضلوا جوايا لغاية ما أستكشفه أنا الأول و أعرف شخصيته ، و بالتالي يبقى عندي فرصة أكبر إني أشوف أفضل طريقة للتعامل معاه

السر الرابع

كتير من الناس إللي مايعرفونيش قوي ممكن يتصوروا إني مغرور و ده نتيجة إن في كلامي دائما نبرة تهكم ، حاولت كتير إني أتخلص منها و قدرت جزئيا ، لكن هناك جزء لم أستطع التخلص منه و أصبح متأصل في طريقة إلقائي للكلمات ، و طبعا نبرة التهكم الخفيفة دي بتحسس الإنسان إللي قدامي إني مغرور و غير مكترث لكن في الحقيقة أنا مش كدة خالص

السر الخامس

السكوت الدائم في مقابلاتي لأي حد لأول مرة ، و الكلام بهدوء ، بيخللي كتير من الناس يتصوروا إني إنسان هاديء و غير عصبي ، ولكني في الحقيقة ، ممكن أكون من جوايا بأغلي لكن مش بيبان عليا ، و لذلك فأنا مش هاديء ولا حاجة بالعكس أنا عصبي بس يمكن ربنا بيقدرني على إني أحكم عصبيتي دي و أتحكم فيها بدل ما تفلت مني و تبقى مصيبة

السر السادس

هو ضعفي الشديد أمام الدموع ، أي دموع ، و خصوصا لو الدموع دي من حد قريب مني ، و فيه حاجة غريبة ، هي إني بأتأثر قوي من دموع الرجال أكثر من دموع السيدات ، يمكن لأن الستات طبيعي يعني إنهم يبكوا ، إنما الراجل مش حايبكي إلا من الشديد القوي ، لذلك لو شفت راجل بيبكي بأحس إنه في كارثة حقيقية ، إنما الست لو بتبكي بأتوقع إن ممكن جدا يكون بكائها ده على شيء مايستهلش قوي يعني ، لكن في المجمل أنا بأتأثر بدموع أي حد لأني بأحس ان البكاء ده حاجة متعبة جدا

تاااااااااااااااج الأحـــــــــــــــــلام

تااااج الاحلام.....

وصلتني دعوة للتاج ده من Dodda

و حتى يسود السلام كنت لازم ألبي الدعوة و أحضر للأستلام

أذكر خمسة أحلام تخص ماضيك

أول حلم

كان زمان هو إني أكون وكيل نيابة ، و مش عارف ليه وكيل نيابة بالذات يعني ، بس تقريبا كنت متأثر بمسلسل مش فاكر إسمة ، كان بيتعرض في التليفزيون و كان فيه ممثل اسمة مجدي وهبة عامل دور وكيل نيابة ، و بيدور بقى على حقيقة الجرائم و كده ، و كنت وقتها كل ما أفكر في مستقبلي أو حد يسألني السؤال المعتوه بتاع نفسك تطلع إيه لما تكبر ، أرد و إبتسامة بلهاء على وشي و أقول " وكيل نيابة " ، و طبعا الحلم لم يتحقق ، و كويس إنه ما أتحققش لأني حاليا مقتنع إني ماكنتش أنفع و كيل نيابة خالص .

الحلم الثاني

إني اسافر و أشوف بلاد كتير ، و الحمد لله الحلم ده إتحقق و سافرت بلاد كتيرة و عشت فيها فترات مش قليلة ، و عرفت فيها حاجات كتير ، فعلا في السفر سبع فوايد ، يمكن السفر فيه سبعين فايدة كمان مش سبعة بس .

