kING TOOOT

من غير عيون

2012-02-05T23:47:00.004-05:00

أحضني قلبي الضعيف

وأفردي علي كتفي شال

خللي إسمي يتحسب ضمن الرجال

بددي صمتي المخيف

غرّقيني بالآمال

شيلي من روحي المجون

والجنون

أو أي زيف

على أي حال

إنتي جوّايا الخيال

إنتي زرع و نور و ريف

إنتي بيت في قصيدة م الغزل العفيف

إنتي جنة من جمال

إنتي نسمة عصر في فصل الخريف

إنتي كل مافيكي شيء غالي و شريف

بس أغلى مافيكي قلب رقيق حَنون

وبريء كما قلب العيال

ومالوش في شغل الكدب و أمور الأحتيال

ماسك إيدين قلبي الكفيف

بيعلّموا إزاي يكون

أقرب ما يمكن م الكمال

من غير مايحتاج العيون

ولا كان في بالها

2011-12-18T19:39:00.001-05:00

ولا كان في بالها
وهي نازلة في اي يوم
إن إيد ممكن تشيل
عن جسمها ستر الهدوم
ولا كان في بالها إنها
ممكن تشوف خرزان و شوم
ولا كان في بالها تحذيرات
أو عساكر ببيادات
كأنهم غربان و بوم
ولا هي راحت ترمي طوب
ولا غاوية عافية أو حروب
ولا عارفة حتى غير يادووب

إن مصر بأهلها
وبجلالة قدرها
لازم تقوم

عيني عينك

2011-12-09T08:40:00.001-05:00

يسأل الجميع هذة الأيام نفس السؤال السحري ، لماذا يصر المجلس العسكري على إجراء إنتخابات في ظل ظروف لا تسمح بإجراء إنتخابات مطلقا ؟ والحقيقة تتعدى هذا السؤال تماما ، فالإجابه على هذا السؤال لا تكون دون الإجابه على مجموعة أسأله أخرى ، منها مثلا ، لماذا يصر المجلس على وجود حكومة الجنزوري ؟ ولماذا يصر على وجود مجلس إستشاري ؟ والأمر على المستوى السياسي يذكرني بقصة حدثت في أوائل الثمانينات في منطقة الميناء بمدينة بورسعيد ، حيث كان أحد المفتشيين في الجمرك يعرف شخصية أحد المهربين ، وكان المهرب يمر من الدائرة الجمركية مرتين في الأسبوع ، ويقوم المفتش بتفتيشه تفتيش دقيق جدا هو و سيارته ، وفي النهاية لا يجد شيء مخالفا ، وبعد سنوات و خروج المفتش على المعاش سأل المهرب عن الأشياء التي كان يهربها في سيارته ، ففاجأه أنه كان يهرب السيارات نفسها .
هكذا تماما يتعامل المجلس العسكري مع الشعب ، إنه يدفع الناس للنقاش حول نتائج الأنتخابات ، على الرغم من أن تلك النتائج لا تهمه أبدا ، فالهم الحقيقي له هو إجراء الأنتخابات نفسها ووجود مجلسا للشعب ، ذاك المجلس الذي أيّا كان تكوينه سيسحب الشرعية من ميدان التحرير ، فبوجوده يصبح المجلس ممثلا عن الشعب وبالتالي يتحول ميدان التحرير من ممثل للشعب إلى ممثل مغمور ، بالطبع يفضل المجلس العسكري أن يكون مجلس الشعب مكوّن من الإسلاميين في أغلبه ، وذلك ليس تدينا من المجلس العسكري ، ولكن لأن الاسلاميين بطبيعتهم سواء كانوا إخوان مسلمين أو سلفيين هم أسهل في عقد صفقات سياسية ، وقبول الفتات نظير وجودهم تحت القبه ، بينما دعاة المجتمع المدني و الليبراليين أو اليساريين ، هم أصعب في قبول التنازلات أمام العسكر ، وعليه فالمجلس العسكري يخطط من هذا أن يكون المشهد السياسي بعد الإنتخابات كالتالي ، مجلس شعب يدّعي تمثيله الشعب المصري تتحكم فيه أغلبيه إسلامية لديها خضوع و إنبطاح سياسي ، وحكومة إنقاذ وطني لها صلاحيات شكلية ولكنها تفي بالغرض السياسي أمام الناس ، خاصة مع قيامها بمجموعة إصلاحات بسيطة مباشرة و لكنها غير جذرية ، ومجلس إستشاري يتحمل أمام الرأي العام أي قرار خاطيء يتخذه المجلس العسكري ، وبالتالي يكون قد تم تفريغ الثورة من محتواها تماما و تم سحب أي شرعية لميدان التحرير أو أي إعتصامات أخرى
الشوكة الباقية في حلق المجلس العسكري بعد كل هذا الترتيب هم الشهداء ، وهو الأمر الي يجعل المجلس العسكري يُصر على إختزال قضيتهم في مجموعة مساعدات ، أي أن تختزل في مبالغ نقدية تسلم لعائلاتهم و ينتهي الأمر ، وعليه فنحن الثوّار الغير منتميين لكل تلك المنظومة المرتّبه من المجلس العسكري لابد أن نتمسك بتلك القضية و نعمل على عدم إختزالها في تعويضات مادية فقط ، فالدم لا يباع ولا يشترى ، والقاتل لن نسمح له أن يمشي في جنازة القتيل عيني عينك