الحلم الثالث

كان بدأ عندي و أنا كبير شوية ، يمكن 14 أو 15 سنة و هو إني أكون باشتغل في شغلي إللي أنا فيه دلوقت ، و لأنها نفس مجال والدي فأنا كنت منبهر بيه و كنت بأروح معاه في كثير من الأحيان علشان أتعلم منه و أشوفه بيشتغل إزاي ، و الحلم ده علشان يتحقق كان لازم أتدرب بشكل معين على العمل و أجتهد عدد كتير من السنوات علشان أقدر أكون ناجح فيه ، بس فعلا إن الله لا يضيع أجر من أحسن عملا ، لأني بعد كده و في وقت قليل قدرت أكون ناجح ، و أحقق حاجات كويسة جدا في شغلي ،

الحلم الرابع

إني اكون بأعرف أعزف آله موسيقية ، أي آله موسيقية ، ماكانتش فارقه معايا قوي نوعية الآله وقتها ، بس كنت عايز أبقى بأعرف أطلع الموسيقى بنفسي من آله و خلاص ، و فعلا أتعلمت في الكونسير آله الكمان و بقيت بأعزف عليها كويس و كنت صغير في السن جدا لدرجة إني كنت أصغر واحد بيدرس في الدراسات الحرة في معهد الكونسيرفاتوار إللي في أكاديمية الفنون .

الحلم الخامس

بقى هو حلم فانتازيا ع الآخر ، من وأنا صغير باحلم إني اقدر أخترع آله أو مادة أو اي حاجة تخللي الصيف مايجيش خالص ، و تبقى الدنيا كلها شتا في شتا ، و طبعا الحلم ده ماأتحققش و مش حايتحقق أبدا ، بس حاولت أني أحققه جزئيا ، بوجود التكييف في كل مكان بأروحه تقريبا ، لدرجة أني ماباقتش بأقعد ع القهوة علشان مافيهاش تكييف ، مش ألاطه يعني ، بس لأني فعلا بأكره الحر كره العمى

------------------------------------------------

أذكر خمس أحلام تخص مستقبلك و ما تتمناه منه

أول حلم

للمستقبل ، هو أني لما أموت أدخل الجنة ، صحيح أنا أفعالي زي النيلة ، و الملاك الشمال باني مكتبة عشرين دور ، بس كمان عندي حاجات كويسة كتير ، و بأطمع طول الوقت في رحمة ربنا و مغفرته ، و إنه يتقبل مني أعمالي الصالحة و تكون في ميزان حسناتي .

ثاني حلم

مرتبط بالحلم الأول ، و هو إن مراتي تكون معايا في الجنة لو أنا عتبتها أصلا يعني ، لأني بيتهيألي أن الجنة من غيرها مش حاتبقى جنة ، و على العموم هي قريبة قوي من ربنا و شكلها كده هي إللي حاتخش و أنا إللي حاألبس في الحيط

ثالث حلم

، إني أربي عيالي كويس و يبقوا ناجحين في حياتهم سواء كانوا ولاد أو بنات ، و إنهم لما يختاروا في زواجهم تبقى إختياراتهم ناجحة كلهم ، و كمان يبقوا ناجحين في حياتهم و مستقبلهم يكون ممتاز .

رابع حلم

إن مصر تتغير من كل الفشل و الخيبة إللي إحنا فيها دي و تتحول دولة من دول العالم المتقدم ، و ترجع تاني تكون هي قائدة المنطقة و يختفي منها الفساد و الظلم و تغور الحكومة دي من وشنا بقى و يتغير الحكم إللي كاتم على نفسنا ده للأبد .

الحلم الخامس

يمكن حلم يزعل الحكومة بس هو إني يكون عندي عشر عيال ، أولاد أو بنات مش مهم ، المهم عايز يكون عندي عيال كتير ، بالعند في الحكومة ، و كمان لأني بأحس أنهم عزوة ، و ماحدش يقول لي بقى التربية الحديثة و تنظيم الأسرة و هرش المخ ده ، لأن النغمة دي مش موجودة غير عندنا بس ، في الدول المتقدمة بيشجعوا الناس على انهم يجيبوا عيال كتير ، لأنهم فاهمين إن دي ثروة بشرية ضرورية للتنمية ، و مابيعملوش وقفة مصرية و بتاع و الكلام الخايب بتاعنا ده .

----------------------------

أذكر شخصين - على الأقل - متواجدين فى حياتك كنت تتمنى وجودهم من قبل

أول شخص

كنت أتمنى يكون موجود في حياتي من قبل كده هي مراتي ، لأنها مراتي و أختي و أمي و بنتي و حبيبتي و صاحبتي و كل شيء ليا في الدنيا فعلا ، بجد كنت بأتمنى أنها تكون موجودة معايا من أول لحظة في عمري ، لأني فعلا حاسس إن أي لحظة مرت عليا قبل ما أعرفها كانت وقت ضايع من عمري ، كمان لأن وجودها أكيد أكيد كان حايمنعني من أخطاء كتير الواحد ممكن يكون وقع فيها في الماضي .

ثاني شخص

هو صديقي المميز جدا ماجد ، الأنسان ده فعلا لو في أثنين منه في الدنيا كان حال الدنيا أتعدل ، قمة الشهامة و الجدعنه ، مثال حي على الصداقة إللي بجد مش كلام وخلاص ، و هو أكثر أنسان وقف معايا في حياتي و مازال بيقف جنبي دايما ، ورغم أننا أصحاب من 16 سنة إلا أني كنت بأتمنى أننا نكون أصحاب من قبل كده بكتير .

--------------------

أذكر شخصين - على الأقل - غير متواجدين فى حياتك و كنت تتمنى وجودهم مستقبلا فى حياتك و حياة أولادك

الشخص الأول

الحقيقة مش بس كنت باتمنى يكون موجود في حياتي و حياة أولادي ، ده أنا كنت بأتمنى أنه يكون موجود في حياة كل مصري و عربي ، و هو الرئيس الراحل جمال عبد الناصر ، لأن الراجل ده هو الرئيس المصري الوحيد إللي بأحس أنه كان بيحب مصر بجد

الشخص الثاني

هو جدتي رحمة الله عليها ، لأن الست دي رغم كبر سنها ، و تعليمها المحدود ، كانت تمتلك حاجة مهمة جدا ، و هي " الفطرة السليمة " ، كنت بأحس و أنا قاعد معاها بأنها نقية و شفافة جدا لدرجة كنت بأتعجب لها و كانت كل كلمة بتقولها دائما تحمل حكمة معينة ، و كأن عصارة خبرة السنين ، حولت كلامها العادي لحكمة و درس .