في عيد زواجنا

2011-11-09T07:58:00.001-05:00

تتدفق الذكريات ، لتغرق مخيلتي في أمواج من الحنين و الدفء ، وتحتضن عقلي بذراعين من حرير ، حبيبتي ، يا زوجة عمري و شريكة حياتي ، و صفائي وسط عكر الحياة ، وطيبي عند كل دنس ، حبيبتي ، يا عِشق روحي في زمنا يعتبر العشق تهوّر ، والحب فجور ، يا أصفى ما في هذا الكون ، أنظر إلى الذهب يلمس جيدكِ و أتعجب ، كيف له أن يتحمل ذلك النور النابع منكِ ، أكاد أجزم أنه كان سعيدا جدا لحظة أن لامسته النار لتصنع منه حليا يرقى أن يكون عبدك ، كم هو رخيص كل غالي و ثمين حينما يوضع بجوار طيفك ، و كم هي الأشياء عادية جدا عندما توضع بجوار جمالك الأخاذ ، منذ النظرة الأولى عرفت عينان معنى الروعة في كل شيء ، و عرف قلبي طعم الحلم و الحقيقة
دعوت الله في صلاتي أن تكوني شريكة عمري و أم أولادي و سكني و أهلي ، وعلى قدر كرم الله وجودِه ، كان عطائه لي أن أهداني أياكي ، يا ملاكي ، يا من أعطتني كل شيء بلا مقابل و بلا حدود
أحبك
أحبك كما لم يعشق حبيبا من قبل

ولا فارقة

2011-10-17T12:47:00.002-04:00

حاتقومي يا مصر جميلة و شابه ولا بنت العشرين
مهما يحاولوا يحاكموكي ويغمّوكي بإسم الدين
ولا فارقة معاكي وشوشهم أم ذقون وزبيبه ع الراس
ولا فارقة معاكي فتاوى تحرّم من غير اي اساس
الدين في ولادك عمره ماكان متعصب أو كذّاب
ولا عمره قال ده مسيحي ولا مسلم ولا أهل كتاب
حانشوفك بكره يا بلدي لمّه ولادك ع الصفّين
ما هو لمّا النيل بيفيض على أرضك بيفيض ع الشطّين