----------------------------------------------

اخيرا لمن تهدى التاج

طبعا بوبو أول المدعوات

و بعدها أي حد يحب يجاوب على التاج يتفضل

تاج .. وعجبي

وصلني تاج من بسمة الروح

و طبعا هي بتحاول تنتقم مني لأني رئيسها في المجلة

و لكن نحن لهااااااااااااااا

التاج بجد هو السهل الممتنع

هو طلب واحد بس

إتكلم عن نفسك في عشر نقاط

حاااااااااضر

و رباعيات كمان

__________

1

إسمي و ليد و إسم الجد كان جودة

ثلاثة و ثلاثين سنة في العمرمفروده

خريج سياحة و كمان دبلومة في الأعلان

الجرافيك شغلتي و تصاميمي موجودة

___________

2

عشقت أجمل بنت و قلبي بقى مشغول

من يومها بأكتب قوافي و فيها شعري بأقول

عنيها من سحرها السحر غار منها

و هي صبحت مراتي و حاتفضل كدا على طول

___________

3

أربع شهور و كمان فوقهم عشر ايام

لا عرفنا يوم نخرج ولا يوم عرفنا ننام

من يوم ماشرف لنا البيه "عمر" و إحنا

لا رحنا يوم سيما و لا شفنا يوم أفلام

___________

4

بأحب آلة الكمانجة و بعرف أعزفها

و أميل مع الألحان و ساعات بألفها

درست في الكونسير على أيد أساتذة كبار

و ست زي العسل ياما كنت بأقرفها

___________

5

مزاجي طول ما الجيب عمران متظبّط

لكن لو يوم حايفضى تلقاني متلغبط

لا نفسي في البيزنس ولا نفسي في الملايين

ولا نفسي إيد الفقر فوق كتفنا تخبّط

___________

6

بحب بلدي بجد و بأخاف عليها كتير

من ناس بتهوى الهد و تقبل التدمير

سافرت بره لقيت ملامحي ممسوحة

رجعت شوفت شفايفي و عنيا و المناخير

___________

7

بشجع الكورة مع أني مش غاوي

تلقاني من منبتي في الأصل أهلاوي

لو يوم في ماتش بأروح على راسي كاب أحمر

لا يغلطوا و يقولوا عني زملكاوي

___________

8

أنا مصري زي الناس كلها في وطني

ساكت لاكن مليان إحساس كبير وطني

بأحب صوت الحق و العدل و الحرية

و أكره أكيد حكومتنا و حزبها الوطني

___________

9

أبويا ليه في حياتي أفضال ماتتعدش

و أمي عمري بحاله لجميلها مايردش

و أخويا هو الذكرى و شقاوة الصبيان

و أختي لو تطلب ، طلبها مايتردش

___________

10

مابأخافش م السلطان ولا اي صاحب جاه

ولا يوم نسيت جرئتي ولا سابني قلبي وتاه

ولا خفت يوم من عسكر أو نسر أو دبابير

لكني طبعا بأخاف م الآخرة و من الله

تاااااج

الصديقة العزيزة أميرة ويلز مررت لي التاج إللي بيمر على كل الناس اليومين دول

، باشكرها طبعًا و داخل أجاوب أهه

إيه اللي هيحصل لإيميلك لما تموت؟
أنا مافكرتش أبداً في الموضوع ده قبل كده بس أعتقد أنه حايفضل مفتوح لأنه مش بس إيميل شخصي ، لا ، ده كمان عليه رسائل شغل مهمة جدا
إديت الباسوورد لحد قبل كده؟ لو آه كانت ايه طبيعة علاقتك بيه ؟
أيوة ، زوجتي
اسمك؟
وليد جودة
اسم الدلع المشهور بيه وسط اصحابك؟
و الله أنا ماليش قوي في موضوع الدلع ده لكن ساعات أصحابي بيقولوا حاجات كتير زي