يا إعلام يا واااااطي

2011-10-10T19:16:00.001-04:00

قصايد أباحة
في غاية البجاحه
وفدادين وقاحة
في حق إللي مات
برامج بذيئة
وألفاظها بيئة
تشعلل حريقة
في كل الشاشات
تمجّد حرامي
بإسلوب درامي
وتكتب أسامي
على التابلوهات
يا إعلام يا واطي
حاتفضل مِطاطي
ولابس بلاطي
فلول البلاد
حاتفضل مهاود
لكذبك معاود
عن الحق حاود
وكلّك فساد
كلامك نميمة
وصمتك جريمة
وحربك شتيمه
على البالونات
برامجك إثارة
عروضك دعارة
ضيوفك سكارى
ولا الكباريهات
بتهتف لخاين
وتخرب مداين
مادام الزباين
بتدفع كاشات
ياخدّام بأجرة
لمنظومة فاجرة
لزوم المتاجرة
من الإعلانات
يا أجهل وسامه
يا أغبى إبتسامه
يا نبع الرخامه
على المخلوقات
يا بوق الحكومة
يا دلدول يا بومه
يا مليان بارومه
في كل الحالات
يا لامم و داير
بأعداء يناير
تركّب ستاير
لعقل العباد
يا سايب مكانك
وسانن سنانك
وسايق جنانك
على الناس ساعات
حاتفضل بخسّه
تفكرنا لسّه
بناس مستفزّة
بتحكي حكايات
كلام مش حقيقي
ينشّف في ريقي
ويرسم طريقي
على الدبابات
مسيرك حاتنظف
ولازم حاتعرف
تبطّل تخرّف
وتنسى إللي فات
وتبقى ف مقامك
وليك إحترامك
ويصبح كلامك
صحيح معلومات
وتبقى الوزارة
في قلب المغارة
بتاكل بصارة
وسكر نبات
ونردم عليها
ونربط إيديها
ونكتب إليها
خطاب الحداد

حب مصر جنون صريح

2011-09-30T16:15:00.003-04:00

خبّي شمسي بالغمام

وإكسر جناحات الحمام

خللي كل الطير كسيح

لا فيوم جناحة يشق ريح

ولا يهدي لونه للسلام

علشان جريح

وإقتل الثوّار و نام

وشوف دمانا في المنام

نوم "ياهوزا " مش مريح

كلنا أصبح مسيح

يفدي شعبه بالآلام

يفديه صحيح

حب مصر ماهوش غرام

أو أغاني مش تمام

حب مصر جنون صريح

وساعات مميت و ساعات أبيح

وساعات مايعرفش الكلام

وساعات فصيح

حق الشهيد .. يا ولاد الكلب

2011-09-25T09:47:00.002-04:00

أنا المدبوح عشان تتحنّي من دمّي

وأنا المقتول و كَفَني هديّة من أمي

أنا قلبي طريد مكسور

ودمعي بيشكي من همّي

أنا إبنك وجاي لك أقول

مافيش أحزان تدوم على طول

وصوت الحق مش معقول

يموت أو يبقى متغَمّي

يا مصر النيل يفوت يَمّي

يشيل أحلامي و يسمّي

ويفتح كل باب مقفول

يلاقي الأهل بيت و اصول

وكل الناس ولاد عمّي

فزورة الطاووس

2011-09-20T03:29:00.003-04:00

ريش الطاووس
كام ألف لون
أحمر و أخضر وموف و أزرق
وأصفر لمون
بس الطاووس
ولا ينفع آكله
ولا حتى فيه حيوان بياكله
ولا منه فايدة
غير بس شكله
ولاحتى عنده كام ريشة زايدة
تنفع مخدة
أو زينة على عروة جاكته
عم الطاووس
رافع ريشاته المفرودين
يفتن نفوس
وكتير بقوا م المفتونين
بالخوف ساعات
بالمال ساعات
وساعات كتير يفتن بدين
عم الطاووس
عنده الظلام أجمل فانوس
عنده الحقوق أفزع كابوس

عنده التاريخ مليان دروس

ورغم كل المعطيات

عالناس بيتعوّد يدوس

وفإيد فساد عمّال يبوس

عم الطاووس

لون ريشه زاد
لمّا إفتكر إن العباد
عَبيد
تيوس

ونسي الحقيقة المؤلمه
إن الشعوب مافيهاش عجوز

وإن الشباب الحالمه

متنظمّة

من غير فلوس

من غير مقابل تضحياتهم ممكنة

عرفتوا مين قصدي أنا

إنه الطاووس ؟

ويبقى كلّه بالحلال

2011-09-16T03:35:00.003-04:00

رَبّي ذقنك تحت بُقّك

وإلبس الجلبية بيضا

وإنت ماشي نفّ جامد

زي ماتكون جوّه ميضا

حك راسك في الموكيت

لجل تطلع لك زبيبة

وإشتم أي واحدة ست

لابسه تايير ولاّ جيبه

تبقى فورا واد خطير

مش في علمك اي حد

بعدها تصبح أمير

تبتدي تصدّق بجد

إن هبَلَك ده إيمان

وإن تخاريفك حقيقة

وإن صوتك ،، ياي ،، جنان

وإن تكشيرتك بريئة

بعدها تلقى الزباين

جايه من دوّل الخليج

يفتحوا لك في الخزاين

وإنت تغرف ،، كُله ليك

بعدها إتجوّز حريم

جامدة جنب أم العيال

تبقى ماشي في السليم

ويبقى كله بالحلال

شد حيلك بس و أوعى

عقلك المغلوب يفكّر

أحسن الأفكار دي وحشة

لأ و منها كمان يكفّر

كل عام و أنتي حبيبتي

2011-06-02T19:52:00.001-04:00

كل عام و عنيكي بتفتّح في حضني

كل عام و إيديكي من لمسه بتاخدني

كل عام و الحب بيننا مش كلام

وكلام ما بيننا في الحب يملى كام ألف عام

ولا لحظة في وجودك تفوتني

والصمت في وجودك كلام

والحرب في وجودك سلام

والنظرة بلسم للآلام

واللفته قمة الأهتمام

يا حبيبتي فات كام ألف عام

علشان لساني يقول حبيبتي

علشان يكون قادر يفوت من سجن خيبتي

ويبقى أسود تختفي من تحته شيبتي

أو ضيف مشاهد و السلام

مليون بخير في يوم ميلادك من كل عام

يا ميدان من غير إخوان

2011-05-29T12:23:00.002-04:00

‎

تحرير يا ميدان
من غير إخوان
ولا سلفيين
ولا تجّار دين
ولا ذقن تتاجر بالأديان
ولا راس بزبيبه و ألف لسان
ولا صوت نعسان
ولا صوت شمتان
ولا صوت كذّاب ولا ناس واطيين
ولا حد بيضحك ع المساكين
ولا حد بيلعب بالأوطان