ليدا ،

دودو ،

واليدوووف ،

أبو جودة
عمرك؟
عمري 31 سنة و داخل على ال32
برجك؟
العذراء
مجال دراستك؟
بكالوريوس سياحة
شخصيتك نوعها إيه؟
نوعها توشيبا
إيه الأسئلة العبقرية دي؟!!!
السفر بالنسبة لك؟
الحقيقة أنا تجربتي مع السفر تجربة طويلة و قديمة لأني بأسافر من و أنا صغير جدا بس دايماً بيكون سفري بهدف الشغل ، و الشغل في الغربة بقى حدّث ولا حرج ، أنا زرت بلاد كتير ، السويد ، أكرانيا ، روسيا ، ألمانيا ، إيطاليا و أمريكا و في كل البلاد دي إشتغلت و طلعت عيني بس كمان أتعلمت من السفر كتير جدا جدا علشان كده بينطبق على السفر بالنسبة لي قول
أحبه مهما قاسيت منه و ماأستغناش أبدا عنه
المود بتاعك؟
لما بتحصل حاجة تفرح بأكون فرحان و لما تحصل حاجة تحزن بأكون زعلان ، مش بأقول لكم أسئلة عبقرية
وقت فراغك بتعمل فيه إيه؟
وقت فراغي الحقيقة إن وجـِد بيكون قليل جدًا و طبعًا بأخصصة لزوجتي لأنها أقرب صديق ليا في الدنيا و بتشاركني نفس الهوايات و الأهتمامات
الأكلة المفضلة؟
هي حاجة يمكن كتير يشوفوها غريبة ، أنا بأحب البسلة و هي لسه نيّه ، يعني بأفصصها و أكلها كده زي الفول الحراتي ، و الأغرب إني بعد الجواز لقيت مراتي عندها نفس الهواية العجيبة دي ، علشان كده مش عارفين نطبخ بسله أبدا في بيتنا لأننا بناكلها نيّه أول بأول
الصفات اللي أخدتها من بابا؟
والدي له الفضل في تشكيل عقلي كله تقريباً ، علمني إزاي أفكر و إزاي أحلل الأمور و إزاي أكون حكيم و أضبط أعصابي مهما كانت الظروف
الصفات اللي أخدتها من ماما؟
أمي أتعلمت منها الحنان و العطاء و الطيبة لأنها عندها الثلاث صفات دول بدون حدود
أكتر ست حاجات بتكرهها؟
التعصب
أنور السادات
الحر
الزحمة
الخيانة
الكمبيوتر لما بيهنّج
أكتر ست حاجات بتحبها؟
زوجتي
مصر
السفر
جمال عبد الناصر
آلة الكمان
الكتب
الشغل بالنسبة لك؟
شر لابد منه و خير لا غنى عنه
الإنترنت بالنسبة لك؟
أصبح ضرورة و هواية مهمة ، و بيشكّل حاليًا جزء مهم من حياتي
الخمس حاجات اللي محدش يعرفها عنك؟
هما عبارة عن خمس حاجات ، بس ماحدش يعرفهم خالص عني
إيه رأيك في الإجابة دي ؟؟

التاج ده بأمرره لثلاثة
روز
مع نفسي
أرابيسك

س ، ، و جيم تدوين

س و ج
إستجابة مني لطلب الصديقة العزيزة جدًا الدكتورة داليا لي بالإجابة على هذة الأسئلة :
هل أنت راض ٍ عن مدونتك شكلا ً و موضوعًا ؟
بالطبع أتمنى أن تكون أفضل شكلا ً و موضوعًا لكني راض ٍ عنها إلى حد كبير .
هل تعلم أسرتك الصغيرة بأمر مدونتك ؟
طبعًا .
هل تجد حرجًا في أن تخبر صديقا ً عن مدونتك ؟
هذا يتوقف على الصديق نفسة ، فلدي أصدقاء لا تفهم التدوين ولا حتى التلوين .
هل تعتبرها أمرًا خاص بك ؟
عذراً ،، لم أفهم السؤال .
هل تسببت المدونات في تغيير إيجابي لأفكارك ؟
لم تتسبب في تغييرات إيجابية و لكنها قامت بتثبيت بعض المفاهيم كانت بحاجة شديدة إلى أن تـَثبـُت .
هل تكتفي بفتح صفحات من يعلقون في مدونتك أم تسعى لاكتشاف المزيد ؟
في أغلب الأحيان أكتفي بالمعلقين و ذلك لديق الوقت ليس إلاّ و لكني في بعض الأحيان أستكشف المدونات الأخرى
ماذا يعني لك عدد الزوار ؟ و هل تهتم بوضعة في مدونتك ؟
كنت أهتم بوضعة في مدونتي و عدد الزواركان يعني لي كم عين قرأت ما أكتب ، وذلك للمعرفة ليس إلاّ ولكني الآن لا أهتم به مطلقاً .
هل حاولت تخيل شكل اصدقائك من المدونين ؟
في العادة لا أحاول تخيل ملامح أصدقائي المدونين ، فقط عندما أنتظرهم في الموعد الأول بيننا في الواقع .
هل ترى فائدة حقيقية للتدوين ؟
على المستوى الشخصي لكل مدون أرى فوائد كثيرة و لكن على المستوى المجتمعي و التأثير الشعبي لا أجد لحركة التدوين القوة بعد لتأثر على هذا النطاق الواسع
هل تشعر أن مجتمع المدونين منفصل عن العالم المحيط بك أم متفاعل مع أحداثة ؟
بالتأكيد متفاعل معه و متأثر به بشدة ، و تكون درجة تأثرة بتأثر المدونين أنفسهم و الذين هم بالطبع مواطنين و بشر مندمجين و متفاعلين مع العالم
هل يزعجك وجود نقد بمدونتك ؟ أم تشعر أنه ظاهرة صحية ؟
بالطبع لا يزعجني ،، فقط دعنا نتفق أولا ً على ماهية ما يسمى بالنقد
هل تخاف من بعض المدونات السياسية و تتحاشاها ؟ هل صدمك إعتقال بعض المدونين ؟
أرفض تصنيف المدونات و بالتالي أرفض تعبير المدونات السياسية ، ، و أنا لا أعتقد أن هناك مدونين قد أعتقلوا بسبب التدوين حتى الآن – على حد علمي – و أنا لم أصدم من إعتقال علاء و من قبله كريم لأن أسباب أعتقالهم حسب ما عرفت لم تكن التدوين .
هل فكرت في مصير مدونتك حال وفاتك ؟
روز طبعاً هي الوريثة الوحيدة و الشرعية لكل ميراثي الأدبي و المادي و الشخصي كمان ربنا يخليها ،، معلش بقى يا روز حا أكون سايب لك الحمل كله بس أنتي أدّها و أدود ، و أبقي خدي بالك من العيال ، و علّي صوتك أمانة في رقبتك أنتي و أخوكي
سؤال أخير ،، ما الأغنية التي تحب وضع اللينك الخاص بها في مدونتك ؟
أغنية سمعتها و أنا طفل على شاطيء البحر في المعمورة و لا أعرف أسمها ولا أسم المطربة التي تغنيها و لكني فقط أتذكر أنها أجمل ألحان سمعتها في حياتي حتى الآن .

السبع حاجات

عندما طلب أحمد شقير فى المدونه الخاصة به منى أن أدون السبع حاجات الشهيرة فكنت أول المستجيبين ولكن يبدوا أن تعليقى لم يقرأة الكثيرون ولذلك رغم هذة الأستجابة السريعة منى للمدونه إلا أنه ظل يطلب منى أن أدون السبع أشياء الشهيرة و التى قام العديد من المدونون و المدونات بكتابتهم فى مدوناتهم

و هذة إعادة لما كنت قد كتبت عند أحمد شقير فى التعليق على البوست بتاع السبع حاجات

سبعة أشياء أخطط لعملها
------------------------
أبيع العربية بتاعتى
أبيع الشقة بتاعتى
أبيع العفش اللى فى الشقة
أبيع الأجهزة الكهربائية
أبيع الكمبيوتر و البرينتير و الأسكانير
أعمل الكشف الطبى أللى فاضل
أستلم تأشيرة الهجرة و أزوّغ من البلد دى
___________________________________
سبعة أشياء لا أستطيع عملها
---------------------------
أروح أسكندرية يومين وسط الأسبوع
آكل على كيفى
أمشى فى شارع مش مكسر
ألعب فى دولاب أبويا زى زمان
أسيب ذقنى من غير حلاقة
أبطّل لبس كرافتات خالص
أتفرج على أبراهيم نصر
___________________________________
سبعة أشياء عادة أقولها
-----------------------
هو البتاع فين ؟
ماحدش فاهم حاجة
مش عارف .... يمكن
يا عم أرحمنا
أيوة يا مشمش ,, لما بأنادى صاحبى ماجد
أنت حاتفتى ؟؟
طيب طيب .. يوووه عالشغل و سنينه
___________________________________
سبع مدونين أدعوهم للكتابه فى نفس الموضوع
----------------------------------
مصرية ( إيمان ) و
إسكندرانى
سندباد مصرى
تجربة ( عمر مصطفى ) و
أبواب للنور ( مصراوى ) و
شادى
و المفاجأة الكبرى بقى ,, أحمد شقير تانى
_________________________________