ولا كوم تصاريح

ودموع تماسيح

و عيال مفطومة على التجريح

رافعين شعارات زي الأكفان

فاكرين الشعب المصري جبان

بس إنت خلاص يا جميل

يا أصيل

يا ميدان مجعوص على شط النيل

مليان ثوّار

شرفا و أحرار

ملهمش مرارة على التخوين

مافيهمش غباء زي التانيين
ولا همّا جماد

ولا همّا فساد

ولا همّا عبيد مكتب إرشاد

ولا همّا خدم للوهابيين

الناس جوّاك

يا ميدان حامياك

والعاصي في قلبك يبقى ملاك

والخايب يبقى صلاح الدين
وبقيت يا ميدان
من غير إخوان

صلينا في أرضك بالإنجيل

وكمان صلينا بالقرآن

كل حاجة

2011-05-26T06:53:00.005-04:00

اللّهم إكفني من فضلك بما تشاء

حتى أكون بفضلك كما تشاء

آمين

حاتقول لي آسف ؟!؟

2011-05-17T18:06:00.001-04:00

حاتعتذر؟

حاتقول لي آسف ؟

حاتميل و تبكي بالدموع ؟

هوّه ممكن يوم ياهوزا

يعتذر عن موت يسوع؟

هوّه حتى الإعتذار

يوم حايبقى دليل رجوع

حاتعتذر عن شعب عاش

ومات بيحبي من الخضوع

حاتعتذر عن دم سايل

ع البنادق و الدروع

حاتعتذر عن كل ظلم

وكل فقر

وكل جوع ؟

عن صنعتك أجيال جهاله

و أجيال بطاله

وأجيال ركوع

حاتعتذر عن أنهي شمعة

بإيديك طفيتها من الشموع ؟

إعتذار

2011-03-30T11:16:00.001-04:00

بأعتذر يا حبيبتي ليكي

وأنا مدبوح على ظروفنا

ولا عارف أزيح عنّك

وعنّي وشوش بتقرفنا

ولا عارف بإيدي أطول

وأجيب لك م السما حفنة

ولا عارف أبطّل أخاف

أو أقتل يأسنا و خوفنا

ولا عارف يا "بوبو" أطير

ولا عارف أكون قنديل

ولا عارف أخللي الحق

يجينا في يوم و يعرفنا

بأعتذر يا حبيبتي ليكي

وأنا مدبوح على ظروفنا

بص ع الخريطة

2011-03-22T18:10:00.015-04:00

خلص المولد

وطلعت النتيجة ثلاث أربع الناس قالت نعم و الربع قال لا

وإتعرف الطريق إللي حانمشي عليه وهو إننا نطلع على الدائري

ونلف من عند المحور لغاية 6 أكتوبر علشان نوصل المعادي

سهلة مش كده ؟

مش مهم ، تعالوا بينا ننسى شوية الشأن الداخلي

أصلي أنا مؤمن أن الشأن الداخلي دايما مش هو المهم و إن الشأن الخارجي اهم

أصل السياسة الداخلية بتتأثر كتير جدا بالحسابات الدولية و العلاقات الأقليمية

والكلام الكبير ده لازم أنه يكون مهم هو كمان

زي الدستور و الإستفتاء و البرلمان و الحاجات دي

طيب ، إيه الموضوع ؟

الموضوع إن الست كلينتون هانم جت على مصر و قابلت وزير الدفاع و زارت التحرير

وكأنها صاحبة الشغل و جاية تطمن على إللي حصل في غيابها

طيب سيبكم منها ، وتعالوا نشوف مصر بعد ثورة 25 يناير ممكن تعمل إيه

يعني إيه أوراق القوة في إيديها بخصوص السياسة الخارجية

وليه دولة زي أمريكا بكل جبروتها ، ركبها بتخبّط ع الجيران علشان تحتوي الثورة في مصر

أول حاجة علشان نقدر نفهم لازم نبص على الخريطة دي

زي ما أنتم شايفين الموقع الجامد إللي إحنا واخدينه

ناصية و هاوية و برحة و على بحار و نهر و قناة تجارية و آخر جمال

حطوا على ده التاريخ و النفوذ و الكثافة السكانية و ماتنسوش الجديد بقى

الثورة و التغيير و الديمقراطية

خشوا بقى ع المهم

بما إن البلاوي غارت بلا رجعة ، وبدأنا عهد جديد

تعالوا بينا نفكّر إيه ممكن يحصل لو مصر و إيران و تركيا حصل بينهم تفاهم

أي تفاهم سياسي أو سياسي إقتصادي

خصوصا إن التفاهم ده موجود فعلا بين إيران و تركيا و بين تركيا و مصر

يعني مش ناقص غير إن تتلاقى و جهات النظر بين إيران و مصر علشان المثلث يكتمل

طيب لو ده تم إيه إللي يحصل

شوف يا سيدي إيه إللي يحصل

أول حاجة تبقى إسرائيل راحت في داهية

ومش بس تبقى راحت في داهي ، دي كمان مش حاتقدر تتكلم

ليه لأنها مش حاتكون بتواجه مصر بس

لا دي حاتكون بتواجه قوة مصر وهي معاها كل الدول العربية – أو أغلبها على جه الدقة

وكمان حاتكون بتواجة قوة تركيا السياسية و دورها إللي أوربا لا تستطيع الإستغناء عنه

وكمان حاتكون بتواجه إيران بكل رزالتها و رخامتها و سلاحها النووي

صحيح طبعا إسرائيل مش حاتستسلم لكن على الأقل حاتبقى مصر أدها و أدود

طيب خلينا نتفائل زيادة

ونفترض إن الثورة في ليبيا نجحت و شالوا الجدع المجنون إللي هناك ده

وحصل إتصال و تواصل بين ليبيا و تونس و مصر

وإنضم للتواصل إللي بين مصر و تركيا و إيران

ساعتها مش بس إسرائيل حاتكون راحت في داهية

لا ، ده الأسطول السادس نفسة حايبقى مهدد في البحر المتوسط

ليه ؟؟؟

لأن البحر المتوسط حايبقة بحر شبه مقفول سياسيا

والأسطول السادس صعب يتحرك في المنطقة دي بدون غطاء سياسي

وبما إن شواطيء البحر المتوسط حاتبقى حرة

يبقى حايفقد السطول السادس جزء كبير من الغطا ده

ويبقى نايم من غير غطا

خش بقى ع الأجمد

لو بإذن الله تعالى اليمن دخلت على الخط

أولا على المستوى العربي حايبقى البحر الأحمر بقى عزبة خاصة لينا بالفعل

مقفول من تحت بمضيق باب المندب عند اليمن إللي حايكون ساعتها شقيق بجد

ومن فوق عندنا في قناة السويس

زي كده

وخللي أي حته سلاح تفوت بقى لإسرائيل أو غيرها

مش بس كده

دي دولة جنوب السودان إللي حاطنهالنا علشان تقلق نومنا

وتقرفنا إحنا و السودان في موضوع المية

حاتبقى إتطوقت من كذا ناحية و يبق التأثير عليها اسهل بكتير

ساعتها نقدر نلعب معاها و مع أثيوبيا سياسة زي ما إحنا عايزين

لأننا ضاغطين و إحنا بنتفاوض ، يعني بنتفاوض من منطق قوة

طيب تعالوا بقى نربط الحاجات دي مع بعض

يعني لو مصر و تركيا و إيران حصل بينهم تقارب

وعلى نفس الخط حصل تفاهم بين مصر و ليبيا و تونس

ومع اليمن كمان بعد نجاح ثورتها إن شاء الله

يبقى الدنيا ساعتها شكلها إيه ؟

يانهار خير

حايبقى شكلها كده

يعني مضيق باب المندب و قناة السويس

و البحر المتوسط

ودور تركيا السياسي في أوربا

وإيران و سلاحها النووي

وفوقيهم ثقل مصر العربي و الأفريقي

كل دول بيلعبوا سياسة في فريق واحد

بالتأكيد أول جون حايكون في أمريكا و حارس مرماها الخايب إسرائيل

عرفتوا ليه بقى أمريكا بتتدخل في ليبيا علشان تعمل عزل بين تونس و مصر

عرفتوا ليه إسرائيل إعترضت على زيارة رئيس وزراء تركيا لمصر بعد الثورة

عرفتوا ليه أمريكا عن طريق السعودية بتحاول تخللي نظام صالح إللي مش صالح

يفضل صالح شوية لغاية مايرتبوا نظام تاني تبعهم

وفي الآخر عرفتوا ليه كان نظام مبارك بيقدّم إيران على إنها العدو اللدود

لو لسه ما عرفتش

بص ع الخريطة

هو مش إحنا أصحاب الثورة ؟؟؟

2011-03-21T02:54:00.001-04:00

كل حيطان الثقة جوّايا إتقلبت خوف

كل فيراني في عبّي بتلعب ع المكشوف

كل حماس إتحوّل شك

كل إيمان مجموع إنفك

كل الفخر هرب جوّايا عشان مكسوف

هو مش إحنا صحاب الثورة

ولا صاحبها مش معروف

هو مش إحنا الشعب الثائر

ولا رجعنا لبسنا خروف

هو مش إحنا الشعب في مصر

هو مش أحنا هدمنا القصر

هو مش إحنا هتفنا و قلنا

ثورة ثورة حتى النصر

ليه قلبنا بقى ع الحرية

مش متوغوش

ولا ملهوف

حد يقول لي يا ناس أنا شايف

ولا خلاص بطّلنا نشوف

يا فرخة .. يا قلّة

2011-03-17T01:59:00.003-04:00

خلاص يا جماعة

إتحلّت

يانقول نعم ونبقى فرخة

أو نقول لا ونبقى قلّة

!!!!!

يخرب بيت كده

إيه الحلاوة دي ، كأن خلاص كل مشاكلنا أصبحت الإستفتاء

هو ليه الإستفتاء اصلا ؟

آه .. علشان نوافق أو نرفض تعديلات الدستور

طيب وهو إحنا كنّا طلبنا تعديل الدستور أصلا ؟

إحنا طلبنا إسقاط الدستور

إسقاط النظام يا عاااااالم يعني إسقاط الرئيس و الحكومة و الحزب و الدستور و التركيبة السياسية كلها إللي في البلد

يعني إحنا رايحين يوم السبت نوافق أو نرفض حاجة مفروضة علينا

ومش مطالب الثورة خالص

رايحين و كل واحد فاتح بقه في بلاهة و بيضحك ضحكة عبيطة

ماسك بطاقة الرقم القومي و رايح يقول

أنا فرخة ولا قلّة

ياجدعان إحنا قمنا بثورة

مات فيها ناس ، الشهدا دول ليهم حق ، والمصابين ليهم حق ، والناس إللي رزقها وقف و شغلها أتقفل ليهم حق ، هو كل العالم مصدّق إننا قمنا بثورة إلا إحنا ؟

الثورة يعني تغيير ، مش حفلة سيما من سته لتسعة و خلاص نقوم نروّح، الثورة دي شغل وعمل متواصل أيام و سنين ، وإللي بيحصل ده هو تحايل علينا و على مطالبنا

إحنا ما نزلناش في الشارع في عز البرد ، وأنضربنا بالرصاص و القنابل والسنج و البلاوي الزرقا كلها علشان في الآخر نعمل زي ما مبارك كان عايز بالظبط

نعدّل الدستور ، و ست شهور فترة إنتقالية ، وبعدين مجلس شعب مش بيمثل الشعب و رئيس جديد الله أعلم حايبقى شكله إيه

لا

لا و ألف مليون لا

المجلس العسكري أو الحكومة أو المسؤولين المفروض يعملوا رأي الناس و الشعب ، لأن الشعب هو إللي قام بالثورة و هو إللي يقول إيه يتعمل و إيه لا ، ولما الشعب يقول دستور جديد ، ماينفعش هما يقولوا طيب طيب بعدين ، إلعب بعيد يا شاطر

أنا شايف الحزب الوطني و أعوانة بيطلعوا لنا لسانهم و بيلعبوا لنا حواجبهم و بيعملوا لنا حركات قبيحة بصوابعهم و بيقولولنا

يا شعب يا أهبل ، حد يعمل ثورة ، وبعدين يسيب مجلس عسكري يحكم بدل من الشعب ، يعني الشعب خلاص خلص ، مافيهوش رجّالة تنفع تحكم ، عمركم شوفتم ثورة تتحكم بالوكالة

الجيش على عيني و راسي ، بس المجلس العسكري مش الجيش ، و الشعب عمل ثورة و من حقة يجني ثمارها

ولو المجلس العسكري مش حايحقق مطالب الشعب يبقى يمشي و ييجي مجلس مدني يحققها

ولو حكومة عصام شرف مش حاتقف جنب الشعب لتحقيق مطالبة يبقى تروّح مع ألف سلامة و تيجي حكومة غيرها تعبّر عن الشعب و تقف جنبه

هو إحنا بنهرّج ؟ نعمل ثورة و نهز الدنيا و يموت منا مئات و يتصاب عشرات الآلاف ، و في الآخر ناخد فتافيت ، ينضحك بيها علينا

ياناااااااااااس دي حتى المحاكمات سايبة ثلاتربع النظام القديم زي ما هو ، مش بس بدون محاكمة ، لا دول كمان في مناصبهم و بيشتغلوا عادي جدا ، كأن إللي قامت دي كانت خالتي و قايمة من النوم مش ثورة شعبية

هو فيه كده بالزمّة ، فيه كده في الدنيا

لا و المضحك المبكي في نفس الوقت ، إن خلاص بقت الثورة هي إللي خربت البلد ، يعني كأن الإقتصاد بتاعنا كان آخر تمام ، و إداء بورصتنا كان ميت فل و أربعتاشر ، وكل الناس مبسوطة و بتاكل كباب و بيتزا من بتوع طنط عفاف شعيب ، و جت الثورة بقى ووقفت حال الناس

ولا كأننا كان عندنا فقر ، ولا مرض ، ولا بطالة ، ولا فساد ، ولا قمع و قهر ، ولا أمن دولة ، ولا أمن مركزي

يا عالم حسوا على دمكم شوية ، ده فيه أموات شهداء لسه دمهم مابردش ، وأمهات لسه دموعهم ماجفّتش من البكا على عيالهم إللي راحوا على إيدين بتوع الشرطة إللي ياحرام مشاعرهم بتتدايق خالص لما الشعب بيقول عليهم واطيين

بالزمة ده كلام ؟؟؟؟؟

وبعدين حبايبنا الحلوين إللي مغرقين الدنيا إئتلافات و أحزاب و حركات و داخلين في صراعات مالهاش اول من آخر

بتتخانقوا على أيه يا خايبين ، ده هوا ،، كله هوا ،، قبض الريح يعني يا أذكى خلق الله ، خلاص كلكم بقيتوا سياسيين و بتوع سُلطة ؟؟

لا ياحبيبي إنت و هو ماينفعش ، الشهيد إللي نزل الشارع و هو مالوش في السياسة نزل علشان سمع كلامكم و دعواتكم للتظاهر ، ومات وهو بيدفع ثمن دعواتكم دي ، علشان كده ماينفعش دلوقتي تقولوا

خلاص

بح

مش لاعبيين

إحنا بقينا سياسيين بعد ما كنّا ثوريين

لا يا حيلتها إنت وهو وهي و هما

دم الشهدا زي ما هو في رقبة إللي ضرب نار و إللي أعطى أوامر ضرب النار ، هو كمان في إيد إللي تراجعوا و هادنوا و نخّوا قبل ما كل مطالب الثورة تتحقق على أرض الواقع مش مجرد وعود

طمعان في إيه يا خايب إنت و هو وهي ، عايز تبقى وزير ولا سفير ولا مدير ولا رئيس جمهورية قادم ؟؟ جتكوا ستين نيلة ، الثورة بتروح مننا يا نااااس ، وفي الآخر مش حاناخد غير مقلب محترم وبدل ماتقعدوا على كراسي الحكم خانقعد كلنا على خوازيق ماركة إبقى قابلني

أنا أعرف إن لما ثورة تقوم ، يبقى على الأقل الحاكم القديم إللي قامت عليه الثورة ده على الأقل يتحبس أو تتحدد إقامته و إقامة عائلته ، يخضع لتحقيقات سياسية و جنائية عن قرارات أخدها و إتفاقيات وقعها ، و إجراءات نفذها ، ويتعصر بقى و يقر على كل حاجة ، وبعدين يخضع لمحاكمة عادلة و ياخد جزائة

إنما حسني قاعد في شرم الشيخ بيلعب رجليه على المية و جمال و أمة رايحين جايين بين القاهرة و شرم عادي جدا كأنهم في أجازة من الحكم و راجعين تاني بعد ما تخلص

والمصيبة إن المجلس العسكري مابياخدش اي إجراء معاهم

أو حتى مع غيرهم من وزراء سابقين مطورتين في قرارات سياسية تصل إلى حد الجرائم

أهم حاجة بتشغل المجلس العسكري إن ميدان التحرير يبقى من غير مظاهرات ، وإن المتظاهرين يروحوا بقى علشان السيما حاتشطّب و الباب حايقفل و صاحب السيما حايروّح ينام

بالزمة بقى ده إسمة كلااااام ؟؟!!!

إنحنى جبين السماء .....the brow of the sky was bend

2011-03-16T00:52:00.010-04:00

إنحنى جبين السماء

لتلمس جبينك بقبلة

لأنك قبلتي أن تكوني إسما للتضحية

والعطاء

والموت في سبيل الحياة

إنحنى جبين السماء

ليظلل وجهك الدامي

ويحجب عنه ضوء الحياة الصاخب

وينيره بنور الحقيقة

إنحنى جبين السماء

ومد الأفق ذراعيه

عله يتسع لإحتضان تضحيتك الغالية

في مثل هذا اليوم

صعدت روحك إلى مكان أفضل من هذا العالم

شاهدة على خسة الصهيونية ، والصهاينة

لتحمل إلى السماء

شكوى الظلم على هذة الأرض

راشيل كوري

لكي كل التحية ، لدمائك ، وتضحيتك ، وروحك الطاهرة

في ذكرى وفاتك

_________________

the brow of the sky was bend

touch your forehead with a kiss

because you are agree to be a name for the

sacrifice,

tender,

and death to life,

the brow of the sky was bend

to shade your bloody face

and obscure his view of life noisy

and enlighten the light of truth

the brow of the sky was bend

the horizon extending his arms

May be able to embrace your precious sacrifice

in this day

stepped up your soul to a place better than this world

a witness to the meanness of Zionism

and the Zionists

to take to the sky

Complaint of injustice on this earth

Rachel Corrie

greeting, for your blood , your sacrifices, and your soul pure

On the anniversary of your death

________________________